Ág̃a 2 de abril guive ñasẽta ñaporoinvita Conmemoracionrã
1. Arakaʼépa ñasẽta ñaporoinvita Conmemoracionrã? Ou piko umi hénte oñeinvitárõ chupekuéra?
1 Ág̃a 2 de abril guive 17 de abril peve ñasẽta ñainvita umi hénte oĩvape ñande territóriope Conmemoracionrã, ha péicha jagueromanduʼa hag̃ua oñondivepa pe ára iñimportantevéva. Umi áño ohasavaʼekuépe heta hénte ñanemoirũ Conmemoracionhápe, pór ehémplo peteĩ kuñakarai ohenói sukursálpe Conmemoración árape, ha heʼi: “Ag̃uahẽvo che rógape atopákuri peteĩ invitasión che rokẽ guýpe. Ahase, péro ndaikuaaporãi mbaʼe órapa oñepyrũta”. Upémarõ pe rresepsionísta omombeʼu chupe pe invitasiónpe heʼiha voi mbaʼe órapa ojejapóta. Ha pe kuñakarai heʼi: “Aháta ág̃a upéicharõ Conmemoracionhápe!”.
2. Mbaʼépa ikatu jaʼe jahejáta jave pe invitasión?
2 Mbaʼéichapa jajapóta. Saʼi ningo ñane tiémpo ñainvita hag̃ua umi hénte oĩvape ñande territóriope, upévare mbykymínte ñañeʼẽvaʼerã. Ikatu jaʼe: “Mbaʼéichapa. Ahejase ndéve ko invitasión ne famíliape g̃uarã. Ág̃a domingo 17 de abril ojegueromanduʼáta oparupiete peteĩ mbaʼe iñimportantetereíva [emeʼẽ chupe pe invitasión]. Upe árape Jesús omanovaʼekue, upévare ojejapóta peteĩ diskúrso oñeʼẽtava umi mbaʼe porã jahupytýtavare Cristo sakrifísio rupive. Ndojekovramoʼãi entráda. Ko invitasiónpe retopáta moõ ha mbaʼe órapa ojejapóta ko aty”.
3. Mbaʼépa jajapovaʼerã ñainvita hag̃ua opa ikatúvape Conmemoracionrã?
3 Pende território tuicháramo, umi ansiáno odesidivaʼerã ojehejátapa umi invitasión ndaiporihápe ogajára, péro ojehejavaʼerã umi ohasáva ohechaʼỹ hag̃uáme. Ñainvitákena avei ñande rrevisíta, ñane hénte, ñane kompañéro de traváho térã kolehiopegua, ha mayma jaikuaávape. Fín de semanakue katu ñameʼẽnguévo pe invitasión, ñaikuaveʼẽkuaa avei ñande rrevistakuéra. Ha mbaʼépa ere, ikatúnepa reñehaʼãmbaite rejapo nde prekursorádo auxiliar ág̃a Conmemoración tiémpope?
4. Mbaʼérepa jaipotaite ñande rapichakuéra ñanemoirũ Conmemoracionhápe?
4 Ajéiko hetaite mbaʼe porã ohendúta umi oúva Conmemoracionhápe! Oikuaáta hikuái mbaʼeichaitépa Jehová ñanderayhu omeʼẽvo itaʼýra ñanderehehápe (Juan 3:16). Oñemombeʼúta chupekuéra mbaʼéichapa Ñandejára Rréino oguerúta heta mbaʼe porã yvyporakuérape g̃uarã (Isa. 65:21-23). Ha avei ostudiaséramo la Biblia oñemokyreʼỹta chupekuéra heʼi hag̃ua umi akomodadórpe. Upévare, jajerurékena Jehovápe tosẽ porãite ñandéve ko tembiapo ha tou heta tapicha ñanemoirũ hag̃ua Conmemoracionhápe.