Peteĩ artíkulo ñanepytyvõva ñandekatupyryve hag̃ua predikasiónpe
1. ¿Maʼerãpa ojeprepara pe artíkulo hérava: “Peteĩ testígo de Jehová oñemongeta ivesínondi”?
1 Ñemañaha púvlikope osẽ jepi peteĩ artíkulo hérava: “Peteĩ testígo de Jehová oñemongeta ivesínondi”. Ko artíkulo ojeprepara ñanepytyvõ hag̃ua mokõi mbaʼépe: ñapresenta hag̃ua la Biblia omboʼéva ogusta hag̃uáicha umi héntepe ha jaikuaa hag̃ua mbaʼéichapa ñambohovái vaʼerã umi mbaʼe oñeporandúva ñandéve (1 Ped. 3:15). Jahechamína mbaʼéichapa ikatu jaiporu porã koʼã artíkulo.
2. ¿Mbaʼéichapa ikatu jaiporu koʼã artíkulo predikasiónpe?
2 Ideprovécho predikasiónpe. Sapyʼánte ningo ñane estudiánte, umi hénte territoriopegua térã umi oikuaasevéva la Biblia omboʼéva, ñaneñeʼẽjokose térã ombaʼeporandu ñandéve. Péicha jave ikatu jaiporu koʼã artíkulo oiméramo ombohovái pe porandu ojapóva ñandéve hikuái, upearã ikatu ñaikuaveʼẽ chupe pe rrevísta térã ñahesaʼỹijo voi hendive pe párte. Upévare, iporãta ñañongatu umi Ñemañaha osẽ haguépe koʼã artíkulo. Péro ndajarekóiramo, ikatu ñamboguejy ñande sítio jw.org oĩvagui Internétpe.
3. ¿Mbaʼéichapa ikatu ñahesaʼỹijo ko artíkulo umi héntendi?
3 ¿Mbaʼéichapa ikatu ñahesaʼỹijo ko artíkulo umi héntendi? Oĩ maranduhára olee hatãva umi mbaʼe heʼíva pe Testígo ha ojerure pe ogajárape olee hag̃ua pe ótro heʼíva. Ojehechakuaa ningo péicha ñamyesakãramo umi mbaʼe jagueroviáva umi hénte ñanerendu porãveha (Deut. 32:2).
4. ¿Mbaʼépa ikatu ñaaprende koʼã artíkulogui?
4 Ideprovécho ñaaprende ha ñaporomboʼe hag̃ua. Jaleévo koʼã artíkulo ñañatende vaʼerã mbaʼéichapa pe maranduhára oñeʼẽ, oiporu umi téxto ha ehémplo omyesakã hag̃ua peteĩ informasión pe ogajárape. Upéi, ñande avei ñañehaʼã vaʼerã ñaporomboʼe upéicha (Prov. 1:5; 9:9). Peteĩ ermána heʼi: “Jaleévo koʼã artíkulo haʼete voi hína jahecháva peteĩ prekursór ‘ivaletereívape oporomboʼe hag̃ua’, ha oikuaáva voi mbaʼépa heʼíta oñeporandu jave chupe peteĩ mbaʼe”.
5. ¿Mbaʼéichapa ikatu jaiporu koʼã artíkulo ñaipytyvõ hag̃ua ñane estudiántepe osẽ hag̃ua predikasiónpe?
5 Koʼã artíkulo ideprovécho avei ñaipytyvõ hag̃ua ñane estudiantekuérape osẽ hag̃ua predikasiónpe. Upearã ikatu jaleeka chupekuéra pe maranduhára heʼíva. Koʼã ehémplo oipytyvõta chupekuéra oikuaa hag̃ua mbaʼéichapa omyesakã vaʼerã umi mbaʼe ogueroviáva omoñeñandu vaiʼỹre umi ogajárape (Col. 4:6). Péicha jahecha Jehová omeʼẽha ñandéve ko artíkulo jajapo hag̃ua ñane rembiapo hekoitépe (2 Tim. 4:5).