Ág̃a 17 de marzo guive ñasẽta ñaporoinvita Conmemoracionrã
1. Mbaʼépa ñañepyrũta jajapo 17 de marzo guive?
1 Ñande ningo káda áño ‘jaikuaauka enterovépe Jesús omano hague’, jajapóvo pe Conmemoración (1 Cor. 11:26). Upévare jaipota heta hénte ñanemoirũ upe día iñimportantetévape ohendu hag̃ua mbaʼéichapa Ñandejára omeʼẽ Itaʼýra ñanderayhupápe (Juan 3:16). Ko áñope ñañepyrũta ñaporoinvita Conmemoracionrã, sábado 17 de marzo guive. Jajepreparámapa hína jajapo hag̃ua upéva?
2. Mbaʼéichapa ñaikuaveʼẽkuaa pe invitasión?
2 Mbaʼéichapa ñaikuaveʼẽkuaa pe invitasión. Iporãvéta ningo jajapóramo mbykymínte. Pór ehémplo, ikatu jaʼe: “Mbaʼéichapa! Ahejase ko invitasión ndéve ha ne famíliape g̃uarã. Ág̃a 5 de abril ojegueromanduʼáta oparupiete peteĩ mbaʼe iñimportantetereíva. Upe árape Jesús omanovaʼekue, upévare ojejapóta peteĩ diskúrso oñeʼẽtava umi mbaʼe porã jahupytýtavare Jesús sakrifísio rupive ha mbaʼépa haʼe ojapohína koʼág̃a. Ndojekovramoʼãi entráda; koʼápe retopáta moõ ha mbaʼe órapa ojejapóta ko aty”. Sábado ha domingokue ñaikuaveʼẽkuaa avei umi rrevísta ñameʼẽnguévo pe invitasión, ijáramo ñandéve.
3. Mbaʼépa jajapovaʼerã og̃uahẽ hag̃ua opavavépe pe invitasión?
3 Ñainvitákena opavavépe. Ñande ningo jaipota ñanemoĩrũ ikatúva guive. Upévare ñainvitákena ñande rrevisíta, ñane estudiánte, ñane hénte, ñane vesíno, ñane kompañéro de traváho térã kolehiopegua ha mayma jaikuaávape. Umi ansiáno ohecháta mbaʼéichapa oñemosarambi porãvéta ko invitasión ñande território tuichakuére. Umi áño ohasavaʼekuépe ojehupyty heta mbaʼe porã. Pór ehémplo, peteĩ akomodadór ohechárõ guare og̃uahẽha ohóvo peteĩ kuñakarai, oporandu chupe mávapa oinvita chupe ikatu hag̃uáicha oavisa upe maranduhárape. Péro pe kuñakarai heʼi ndoikuaaiha avavépe. Upe díapente peteĩ maranduhára opredikáva ogahárupi omeʼẽ chupe pe invitasión.
4. Mbaʼérepa ñanekyreʼỹvaʼerã ñasẽvo ñaporoinvita?
4 Ikatuhína ou Conmemoracionhápe peteĩ tapicha nde reinvitavaʼekue, péro ndoikóiramo upéicha, revyʼavaʼerã ikatu haguére rejapo ko tembiapo rehechauka hag̃ua opavavépe remombaʼeguasuha Jehovápe. Avei nemanduʼavaʼerã umi invitasión remosarambíva rupive remombeʼuha Jesús haʼeha peteĩ rréi ipoderósova. Ha iporãveha, nekyreʼỹramo rejapokuévo ko tembiapo umi hénte nde territoriopegua, umi ermáno ne kongregasiongua, ha iñimportantevéva, Jehová ohechakuaáta remombaʼeha nde pyʼaite guive Jesús sakrifísio (Col. 3:15).