Ñañepyrũ estúdio vívliko óga rokẽtéme ha jaiporúvo teléfono
1, 2. Mbaʼéichapa ikatu jajapo avei peteĩ estúdio ikatu hag̃uáicha ñaipytyvõ umi hembiapoitereívape?
1 Koʼág̃a heta tapicha oĩ hembiapoitereíva. Upéicharõ jepe, oĩ heta ohenduséva umi mbaʼe espirituál. Mbaʼéichapa ikatu ñaipytyvõ chupekuéra ohupyty hag̃ua pe oikotevẽva espiritualménte? (Mat. 5:3.) Oĩ heta puvlikadór ikatúva omoñepyrũ peteĩ estúdio pe óga rokẽtéme, térã oiporúvo teléfono. Ikatúnepa nde avei rejapo upéicha ha reipytyvõ hetave tapichápe?
2 Ñamoñepyrũ hag̃ua peteĩ estúdio tekotevẽ jajeprepara ikatu hag̃uáicha oimehápe jahechauka mbaʼéichapa ojejapo pe estúdio. Mbaʼéicha ha moõpa ikatu upéva jajapo?
3. Mbaʼérepa iporã jahechauka pe estúdio pe primera visítape, ha mbaʼéichapa ikatu jajapo upéva?
3 Óga rokẽtéme. Rejuhúramo peteĩ tapicha oñemongetaséva Ñandejára Ñeʼẽgui, remoñepyrũntemavaʼerã peteĩ párrafo repreparavaʼekue. Ikatu reiporu pe folléto Mbaʼépa ojerure, leksión 1, párrafo 1. Elee pe párrafo, ehecha pe porandu hesegua, ha pehecha peteĩ térã mokõi téysto vívliko. Upéva ikatu ojejapo pe óga rokẽtéme cinco térã diez minútope. Pe óga jára oñemongeta kyreʼỹramo nendive, eporandu chupe arakaʼépa ikatúta pehechave peteĩ térã mokõi párrafo pe follétogui. (Oĩve suherénsia ohechaukáva mbaʼéichapa ikatu ñamoñepyrũ peteĩ estúdio upeichagua Nuestro Ministerio del Reino enero 2002-pe, páhina 6).
4. Mbaʼéichapa ikatu ñamoñepyrũ peteĩ estúdio vívliko pe óga rokẽtéme jajapo jave peteĩ rrevisíta?
4 Upeichaite ikatu jajapo avei ñamoñepyrũ hag̃ua peteĩ estúdio ñande rrevisítape. Ikatu rehechauka pe folléto Mbaʼépa ojerure ha reñeʼẽ Ñandejára réragui. Upearã ikatu reiporu leksión 2, párrafo 1 ha 2. Reho jey vove rehechaukakuaa mbaʼépa heʼi Ñandejára Ñeʼẽ umi kualida Jehová oguerekóvagui, ha reiporukuaa párrafo 3 ha 4. Upéi, reho jeývo, ikatu peñemongeta párrafo 5 ha 6-gui, ha reiporu pe taʼanga oĩva páhina 5-pe, rehechauka hag̃ua mbaʼéichapa pe estúdio vívliko ñanepytyvõ jaikuaa hag̃ua Jehovápe. Umíva ikatu jajapopa pe óga rokẽtéme.
5, 6. (a) Mbaʼérepa oĩ tapicha ostudiasevétava pe teléfono rupive? (b) Mbaʼéichapa ikatu jajapo ñamoñepyrũ hag̃ua upéicha peteĩ estúdio?
5 Jaiporúvo teléfono. Oĩ umi tapicha ikatúva ostudiase teléfono rupive, ostudiarangue hógape. Ko eysperiénsia ohechauka upéva: Opredika aja ogaha rupi peteĩ ermána oikuaa peteĩ kuñáme. Haʼe imitã gueteri péro imembýma ha ombaʼapoiterei. Pe ermána ndojuhuvéi rire hese hógape, ohenói chupe iteléfonope. Pe kuña heʼi añetehápe ndohupytyiha chupe itiémpo oñemongeta hag̃ua hendive Ñandejára Ñeʼẽgui. Pe ermána heʼi upémaramo: “Diez térã quince minútope reikuaáta umi mbaʼe ipyahútava ndéve, ha upearã ikatu ñañeʼẽ ko teléfono rupive”. “Upéicharamo, chéve g̃uarã oĩ porãta”, heʼi chupe pe kuña. Ndaʼaréi ohasa ha pe ermána ostudia meméma hendive pe teléfono rupive.[1]
6 Oĩnepa umi nde rrevisíta apytépe umi ostudiasétava pe teléfono rupive? Ikatu rejapo ojeʼeháicha yvate, térã ikatúnte ere: “Ndegustáramo, ikatu ñañemongetave Ñandejára Ñeʼẽgui ko teléfono rupive. Oĩ porãvétapa ndéve jajapórõ upéicha?” Ñañehaʼãramo jajapo peteĩ estúdio vívliko ñande rapicha ikatuháicha, ñaipytyvõta chupekuéra ‘ojuhu hag̃ua Ñandejára kuaapy’ (Pro. 2:5; 1 Cor. 9:23).
[DO NOT SET] References
1. yb05 pp. 57-8.