Nemanduʼápa rejapórõ guare nde prekursorádo?
1. Mbaʼépa ojapovaʼekue heta ermáno, péro mbaʼépa oiko hesekuéra?
1 Are guivéma hetaiterei ermáno oiko ‘omboʼe ha opredika meme pe marandu porã’ ojapógui iprekursorádo rregulár (Hech. 5:42). Péro oĩ ohejáva ko servísio porãite ojere vaipa rupi chupe. Ha oiméramo nderehe oiko upéicha, ikatúpa rehecha ijátapa ndéve rejapo jey hag̃ua nde prekursorádo?
2. Mbaʼérepa iporãta ojepyʼamongeta umi ohejavaʼekue iprekursorádo?
2 Ikatu okambia ne situasión. Oñesolusionámapa upe provléma ndejokovaʼekue rejapo hag̃ua nde prekursorádo? Oiméramo ndaikatuvéikuri rehupyty umi noventa óra ojejerurevaʼekue yma, koʼág̃a oguejýma setenta órape, upévare ikatu reñehaʼã jey rejapo. Ikatu avei nderejejopyvaivéima térã natekotevẽvéima reñangarekoiterei ne famíliare. Peteĩ ermána ohejavaʼekue iprekursorádo hasykatu rupi, oñepyrũ jey orekópe 89 áño. Koʼág̃a ohasáma un áño osẽ hague ospitálgui ha haʼe ohechakuaa hesãivemaha, upévare odesidi ojapo jey iprekursorádo.
3. Mbaʼéichapa ikatu peñopytyvõmba pende rogayguándi peteĩ jepe ojapo hag̃ua iprekursorádo?
3 Ikatu ningo nde nderejapóiva prekursorádo, péro oĩ peteĩ nde rogaygua ojapovaʼekue ha oheja oñangareko hag̃ua pende sy térã pende ru ijedámavare (1 Tim. 5:4, 8). Mbaʼépa ikatu rejapo reipytyvõ hag̃ua chupe? Mbaʼérepa napeñemongetái oñondivepa pehecha hag̃ua mbaʼépa ikatu pejapo? (Pro. 15:22.) Peñopytyvõmbáramo ikatuhína peteĩ jepe ojapo iprekursorádo, ha upéicha enterove pehechaukáta pemombaʼeha upe servísio porãite.
4. Mbaʼépa ikatu rejapo ndaikatumoʼãirõ koʼag̃aite oiko ndehegui prekursór?
4 Aníkena nekangy ndaikatumoʼãirõ koʼag̃aite rejapo jey nde prekursorádo. Jehovápe ningo ombovyʼáma ohechávo rejaposeha upéva (2 Cor. 8:12). Péro iporãta resegíramo reiporu predikasiónpe umi mbaʼe reaprendevaʼekue yma prekursór tiémpope. Ha aníkena nderesarái reñemboʼekuévo ere hag̃ua Jehovápe rejapose jeyha nde prekursorádo, avei eñatendékena peichahágui okambia mbaʼérõ g̃uarã ne situasión (1 Juan 5:14). Ikatu voi amo gotyove Jehová rupive ‘ija ndéve rembaʼapove hag̃ua Chupe g̃uarã’, ha upéicha vyʼápe rejapo jey nde prekursorádo rregulár (1 Cor. 16:9).