Umi mbaʼe jahechátava ñane asambléa de sirkuítope

Jehovápe añoite niko ñamombaʼeguasuvaʼerã. Upévare, mbaʼéichapa ikatu ñamombaʼeguasu chupe? Mbaʼe ijetuʼúvapa ombohovaivaʼerã ñane ermanokuéra oñehaʼãva omombaʼeguasu Jehovápe? Mbaʼépa ohupyty umi omombaʼeguasúva Ñandejárape koʼág̃a? Umi mbaʼe jahechátava ñane asambléa de sirkuíto 2008-pe ombohováita koʼã porandu. Ko ñande aty guasu hérata: ‘Opa mbaʼe jajapóvape ñamombaʼeguasu Ñandejárape’ (1 Cor. 10:31). Jahechamína mbaʼépa ñanemboʼéta Ñandejáragui ñande aty guasu koʼã mokõi ára.

Pe superintendénte de distríto omoakãta Eskuéla dél Ministério Teokrátiko ha omeʼẽta avei koʼã diskúrso: “Mbaʼérepa ñamombaʼeguasuvaʼerã Ñandejárape?”, “Jajapo iporã hag̃uáicha umi mbaʼe Jehová ojeruréva ñandehegui”, ha pe diskúrso púvliko katu “Mávapa umi omombaʼeguasúva Ñandejárape koʼág̃a?”, ha avei pe diskúrso ipahaitepegua “Ñamombaʼeguasu Ñandejárape peteĩ ñeʼẽme ko Yvy tuichakue javeve”. Pe superintendénte de sirkuíto katu omeʼẽta mbohapy diskúrso: “Javyʼákena jahechaukávo ñamombaʼeguasuha Ñandejárape”, “Jahechami mbaʼépepa ñambaʼapovevaʼerã” ha “Jasegíkena ‘japyta hatã ko añeteguápe’”, kóva oñeguenohẽ 2 Pedro 1:12-gui [JMP]. Jaikuaáta avei mbaʼérepa “Ñande prekursorádo rupi ñamombaʼeguasu Ñandejárape”. Oĩta avei mokõi simpósio iporãitereíva. Pe ñepyrũgua: “Ñamombaʼeguasu Ñandejárape opa mbaʼe jajapóvape”, kóvape oñehesaʼỹijo porãta heʼíva 1 Corintios 10:31. Pe mokõiha katu: “Jaservi Jehovápe ñande pyʼaite guive ñamombaʼeguasu hag̃ua chupe”, oñeʼẽtava opa mbaʼe jajapóvare jaservívo Ñandejárape. Domingo katu oñehesaʼỹijóta Ñemañaha ha pe téysto káda diagua. Oĩta avei ojevautisáva.

Heta oĩ ñande rapicha ndoikuaaséiva mbaʼeve Ñandejáragui. Oñehaʼã hikuái umi mbaʼe ojapótavarente ha ndohechakuaái mbaʼeichaitépa Jehová imarangatu (Juan 5:44). Ñande katu jahechakuaa tekotevẽha jaikuaa mbaʼéichapa ikatu ‘opa mbaʼe jajapóvape ñamombaʼeguasu Ñandejárape’. Upévare ñañembosakoʼímakena ñaime hag̃ua mokõive ára ko ñande aty guasúpe.