“Ndehegui ningo ikatu oiko prekursór!”
1. Mbaʼépa heʼi peteĩ ermána ojapómava iprekursorádo heta áñore?
1 Chílepe peteĩ prekursóra hérava Kathe B. Palm iguapaiterei, opredikáma heta áñore ko tetã tuichakuére. Haʼe heʼi: “Ajapórire ambue tembiapo ndavyʼaivaʼerãmoʼã koʼág̃a avyʼaháicha, ni ndaikatuivaʼerãmoʼã añemoag̃ui Jehováre”. Añetehápe heta mbaʼe porã ohupyty peteĩ prekursór, upévare katuetei ojeʼémane ndéve: “Ndehegui ningo ikatu oiko prekursór!”.
2. Mbaʼérepa javyʼa jajapóramo Ñandejára oipotáva?
2 Ñanembovyʼa. Jesús ningo ombojojavaʼekue Itúva rembipota hembiʼúre, omombarete jey rupi chupe (Juan 4:34). Upévare heʼivaʼekue hemimboʼekuérape ojapo hag̃ua Jehová rembipota ha ndaiporiha ambue mbaʼe ombovyʼavétava chupekuéra. Ñande avei jajapóramo Ñandejára oipotáva katuete javyʼáta, jaikuaágui ñaneñeʼẽrenduha chupe. Ha jaiporuvéramo ñane tiémpo, mbaretekue ha mbaʼerepy ñaipytyvõ hag̃ua ñande rapichakuérape, koʼýte javyʼavéta (Hech. 20:31, 35).
3. Mbaʼépa ikatu jahupyty jaiporuvéramo ñane tiémpo japredika hag̃ua?
3 Jaiporúramo ñane tiémpo japredika hag̃ua ikatúta jastudia ñande rapichándi, ha upéva ñanembovyʼaitereíta. Ñepyrũrã ikatu ñaimoʼã umi hénte ndoikuaaseiha mbaʼeve Ñandejáragui, péro mbeguekatúpe ñandekatupyryvéta jahávo ha ikatúta ñañemongeta hetavéndi. Oikóramo ñandehegui prekursór, un áño rire ikatúma jaha Escuela del Servicio de Precursor-pe, jaikuaave hag̃ua heta mbaʼe ñanepytyvõtava predikasiónpe (2 Tim. 2:15). Upéicharõ, ñañehaʼã memékena ikatu hag̃uáicha umi semílla ñañotỹva heñói amo gotyove (Ecl. 11:6).
4. Mbaʼépa opensavaʼerã umi imitãva omohuʼã potaitéva ikoléhio?
4 Nde nemitãva, epensamína. Oiméramo remohuʼã potaite nde koléhio, repensámapa mbaʼépa rejapóta upe rire? Koʼág̃a oiméne heta restudiavaʼerã ha saʼi ne tiémpo, mbaʼépa rejapóta pe tiémpo hembývagui ndéve ág̃a remohuʼã rire nde koléhio? Mbaʼérepa nereñemboʼéi Jehovápe ha epensa ikatúpa rejapo nde prekursorádo, reiporupa rangue ne tiémpo traváhope? Heta mbaʼe porã rehupytýta rejapóramo upéva ha nepytyvõtava nde rekovépe. Pór ehémplo reñeʼẽta opaichagua tapichándi, remohenda porãta ne rembiapokuéra, rembohovaikuaáta umi mbaʼe ijetuʼúva ha ndekatupyryvéta reporomboʼe hag̃ua.
5. Mbaʼéichapa tuvakuéra ha kongregasión ikatu omokyreʼỹ umi ermánope ojapo hag̃ua iprekursorádo?
5 Ha peẽ tuvakuéra, mbaʼépa pejapo pemokyreʼỹ hag̃ua pene famíliape ojapose hag̃ua iprekursorádo? Pene ehémplo ha umi mbaʼe pejéva oipytyvõta chupekuéra ohechakuaa hag̃ua iñimportantetereiha omotenonde Ñandejára Rréino (Mat. 6:33). Peteĩ ermáno hérava Ray ojapovaʼekue iprekursorádo omohuʼãmíre ijestúdio, haʼe heʼi: “Che sy akóinte heʼivaʼekue prekursorádo ñanembovyʼaitereiha”. Avei ambue ermáno Españaygua hérava José, heʼi: “Che kongregasiónpe ojeʼe voi ndaiporiha ambue mbaʼe iporãvéva prekursorádogui. Upépe umi ermáno ohechauka omombaʼetereiha ko tembiapo, oipytyvõ umi prekursórpe ha ikomentário rupive oporomokyreʼỹ. Opa koʼã mbaʼe chemokyreʼỹ amoñepyrũ hag̃ua che prekursorádo”. Jahechakuaa upéicharõ kongregasiónpe ikatuha avei oñemokyreʼỹ ojejapo hag̃ua ko tembiapo porãite.
