Oparupiete ñasẽta ñaporoinvita Conmemoracionrã!
1. Mbaʼépa jajapóta oparupiete Conmemoración mboyve?
1 ‘Pesegíkena pejapo kóva penemanduʼa hag̃ua cherehe.’ (Luc. 22:19, NM.) Ñakumpli hag̃ua ko mbaʼe Jesús ohejavaʼekue, ñande testígo de Jehová ha ambue tapichakuéra ñañembyatýta ág̃a 30 de marzo 2010-pe jagueromanduʼa hag̃ua Jesús omano hague ára. Ha ág̃a 13-30 de marzo ñasẽta ñamosarambi peteĩ invitasión oparupiete ko yvy ape ári.
2. Mbaʼépa ikatu jaʼe ñameʼẽnguévo pe invitasión?
2 Mbaʼéichapa jajapóta. Ikatu jahechauka ogajárape pe taʼanga oĩva ko invitasión rehe, ha jaʼe: “Ág̃a 30 de marzo pyharépe hetaiterei tapicha oparupiete ko yvy ape ári oñembyatýta ogueromanduʼa hag̃ua Jesús omano hague ára. Ha koʼápe agueru peteĩ invitasión nde ha ne família oho hag̃ua avei ko atýpe. Ha rerekóramo ne amigokuéra reinvitaséva, ikatu avei oho. Ko kuatiápe retopáta mbaʼe óra ha moõpa ojejapóta ko aty”. Ikatúma guive jaleekuaa Lucas 22:19 pe ogajára ohechakuaa hag̃ua Jesús voi oipotaha jajapo upéva. Péro ñanemanduʼáke saʼiha ñane tiémpo ñameʼẽ hag̃ua ko invitasión, upévare iporãve ñañeʼẽ mbykymínte ogajárape.
3. Máva mávapepa ikatu ñainvita?
3 Pende território tuicháramo umi ansiáno ikatu odesidi ojehejátapa umi invitasión ndaipóriramo jepe ogajára. Ha opyta porã jave ikatu ñaikuaveʼẽ rrevistakuéra ñameʼẽnguévo pe invitasión. Ñainvitákena avei ñande rrevisíta, ñane estudiánte, ñane kompañéro de traváho térã kolehiopegua, ñane hénte, ñane vesinokuéra ha mayma jaikuaávape.
4. Mbaʼépa jajapóta jaguerohorýramo Jehová ojapovaʼekue?
4 Jajepreparáke japredikave hag̃ua. Conmemoración tiémpope ningo opyta porãiterei japredikave hag̃ua. Ikatúnepa jajapo precursorado auxiliar? Jarekópa ñane família térã ñane estudiánte ikatúmava osẽ opredika? Upéicharõ ñañembojavaʼerã ansianokuérare ohecha hag̃ua ikatúmapa ñanemoirũ hikuái ñamosarambi hag̃ua ko invitasión porãite. Jaguerohorýgui Jehová ojapovaʼekue ñanderehehápe jaháta katuete ko atýpe, péro avei ñainvitáta opa ikatúvape oho hag̃ua ñanendive (Juan 3:16).