Artíkulo pyahu ñanepytyvõtava ñamoñepyrũ hag̃ua estúdio
1. Mbaʼe párte pyahúpa osẽta La Atalaya púvlikope, ha mbaʼépepa ñanepytyvõta?
1 Enero guive osẽta La Atalaya púvlikope peteĩ párte pyahu ñanepytyvõtava ñamoñepyrũ hag̃ua estúdio vívliko. Itéma hína “Enseñanzas de la Palabra de Dios”. Jaikuaa heta hénte oleesetaha ko artíkulo, péro añetehápe ojejapo ñande ñahesaʼỹijo hag̃ua hendivekuéra.
2. Mbaʼe mbaʼépa oĩta pe artíkulope?
2 Mbaʼépa oĩta ipype. Pe título ha umi subtítulope oñemoĩta peteĩ porandu, ikatu hag̃uáicha ñahesaʼỹijo pe ogajárandi. Noñemoĩri mbaʼépa heʼi umi téysto iñimportantevéva, omombeʼúnte mbaʼe téystopa jahekavaʼerã ikatu hag̃uáicha pe ogajárape og̃uahẽve oleévo la Bibliaitépe voi. Ha umi párrafo mbyky rupi ikatúta jastudia ñande rapichándi ñañemongeta ypy guive hendive. Avei ko artíkulo omombeʼu mbaʼe pártepa ikatu jatopave informasión lívro Mbaʼépa omboʼe la Biblia?-pe. Péva ñanepytyvõta ñañepyrũ hag̃ua jastudia hendive upe lívro.
3. Mbaʼéichapa ikatu jaiporu pe artíkulo pyahu ñamoñepyrũ hag̃ua estúdio vívliko?
3 Mbaʼéichapa jaiporuvaʼerã ko artíkulo. Ñaikuaveʼẽvo ñande rrevistakuéra ikatu ñaporandu pe ogajárape peteĩ mbaʼe oikuaasevétava ha oñemyesakãtava chupe pe artíkulope. Pór ehémplo, La Atalaya 1 de eneropegua omombeʼu mbaʼeichaitépa ideprovécho la Biblia. Ha ikatu jaʼe: “Ndépa reguerovia la Biblia haʼeha Ñandejára Ñeʼẽ, térãpa peteĩ lívro porãnte? [Ehaʼarõ tombohovái.] Ape agueru peteĩ rrevísta oñeʼẽva upe témare”. Ehechauka chupe pe primer porandu, elee párrafo uno ha eheka umi téysto oñemoĩva upépe. Upéi elee jey pe porandu ha ejerure chupe tombohovái. Natekotevẽi ningo rehesaʼỹijopaite voi hendive pe artíkulo, mbeguekatúnte ehesaʼỹijo hendive umi porandu. Resẽ mboyve upégui ere pe ogajárape rehose jeyha hendápe ha eporandu chupe arakaʼépa ikatúta peñemongetave. Eñehaʼãkena eho káda semána rehesaʼỹijove hag̃ua hendive pe artíkulo, og̃uahẽ meve ambue rrevísta pyahu. Térã ikatu avei reikuaveʼẽntema chupe peteĩ estúdio vívliko, ha eiporu pe artíkulo rehechauka hag̃ua mbaʼéichapa ojejapo upéva.
4. Mbaʼéichapa ikatu jaiporu ko artíkulo pyahu jaha jeývo javisita ñande rapichápe?
4 Ko artíkulo pyahu ñanepytyvõta avei jaha jey vove jagueraha rrevísta umi ohejávape jepi voi ha umi ohendu porã vaʼekuépe. Ikatu jaʼe: “Oĩ peteĩ artíkulo pyahu ko rrevístape. Tahechaukamína ndéve mbaʼe rehépa oñeʼẽ”. Hiʼãite Jehová ohovasa ko artíkulo pyahu ikatu hag̃uáicha hetave ñande rapicha “oikuaa pe añetegua” (1 Tim. 2:4).