Koʼág̃a haʼe pe tiémpo japredika hag̃ua!
1. Mbaʼérepa koʼág̃a haʼe pe tiémpo japredika hag̃ua?
1 “Pekyhyjékena Ñandejáragui, ha pemombaʼeguasu chupe”. Umi ánhel omotenonde pe tembiapo oñemeʼẽ hag̃ua ko marandu “opa tetã ha trívu, ha ñeʼẽ ha tapichápe”. Ha mbaʼérepa? “Og̃uahẽmagui pe óra haʼe oporohusga hag̃ua”. Koʼág̃a, ñande jaikoñaína pe ‘huísio órape’, og̃uahẽtava huʼãme oñehundi vove ko sistéma koʼag̃agua. Tekotevẽterei opavave tapichakuéra ‘oadora upe yvága ha yvy ha pe már ha umi yvu Apoharépe’. Ndaipóri ótro tembiapo iñimportantevéva, térã oñekotevẽvéva pe “marandu porã opaʼỹva” ñemombeʼúgui. Upéicha, koʼág̃a haʼe pe tiémpo japredika hag̃ua! (Rev. 14:6, 7.)
2. Mbaʼéichapa Jehová siervokuéra ohechaukahína ohechakuaaha koʼã tiémpo jahasáva ivaietereiha?
2 Umi diez áño ohasavaʼekuépe, Jehová siervokuéra oiporu haimete 12 mil millón óra rupi opredika hag̃ua Ñandejára Rréino ha ojapo hag̃ua disípulo. Oĩ heta omohenda porãvéva hembiapokuéra ikatu hag̃uáicha ombaʼapove pe ñemonoʼõ espirituálpe (Mat. 9:37, 38). Pór ehémplo, pe áño ohasavaʼekuépe, 850.000 puvlikadór rupi ojapo káda més pe precursorado. Peteĩ precursor regulárgui oñehaʼarõ opredika 70 óra rupi káda més. Peteĩ precursor auxiliar katu opredikavaʼerã 50 óra.
3. Mbaʼépa tekotevẽ jepi ojapo heta puvlikadór ikatu hag̃uáicha oiko chuguikuéra precursor?
3 Mbaʼéichapa ikatu jajapo pe precursorado. Ohechakuaágui ‘mbykymaha pe tiémpo hembýva’, umi precursor oñehaʼã oiko oguerekoʼỹre heta mbaʼe (1 Cor. 7:29, 31). Oñehaʼã oiporukuaave pe viru oguerekóva, ani hag̃ua oikotevẽ ombaʼapoiterei. Pór ehémplo, oĩ umi ováva peteĩ óga michĩvévape. Oĩ katu omeʼẽva umi mbaʼe materiál noikotevẽiva (Mat. 6:19-21). Ha ohekaʼive avei umi mbaʼe ijupe g̃uarãnteva. Umi mbaʼe ojapo hikuái ikatu hag̃uáicha itiempove ha oñatende porãve ipredikasión rehe (Efe. 5:15, 16). Oñehaʼã memégui, omeʼẽgui ijehegui, ojeroviágui Jehová rehe ha ojerurégui iñemboʼépe oipytyvõ hag̃ua chupe, heta puvlikadór ikatu ojapo peteĩ prográma oiporu porãtava, ha ikatu ojapo pe precursorado.
4. Mbaʼe jajapóramopa ñanepytyvõta oiko hag̃ua ñandehegui precursor?
4 Ikatúpa oiko ndehegui precursor? Mbaʼére piko nereporandúi umi precursor osẽ porãvape, omombeʼu hag̃ua ndéve mbaʼéichapa ojapo hikuái? Embaʼapo hendivekuéra predikasiónpe ha ehecha mbaʼéichapa ovyʼa hikuái. Ikatu avei restudia ñane puvlikasionkuérape umi artíkulo oñeʼẽva precursorado rehe. Eñehaʼã ehupyty umi mbaʼe nepytyvõtava oiko hag̃ua ndehegui precursor. Oĩramo provléma ndejokóva ani hag̃ua rejapo pe precursorado, eñemboʼe Jehovápe, emombeʼu chupe umi provléma ha ejerure chupe tanepytyvõ ndepuʼaka hag̃ua hesekuéra (Pro. 16:3).
5. Mbaʼéichapa pe precursorado ñanepytyvõ ñandekatupyryve hag̃ua predikasionhápe?
5 Vendisión ha vyʼa jahupytýva. Pe precursorado ñanepytyvõ jaiporukuaave hag̃ua Ñandejára Ñeʼẽ, ha upéva ñanembovyʼave. “Añetehápe haʼe peteĩ vendisión jaiporukuaáramo Ñandejára Ñeʼẽ hendápe porã”, heʼi peteĩ mitãkuña precursora. “Jajapóramo pe precursorado jaiporu heta la Biblia. Koʼág̃a, asẽ vove apredika pe ogaha rupi, ikatu aiporu umi téysto vívliko ou porãtava káda óga járape” (2 Tim. 2:15).
6. Mbaʼe mbaʼépa ñanemboʼe avei pe precursorado?
6 Jajapóramo precursorado ñaaprende avei heta mbaʼe ñanepytyvõva jaiko porãve hag̃ua. Peteĩ mitãrusúpe ikatu omboʼe oiporu porãve hag̃ua itiémpo, oiporukuaa hag̃ua pe viru, ha oikokuaa hag̃ua hapichakuéra ndive. Ojapo rire precursorado, oĩ heta omombaʼevéva hekovépe umi mbaʼe espirituál (Efe. 4:13). Avei, heta precursor pyʼỹinte ohecha mbaʼéichapa Jehová oipytyvõ chupekuéra (Hech. 11:21; Fili. 4:11-13).
7. Mbaʼéichapa pe precursorado ñanepytyvõ ñañemoag̃uive hag̃ua Jehovágui?
7 Ikatu jaʼe oĩha peteĩ vendisión tuichavéva omeʼẽva ñandéve pe precursorado: ñanepytyvõ ñañemoag̃uive hag̃ua Jehovágui. Upéva ikatu ñanemombarete jahasa asy jave. Peteĩ ermána ombohovaivaʼekue tuicha jehasa asy, heʼi: “Pe Jehová rehe añemoʼag̃uihaguére ajapo rire pe precursorado, chepytyvõ ambohovái hag̃ua opaichagua jehasa asy.” Upéi heʼi avei: “Che avyʼaiterei aiporuhaguére ko che rekove akakuaapa rire aservi hag̃ua opaite árape Jehovápe. Chepytyvõ ameʼẽ hag̃ua chejehegui ajapo hag̃ua umi mbaʼe naimoʼãivaʼekue ikatutaha ajapo” (Hech. 20:35). Jaguerekókena ñande avei umi vendisión porãite jajapo porã aja ikatuha peve ñane predikasiónpe, pe tembiapo iñimportantevéva (Pro. 10:22).