Carta de la Sucursal

Ore irũnguéra puvlikadorkuérape g̃uarã:

Ko áño ohasavaʼekuépe jahecha oikohague heta mbaʼe porã ko ñane retãme. Oñepyrũ mokõi sirkuíto guaraníme, ojejapo asambléa guaraníme, ha jaguerekóma avei puvlikasión pyahu ñane ñeʼẽme. Iñimportanteterei pe prográma ojejapovaʼekue ojegueraha hag̃ua eskuelakuérape ñande lívro Ñaaprende Mboʼehára Guasúgui. Og̃uahẽ oréve heta eysperiénsia iporãitereíva, hetave pe rohaʼarõvaʼekuégui.

Oĩ heta mboʼehára oguerohorýva ko tembiapo. Peteĩ mboʼehára, oagradesévo ko lívrore heʼi oiporutaha hikuái “ndahaʼéi ojelee hag̃ua guaranímente, síno espesialménte romboʼe hag̃ua umi mitãme mbaʼéichapa heko porã vaʼerã ha mbaʼéichapa ohekavaʼerã umi mbaʼe espirituál”. Peteĩ direktóra heʼi: “Roagradese peẽme penemanduʼahaguére ore eskuélare, ha pegueruhaguére oréve peteĩ mbaʼe iñimportantetereíva, oipytyvõ tuichátava ore mitãnguérape. Pene relihión añoite oikuaveʼẽ oréve koʼãichagua mbaʼe orepytyvõ hag̃ua”. Jehová vendisión rupive, heta tapicha gueteri oikuaáta iñeʼẽtéme pe añetegua oúva ichugui.

Okakuaágui ko tembiapo oñembotuichavemantevaʼerã pe Hogar Betel. Koʼerõitéma oñepyrũta ko tembiapo guasu.

Iporãiterei avei pe tembiapo oñemopuʼã hag̃ua umi Salón del Reino pyahu. Ko áño 2005-pe ojejapóma 7 Salón del Reino, ipyahuetéva térã oñembopyahúva, ha upévape oipytyvõ pe Grupo de Construcción de Salones del Reino.

Koʼã mbaʼe ojehupyty pejepytasógui kyreʼỹme orendive ha peipytyvõgui avei pene kontrivusión reheve ojejapo hag̃ua ko tembiapo Ñandejára Rréino rehegua. Roguerohory opavavetépe ore pyʼaite guive pe tembiapo porã pejapóvare koʼã ára paha ijetuʼúvape. Tove Jehová tovendesi meme ñane rembiapo jaservi hag̃ua ichupe! (Efe. 1:12).

Pene ermanokuéra,

Comité de Sucursal