Elee oĩhaichaite

ÑANDEJÁRA “oipota opaichagua tapicha ojesalva ha oikuaa porã pe añetegua” (1 Tim. 2:4). ¿Rehechakuaápa upéicharõ mbaʼérepa iñimportantete relee porã Ñandejára Ñeʼẽ en vos álta?

Tahaʼe ijedáva térã imitãva tekotevẽterei jalee porã la Biblia ha umi puvlikasionkuéra. ¿Mbaʼérepa? Ñande testígo de Jehová ñaipytyvõ vaʼerã ñande rapichápe oikuaa hag̃ua Jehovápe ha umi mbaʼe oipotáva jajapo. Ha upearã heta vése jalee vaʼerã peteĩ persóna térã heta hénte renondépe. Ha ñande rogapýpe jalee meme vaʼerã avei. Ko Eskuéla Jaiporukuaa Hag̃ua la Biblia ohekomboʼe opavavépe olee porãve hag̃ua en vos álta.

Aníkena repensa vyroreiha relee la Biblia kongregasiónpe térã reime jave ótro hendápe. Nemanduʼa vaʼerã la Biblia ouha Ñandejáragui, avei “oikove ha ipoderosoiterei, [...] ha ikatu ohechauka umi mbaʼe ñapensáva ha jaipotáva ñane korasõme” (Heb. 4:12). Ñandejára Ñeʼẽ ndaijojahái, ndaipórigui ótro lívro ikatúva ñanemboʼe umi mbaʼe oĩva la Bíbliape. Por ehémplo ñanemboʼe mávapa hína Ñandejára tee, ñanepytyvõ ñañemoag̃ui hag̃ua hese ha ñambohovái hag̃ua umi mbaʼe ijetuʼúva. Ohechauka avei ñandéve mbaʼépa jajapo vaʼerã jahupyty hag̃ua jeikove opaveʼỹva pe múndo pyahúpe. Upévare ñañehaʼãmbaite vaʼerã jalee porã la Biblia (Sal. 119:140; Jer. 26:2).

Mbaʼéicha ikatu jalee oĩhaichaite. Jalee porã hag̃ua ñañatende vaʼerã heta mbaʼére, primeroite tekotevẽ jalee oĩhaichaite pe informasiónpe. Ñañehaʼã vaʼerã ani jasaltea ni peteĩ palávra ni létra, térã ñakonfundi umi palávra.

Ikatu hag̃uáicha jalee porã umi palávra, ñantende porã vaʼerã mbaʼe témarepa oñeñeʼẽ hína, ha upearã tekotevẽ jajeprepara porã. Mbeguekatúpe jaleekuévo ikatútama jahecha umi palávra oĩva tenondeve ha japillátama mbaʼérehepa oñeñeʼẽ hína. Koʼã mbaʼe ñanepytyvõta jalee hag̃ua pe informasión oĩhaichaite.

Káda idióma oreko rrégla ojeskrivi porã hag̃ua, péicha jaikuaa moõpa oho vaʼerã umi asénto ha sígno de puntuasión. Umi púnto ha kóma ñanepytyvõ jaikuaa hag̃ua moõpa jajapo vaʼerã peteĩ páusa. Heta idiómape ha guaraníme avei ojelee jave noñeñatendéiramo umi púnto, umi sígno de interrogasión térã de admirasiónre, ikatu oñentende ótra kosaite hína. Guaraníme avei oñeñatende vaʼerã umi asénto nasál ha puso rehe, pórke osino ikatu ojeʼe ótra kosaite. Ikatu hag̃uáicha relee porã, reikuaa porã vaʼerã mbaʼéichapa ojeskrivi hekoitépe ne idiómape. Nemanduʼa vaʼerã relee jave ndahaʼéi repronunsia porãnte vaʼerã umi palávra, síno oñentende vaʼerã umi idéa.

Ndahaʼéi sapyʼaitépe ikatútamava relee porã, tekotevẽ repraktika meme. Eñehaʼã ani rejavy ni una ves, upearã elee jey jey osẽ porã meve ndéve ha upéi ae ehasa pe ótro párrafope. Upéi elee unos kuánto páhina de unoite ha eñehaʼã elee rejavyʼỹ rehe. Rejapo rire upéva ejerure ótrope tanerendu relee jave, ha teʼi ndéve repronunsia vaíramo peteĩ palávra térã rerrepetírõ.

Heta hendápe oĩ hénte olee asýva ndorekói rupi lus, ndohechaporãi térã ndorekói anteóho. Ikatúramo osolusiona koʼã mbaʼe, katuete oipytyvõta chupekuéra ikatupyryve hag̃ua olee jave.

Umi ermáno olee porãvape oñasigna jepi avei olee hag̃ua kongregasiónpe, tahaʼe ojestudia jave rrevísta Ñemañaha, térã oiko jave Ñandejára Ñeʼẽ Ñehesaʼỹijo. Otokáramo ndéve relee ndahaʼéi repronunsia porãnte vaʼerã umi palávra. Tekotevẽterei nde voi rentende porã pe informasión ikatu hag̃uáicha remog̃uahẽ hekoitépe umi nerendúvape. Upearã rentende porã vaʼerã mbaʼépa heʼise káda palávra ha elee porã umíva, pórke nderejapóiramo upéicha nde voi nerentendemoʼãi ha umi nerendúva nontendemoʼãi avei. Reñatende vaʼerã umi asénto ha púntore, ha ani releénte rehóvo palávra por palávra, síno relee vaʼerã por fráse. Ndekatupyryséramo relee hag̃ua en púvliko, rejepokuaa vaʼerã avei relee porã neañoháme.

Apóstol Pablo oskrivi vaʼekue peteĩ ansiáno ikatupyrývape: “Resegi vaʼerã reñehaʼãmbaite relee opavave renondépe” (1 Tim. 4:13). Péicha jahecha enterovete ikatuha ñamehora jalee porãve hag̃ua.