Jaiporu porãpa ñaína?
1 “Aiporusetereíma ningo predikasiónpe!” heʼi peteĩ ermána olee rire La Atalaya 1 de enero de 2008. Pe oñeguenohẽva opavave tapichápe g̃uarã ningo oreko heta mbaʼe iporãitereíva. Rehechámapa? Reikuaápa mbaʼéichapa ikatu reiporu porãve repredika jave?
2 “Enseñanzas de Jesús.” Ko párte ikatu jaiporu ñañepyrũ hag̃ua jastudia la Biblia ñande rapichándi. Ikatu jajapo péicha: jalee pe título ha upe rire jahechauka Jesús heʼivaʼekue, oñemoĩva pe párrafo únope. Jahechakuaáramo pe tapicha oikuaaseveha, jaiporu umi porandu oñemoĩva subtítuloramo. Ñaporandu pe tapichápe mbaʼépa opensa upévare. Jaiporukuaa avei umi taʼanga oñeʼẽva upe témare ha ñamyesakã porã. Upéi jahasa pe ótro párrafope. Péicha ikatu ñahesaʼỹijo alamita peve ñande rapichándi ha upéi jaha jey ñahesaʼỹijopa hag̃ua hendive. Ha jaha jey vove japreparamavaʼerã pe lívro Mbaʼépa omboʼe la Biblia? jastudia hag̃ua hendive upéva.
3 “Consejos para las familias.” Ko párte osẽ káda tres mése. Ha oipytyvõta ména, tembireko ha taʼyrakuérape ojapo hag̃ua Ñandejára oipotaháicha oĩ jave provléma ogapýpe. Ko párte oipytyvõkuaa avei umi ndahaʼéivape Testígo ohechakuaa hag̃ua mbaʼeichaite pevépa la Biblia ñanepytyvõ (2 Tim. 3:16, 17).
4 “El rincón del joven.” Ko párte omokyreʼỹ umi mitãrusu ha mitãkuñáme ohesaʼỹijo hag̃ua umi mbaʼe Ñandejára Ñeʼẽme oĩva, ha avei omombeʼu hag̃ua hikuái mbaʼépa opensa hese. Ikatu avei jaiporu jahechauka hag̃ua umi mitãrusu ha mitãkuñáme iñimportantetereiha jastudia Ñandejára Ñeʼẽ (Sal. 119:9, 105). Tuvakuérape katu ikatu jahechauka pe párte “De padres a hijos”, osẽva káda dos mése. Upéva oipytyvõta chupekuéra ohekomboʼe porã hag̃ua ifamíliape Ñandejára Ñeʼẽgui. Rehesaʼỹijómapa ko párte ne famíliandi?
5 Ambue mbaʼe orekóva. Káda més pe párte heʼihápe “Nuestros lectores quieren saber”, oñehesaʼỹijo umi mbaʼe oñeporandúva jepi umi ndahaʼéiva Testígo. Ko párte jaiporukuaa japredika jave ogaha rupi. Pe párte heʼihápe “Carta de...” oñemombeʼu ñane ermanokuéra ohasavaʼekue opredika jave. Umíva oipytyvõta ñande rapichakuéra ipyʼaporãvape ohecha hag̃ua pe marandu porã ojepredikaha oparupiete. Ha upéicha oñekumpliha Ñandejára Ñeʼẽ heʼíva (Mat. 24:3, 14).
6 Oñemokyreʼỹ umi tapicha ipyʼaporãvape oikuaave hag̃ua Jehovápe oleévo pe párte heʼíva “Acérquese a Dios”, oñenohẽva pe jaleévagui Eskuéla del Ministério Teokrátikope. Pe párte hérava “Ejemplos de fe”, osẽ cuatro vése un áñope. Upéva ojejapo umi hénte ohechakuaa hag̃ua mbaʼéichapa oikovaʼekue umi personáhe oĩva la Bíbliape, umi mbaʼe ohasavaʼekue hikuái ha mbaʼéichapa ohechauka ojeroviaha Ñandejárare.
7 Ajépa javyʼaite jareko haguére La Atalaya jaiporu hag̃ua japredika jave! Upévare ñañehaʼãkena jaleepaite ha péicha jaiporu porã hag̃ua.