Aty Ñanemboʼéva Japredika Hag̃ua

1. Maʼerãpa ojejapo pe Aty Ñanemboʼéva Japredika Hag̃ua? Ha mbaʼépa jajapovaʼerã ñandekatupyryve hag̃ua?

¹ Ñande ningo ñasẽ ñamyerakuã oparupiete pe marandu porã, ñaipytyvõ ñande rapichakuérape oservi hag̃ua Ñandejárape ha ñamombeʼu koʼẽrõitéma umi hénte aña oñehunditaha. Pe Aty Ñanemboʼéva Japredika Hag̃ua ñanembokatupyry jajapo hag̃ua hekoitépe ko tembiapo (Mat. 28:20; Mar. 13:10; 2 Ped. 3:7). Péro upearã ñañembosakoʼi porã vaʼerã ikatu hag̃uáicha ñakomenta.

2. Mbaʼéichapa ikatu ñañembosakoʼi ñahendu mboyve peteĩ diskúrso?

² Diskúrso. Ojejapóta jave peteĩ diskúrso oñemoĩ jepi moõguipa oñeguenohẽ pe informasión ikatu hag̃uáicha ñañembosakoʼi jaha mboyve rreunionhápe. Mbaʼéichapa ikatu jajapo upéva? Pór ehémplo jahechakuaa pe informasión, jalee umi téysto ha ñapensa mbaʼéichapa ikatu jaiporu japredikáta vove.

3. Mbaʼépa ikatu jajapo oĩ jave porandu ñambohovái hag̃ua?

³ Oĩ jave porandu ñambohovái hag̃ua. Pe ermáno ojapóva ko párte oñeʼẽ mbykymi oñepyrũ hag̃ua ha omohuʼãnguévo. Upéi ojapo Ñemañaha Ñehesaʼỹijo ojejapoháicha. Ñañembosakoʼívo ko parterã ikatu ñamarka umi mbaʼe iñimportantevéva káda párrafope ha upe rire ñakomenta mbykymi.

4. Mbaʼéichapa ikatu ñañembosakoʼi ojejerure jave ñakomenta hag̃ua?

⁴ Ojejerure jave ñakomenta hag̃ua. Ojejapo peteĩ diskúrso ojejapoháicha, péro pe ermáno oporandúta umi párte tekotevẽva oñemyesakã oñentende porãve hag̃ua pe téma. Upévare ñamarkavaʼerã umi párte iñimportantevéva ha jaheka umi téysto ikatu hag̃uáicha ñakomenta.

5. Mbaʼépa jajapovaʼerã oĩta vove peteĩ demostrasión?

⁵ Demostrasión. Oĩ párte ojejapoha demostrasión ojechauka hag̃ua mbaʼéichapa ikatu jaiporu predikasiónpe umi informasión oñehesaʼỹijóva. Ojejerure jepi peteĩ ansiáno, prekursór térã ermáno ikatupyrývape ohechauka hag̃ua upéva. Ñañembosakoʼívo pe demostrasionrã, ikatúma ñapensa mbaʼéichapa ojejapóta. Ha ñaimévo ñande atýpe ikatu ñapensa mbaʼépa jaʼéta ág̃a predikasiónpe ha mbaʼéichapa jaiporúta upe informasión. Aníkena ñanderesarái jagueraha hag̃ua pe puvlikasión ojeporútava. Ha ág̃a jajapóvo ñande estúdio de família ikatu ñañensaja oñondivepa.

6. Mbaʼérepa iñimportánte ñañembosakoʼi jaha hag̃ua Aty Ñanemboʼéva Japredika Hag̃uáme?

⁶ Javyʼave ningo ñande Aty Ñanemboʼéva Japredika Hag̃uáme ñañembosakoʼi porãramo jaha mboyve. Ha ñaimévo upépe katu ñañomokyreʼỹve (Rom. 1:​11, 12). Upéicharõ, ñamboykékena ñane tiémpo ñañembosakoʼi porã hag̃ua ha péicha ñandekatupyryvéta opaichagua tembiapo porãme (2 Tim. 3:17).