Ñañembosakoʼíkena Conmemoracionrã

Tuicha mbaʼe ningo ñandéve g̃uarã Jesucristo omano haguére ñanderehehápe, upévare koʼág̃a guive ñañembosakoʼimavaʼerã jagueromanduʼa hag̃ua upéva (Luc. 22:19). Mbaʼe mbaʼépa jahechavaʼerã og̃uahẽ mboyve Conmemoración?

◼ Mbaʼe óra ha moõtapa. Enterove oikuaavaʼerã mbaʼe óra ha moõpa ojejapóta pe Conmemoración. Iñimportánte ñag̃uahẽ voi porã ha trankílo porãnte ñasẽ opa rire. Koʼýte oĩramo ótra kongregasión oiporútava avei pe Salón del Reino. Aníkena jajoʼapa pe okẽme, okápe térã estasionamiéntope.

◼ Invitasión. Oñemeʼẽvaʼerã voimi reheve umi invitasión ermanokuérape ikatu hag̃uáicha olee ha oñensajáma mbaʼéichapa ojapóta oporoinvita hag̃ua. Ñapensamavaʼerã máva mávapepa ñainvitáta ha ñañehaʼã ñameʼẽmbaite umi invitasión jaguerekóva.

◼ Oiméramo ñande mbaʼyru. Jahechavaʼerã ñane ermanokuéra térã umi ñainvitávape noiméipa oikotevẽ jagueru chupekuéra Conmemoracionhápe. Avei mbaʼépa oikotevẽ hikuái ou hag̃ua ha ñañehaʼãmbaite ñaipytyvõ chupekuéra.

◼ Pán ha víno. Ansianokuéra, peñatendevaʼerã ani oñembohasa pán ha víno Kuarahy oike mboyve. Ojehechavaʼerã avei mbaʼéichapa ojejapóta ojeservi hag̃ua umi ungido hasykatúvape ha ndaikatumoʼãivape ou Conmemoracionhápe. Avei ojehechamavaʼerã pe pán ha víno ojeporútava (ojehechakuaa La Atalaya 15 de febrero de 2003, páhina 14 ha 15, párrafo 14 ha 17).

◼ Salón del Reino. Voimi reheve oñemopotĩ porã vaʼerã pe Salón ojeporútava Conmemoracionrã ha ojehechamavaʼerã umi pláto, kópa, mesa ha mantél ojeporútava. Ojejapótarõ ótro hendápe ojehechavaʼerã oiko porãpa pe ekípo, ikatu hag̃uáicha opavave ohendu porã pe diskúrso. Ojehechamavaʼerã avei mávapa ombohasáta pe pán ha víno ha mávatapa akomodadór upe pyharépe. Oñemombeʼuvaʼerã chupekuéra voi porã mbaʼépa ojapóta ha mbaʼérepa oñemonde porã vaʼerã.

Jesús omanoha ára ningo iñimportanteterei jagueromanduʼa, upévare ñañembosakoʼimavaʼerã ñande voi ha opavave oĩva ñane kongregasiónpe. Katuete ningo Jehová ñanderovasáta jahechaukáramo ñamombaʼeha Haʼe ha Itaʼýra ojapovaʼekue ñanderehehápe.