6. Mbaʼépa ikatu jajapo ñapensáramo prekursorádo ndahaʼeiha ñandéve g̃uarã?
6 Umi mbaʼe ikatúva ñandejoko. Ikatu oĩ opensáva: “Prekursorádo ningo ndahaʼéi chéve g̃uarã”. Oiméramo repensa upéicha, emombeʼu Jehovápe ha ere chupe: “Ndaikuaái Jehová ajapo porãtapa che prekursorádo, péro che ningo ajapose nde reipotávante” (Sal. 62:8; Pro. 23:26). Upe rire ehecha mbaʼépa heʼi Ñandejára Ñeʼẽ ha iñorganisasión. Heta prekursór oñepyrũ ojapo iprekursorádo auxiliar ha ovyʼaiterei, upémarõ ojapo iprekursorádo rregulár (Sal. 34:8).
7. Mbaʼépa jajapokuaa oiméramo jakyhyje ndajahupytýirõ g̃uarã umi setenta óra?
7 Oĩ avei heta okyhyjéva ndohupytýirõ g̃uarã umi setenta óra káda més. Péro umícha jave ikatu ñañemongeta umi prekursór ndive ha ñaporandu chupekuéra mbaʼéichapa ohupyty hikuái hiʼóra (Pro. 15:22). Upe rire ñamohenda ñane tiémpo jahecha peve mávapa opyta porãve ñandéve. Ñamboykevaʼerã umi mbaʼe naiñimportanteguasúiva ha ñamotenonde predikasión, upéicha jahecháta ndahasymoʼãiha jahupyty umi óra oñekotevẽva (Efe. 5:15, 16).
8. Mbaʼérepa iporã jajepyʼamongeta jepi ñane situasiónre?
8 Mbaʼépa ikatu rejapove. Heta mbaʼe ningo okambia ñande rekovépe, upévare iporã jajepyʼamongetami ñane situasiónre ha ñapensa noiméipa ijáma ñandéve jajapo hag̃ua ñande prekursorádo. Pór ehémplo oiméramo are guivéma rembaʼapo, saʼípa ofalta ndéve rejehuvila hag̃ua? Peteĩ ermáno hérava Randy ohejavaʼekue itraváho ojehuvila mboyve, haʼe omombeʼu: “Nambyasýi aheja rupi che traváho, upéicha rupi rojapo ore prekursorádo che rembirekóndi ha rova peteĩ lugár oñekotevẽháme. Hetaiterei mbaʼe porãma ningo rohupyty”.
9. Mbaʼe rehépa ojepyʼamongetavaʼerã umi omendáva?
9 Heta omendáva ningo ohechakuaa natekotevẽiha katuete mokõivéva ombaʼapo un diaite, ha heta mbaʼe porã ohupyty upe haguére. Péro upearã ningo ohechavaʼerã mbaʼe mbaʼépa ikatu omboyke. Ndaʼareiete peteĩ ermána oheja itraváho oiporupaitéva chugui itiémpo ikatu hag̃uáicha opredikave. Iména hérava John heʼi: “Avyʼaiterei ningo aikuaávo che rembireko oiporuha itiémpo ára ha ára oservi porãve hag̃ua Ñandejárape”.
10. Mbaʼépa ñanemomýita japredikave hag̃ua?
10 Jahayhu Jehovápe ha jajerovia hese. Jehová ningo oipota japredika, upévare ñande ñamombaʼeterei ko tembiapo ha jaikuaa ndaijojahaiha. Koʼẽrõitéma Jehová ohundíta ko múndo aña ha umi ojeroviáva hese añoite ojesalváta (Rom. 10:13). Jahayhúramo chupe ñande pyʼaite guive ha jaagradese opa mbaʼe ojapóva ñanderehehápe katuete ñanekyreʼỹvéta japredika hag̃ua, Jesucristo heʼi haguéicha (Mat. 28:19, 20; 1 Juan 5:3). Avei jahechakuaáramo ñaimeha ára pahápe ñañehaʼãmbaitéta jajapo opa ikatúva japredika hag̃ua, jaiko rangue ko múndo oikuaveʼẽva rapykuéri (1 Cor. 7:29-31).
11. Mbaʼépa jajapovaʼerã ojeʼéramo ñandéve: “Ndehegui ningo ikatu oiko prekursór”?
11 Jehová organisasión ñanemokyreʼỹ jajapo hag̃ua ñande prekursorádo, upéicharamo jepe ndahaʼéi upe haguérente jajapótava, síno jahayhúgui Ñandejárape. Upévare ojeʼéramo ñandéve: “Ndehegui ningo ikatu oiko prekursór!”, ñapensavaʼerã ikatúpa jajapo ha ñañemboʼe Jehovápe. Upéicha javyʼáta ñamoirũvo umi prekursór ombaʼapo kyreʼỹvape ko tembiapo porãite asýpe.
[Nóta oĩva taʼanga ndive páhina 4]
Ha peẽ tuvakuéra, mbaʼépa pejapo pemokyreʼỹ hag̃ua pene famíliape ojapose hag̃ua iprekursorádo?
[Nóta oĩva taʼanga ndive páhina 5]
Jehová ningo oipota japredika, upévare ñande ñamombaʼeterei ko tembiapo ha jaikuaa ndaijojahaiha.