Prográma ñane asambléa de sirkuítope g̃uarã

Mbaʼépa ikatu jajapo ani hag̃ua ñanemokangy umi oñemoĩva Ñandejára organisasiónre? Mbaʼéichapa ikatu ñandepuʼaka umi ojapoukasévare ñandéve mbaʼe vai? Pe prográma asambléa de sirkuíto 2009-pe g̃uarã ombohováita koʼã porandu iñimportantetéva. Ko asambléa héra ‘Ñandepuʼakákena ivaíva rehe iporãvape’, oñeguenohẽva Romanos 12:21-gui. Jahechamína mbaʼépa ñaneraʼarõ ko ñande aty guasúpe.

Superintendénte de distríto omeʼẽta koʼã diskúrso: “Ñañembokatupyrýkena ñandepuʼaka hag̃ua ivaíva rehe iporãvape”, “Aníkena jajeroviaiterei ñandejehe”, “Koʼẽrõitéma opáta opa mbaʼe vai” ha “Ñamombaretevaʼerã ñande jerovia ñambohovái hag̃ua ko múndope”. Superintendénte de sirkuíto katu omeʼẽta koʼã diskúrso: “Ñañatende porã vaʼerã koʼág̃a rupi”, upearã ojeporu Romanos 13:11-13, ha ótro diskúrso héra “Aníkena ñanekangy jahasa jave umi mbaʼe ijetuʼúva”, upearã ojeporu Proverbios 24:10. Ñahendusetereíma avei mbaʼépa ojeʼéta ñandéve pe párte héravape “Jahechami mbaʼépepa ñambaʼapovevaʼerã ñande sirkuítope”. Ótro diskúrso iporãitereítava avei haʼe “Jajapomína prekursorádo japredikave hag̃ua”. Umi mokõi simpósio oñemeʼẽtava ñepyrũrã héra “Ñapyrũ mbaretékena ani hag̃ua Satanás ñandereity iñuhãme”. Kóva ñanepytyvõta jahechakuaa hag̃ua Satanás ñuhã ha jajere hag̃ua chugui. Haʼe ningo oiporukuaaʼimi umi vyʼarã, umi estúdio ijyvatevéva, téle, komputadóra ha selulár ñanemoñuhã hag̃ua. Ha pe simpósio hérava ‘Ñañemombaretevékena “jagueropuʼaka hag̃ua umi mbaʼe vai” Satanás oiporúva ñande reity hag̃ua’, ñanemokyreʼỹta jajapo porãve hag̃ua Efesios 6:10-18 heʼíva ñandéve.

Japredika kyreʼỹramo ñandepuʼaka porãta umi mbaʼe vai rehe (Rev. 12:17). Upévare voi ningo Satanás ojopy mbarete hína testigos de Jehovápe! (Isa. 43:10, 12.) Péro oñehaʼã reietéta, ñande ningo ñañehaʼã meméta ‘ñandepuʼaka ivaíva rehe iporãvape’. Jajapókena opa mbaʼe tekotevẽva ñaime hag̃ua umi dos día ñande aty guasuhápe ha ñahendupaite hag̃ua umi párte oñemeʼẽtava.