LA BIBLIA OMBOHOVÁI KOʼÃ PORANDU
¿Oadorápa Ñandejárape opaichagua rrelihión haʼe omereseháicha?
Umi notísiape jahecha jepi mbaʼéichapa ojepuru pe rrelihión ojejapo hag̃ua mbaʼe vai. Upéva ohechauka naentéroi umi rrelihión oadoraha Ñandejárape haʼe omereseháicha ha naentéroi ouha chugui (Mateo 7:15). Upévare jaʼekuaa umi rrelihión japu ombotavyha opavave léntope. (Elee 1 Juan 5:19.)
Upéicha avei, Ñandejára oikuaa oĩha heta hénte ipyʼaporãva ohayhúva pe hustísia ha añetegua (Juan 4:23). Upévare haʼe voi oinvita umichagua persónape oheka hag̃ua pe añetegua Iñeʼẽ la Bíbliape. (Elee 1 Timoteo 2:3-5.)
¿Mbaʼéichapa nde ikatu reikuaa mávapa pe rrelihión añetegua?
Jehová ningo ombyaty hína opaichagua héntepe tahaʼe haʼéva irrelihión, ¿mbaʼéichapa ojapo upéva? Omboʼévo chupekuéra pe añetegua oĩva la Bíbliape ha ohechaukávo chupekuéra mbaʼéichapa ojoayhu vaʼerã (Miqueas 4:2, 3). Oiméramo nde reikuaase mávapa pe rrelihión añetegua remaña vaʼerã mbaʼéichapa ojotrata hikuái. (Elee Juan 13:35.)
Jehová ojevale pe rrelihión añeteguáre ombyaty hag̃ua opaichagua héntepe (Salmo 133:1)
Umi oservi porãva Ñandejárape oguerovia la Bíbliape oĩva ha oñehaʼã osegi umi konsého oĩva pype (2 Timoteo 3:16). Avei orrespeta Ñandejára réra (Salmo 83:18). Haʼekuéra osẽ omombeʼu Ñandejára Rréino añoite ikatuha omeʼẽ ñandéve esperánsa (Daniel 2:44). Ha ojapo hikuái Jesús ojapo haguéicha ‘ohesapévo umi hénte renondépe’ ha oipytyvõvo hapichakuérape (Mateo 5:16). Upéicharõ, ¿mbaʼéichapa nde ikatu rerrekonose mávapa hína umi oservi porãva Ñandejárape? Haʼekuéra oho meme ovisita umi héntepe omombeʼu hag̃ua chupekuéra umi mbaʼe porã ojapótava Ñandejára Rréino. (Elee Mateo 24:14 ha Hechos 5:42; 20:20.)