Tojejapo Ñandejára rembipota

1. Mbaʼéichapa hérata ñande aty guasu un diagua ojejapótava 2012-pe, ha mbaʼérepa tekotevẽ ñahesaʼỹijo upéva?

¹ Jehová ningo ojapo yvyporakuérape, upévare tekotevẽ jaikuaa ha jajapo hembipota, upéicha añoite jaikuaáta maʼerãpa jaikove (Rev. 4:11). Péro ijetuʼu jajapo hag̃ua ko mbaʼe, haʼetéramo jepe ndahasýiva. Ñañehaʼãmbaitevaʼerã ani hag̃ua ‘jaiko jaikoseháicha ni jajapo umi mbaʼe vai ñane akãme jarekóva’ térã ‘jaikose umi oikuaaʼỹva Ñandejárape oikoháicha’ (Efe. 2:3; 1 Ped. 4:3; 2 Ped. 2:10). Jehová nañanepytyvõirire, ‘pe Aña ñandeguerekovaʼerãmoʼã iñapytĩmby ha ojapouka ñandéve umi mbaʼe haʼe oipotáva’ (2 Tim. 2:26). Pe aty guasu un diagua ojejapótava 2012-pe ñanepytyvõta jajapo hag̃ua pe padrenuéstro heʼíva: ‘Tojejapo Ñandejára rembipota’ (Mat. 6:9, 10, NM). Ha upéicha voi oñembohérata ko aty guasu.

2. Mbaʼe porandúpa oñembohováita pe aty guasu un diaguápe?

² Umi porandu oñembohováita. Pe aty guasu aja, jajapysaka porã vaʼerã mbaʼéichapa umi diskúrsope oñembohovái koʼã porandu: Mbaʼépa iñimportánte jajapo ñahendúnterangue Ñandejára Ñeʼẽ? Mbaʼéichapa ikatu akóinte jahechakuaa mbaʼépa Ñandejára rembipota ñandéve g̃uarã? Mbaʼérepa ñañehaʼãvaʼerã ñaipytyvõ opaichagua héntepe? Mbaʼépa jajapovaʼerã ñañeñandu porã ha javyʼa hag̃ua? Mbaʼépa pehechaukavaʼerã Jehovápe peẽ mitãrusu ha mitãkuña? Mbaʼépa jahupyty jajapo rupi Ñandejára rembipota? Mbaʼérepa tekotevẽterei ñamombarete ha ñamokyreʼỹ ñane ermanokuérape?

3. Mbaʼépa jajapovaʼerã ikatu hag̃uáicha ñanepytyvõ pe aty guasu un diagua?

³ Ejapókena opa ikatúva eho hag̃ua pe aty guasuhápe ha eñatende porã upépe ojeʼévare. Oñeinvita jepi ningo ojapo hag̃ua diskúrso peteĩ ombaʼapóva Betélpe térã peteĩ superintendéntepe. Iporãite vaʼerã reñemongetáramo hendive ha hembirekóndi, oiméramo omendáva, tahaʼe oñepyrũ mboyve térã opa rire pe prográma. Ha ponóike nde ha ne família penderesarái umi mbaʼe pehenduvaʼekuégui aty guasuhápe, ikatu peñeʼẽ jey hese peg̃uahẽ rire pende rógape. Ha pehecha oñondivepa mbaʼéichapa ikatu pejapo porãve Ñandejára rembipota (Sant. 1:25).

4. Mbaʼérepa tekotevẽ ñamotenonde Ñandejára rembipota ñande rekovépe?

⁴ Koʼẽrõitéma Jehová ohundipáta umi ndojaposéivape hembipota ha oikosévape chupekuéra ogustaháichante (1 Juan 2:17). Ajépa jaagradesete Jehovápe péicha ñanerekomboʼéta haguére hiʼoraitépe! Ko aty guasu katuete ñanepytyvõta ñamotenonde hag̃ua Ñandejára rembipota ñande rekovépe.