Ñandejára siervokuérape oñemeʼẽ oikotevẽva
1. Mbaʼépa oñepyrũ áño 1938-pe, ha maʼerãpa ojejapo upéva?
1 Áño 1938 guive Jehová organisasión omoñepyrũ peteĩ aty guasu oñehenóiva “asamblea de zona” (koʼág̃a hérava aty guasu dos diagua), ijatyhápe heta kongregasión. Maʼerãpa ojejapo ko aty? Ñane Marandu Porã enero de 1939 ingléspe (upérõ héra Informador) heʼivaʼekue: “Koʼã aty guasu ningo Jehová omeʼẽ iñorganisasión rupive, ikatu hag̃uáicha oñemotenonde predikasión. Ha umi mboʼepy oñemeʼẽva upépe oipytyvõ porãiterei entéro ojaposévape hekopete ko tembiapo”. Áño 1938-pe oĩvaʼekue 58.000 testígonte, ha áño 2009-pe katu 7.000.000 árima. Koʼã aty guasu tuicha oipytyvõ umi kristiánope ojapo hag̃ua “hekopete ko tembiapo”.
2. Mbaʼe mbaʼe rehépa oñeñeʼẽta ñande aty guasu dos diagua 2011-pe?
2 Aty guasu dos diagua 2011. Ajépa jaipotaitéma og̃uahẽ ñande aty guasu dos diagua ojejapótava 2011-pe! Upéva ñanemokyreʼỹetereíta jasegi hag̃ua ñambaʼapo Jehová servísiope. Ko aty omopyenda Juan 15:19, upépe heʼi: ‘Peẽ ndahaʼevéima ko mundopegua’. Mbaʼe rehépa oñeñeʼẽta umi diskúrsope? Sábado ojehechaukáta mbaʼéichapa ñanepytyvõ jaservívo Jehovápe de tiémpo kompléto. Avei oĩta peteĩ simpósio oguerekóva mbohapy diskúrso, koʼãva ohechaukáta mbaʼérepa ndajahejaivaʼerã ñanembyai ‘pe mymba ñarõ’, “kuña rekovai” ni “komersiantekuéra yvy arigua”. Domingo avei oĩta ótro simpósio ñanemokyreʼỹtava jahayhuve hag̃ua Jehovápe, jahayhu rangue ko múndo. Avei oñemombeʼúta ñande haʼeteha tetã ambuegua ha jaikokuaavaʼerãha, avei tekotevẽha ñandepyʼaguasu jagueropuʼaka hag̃ua ko múndo.
3. Mbaʼéichapa ñanepytyvõta ñande aty guasu dos diagua?
3 Pór ehémplo peteĩ ermánagui ikangy ijerovia ha saʼive ombaʼapo Jehová servísiope. Haʼe omombeʼu peteĩ aty guasu dos diagua, ndaʼareiete ojejapovaʼekue oipytyvõ hague chupe. Ohai: “Ko aty guasu rupive ajedesidi asẽ meme hag̃ua predikasiónpe”. Katuete pe aty guasu dos diagua ojejapótava 2011-pe ñanepytyvõta jahechauka hag̃ua jahayhuha Jehovápe, ko múndope rangue (1 Juan 2:15-17). Eñehaʼãmbaitékena eime upépe ha ejapysaka porã, ikatu hag̃uáicha ideprovécho ndéve ha rembaʼapo porã Jehovápe g̃uarã.