Ñandejára Ñeʼẽ ideprovécho ñaporomboʼe hag̃ua
1. ¿Mbaʼéichapa héra ñande aty guasu dos diagua ojejapótava áño 2014-pe, ha mbaʼe porandúpa oñembohováita?
1 Jehová hína ñane “Mboʼehára Ijojahaʼỹva”, pe mboʼehára ikatupyryvéva oĩva ko univérsope (Is. 30:20, 21). Haʼe oiporu Iñeʼẽ la Biblia ñanemboʼe hag̃ua, ko lívro ndaijojahái ojehai rupi ijespíritu sánto rupive. Péro, ¿mbaʼéichapa umi mbaʼe oĩva pype ikatu ñanepytyvõ ñaneresãi, ñapensa hag̃ua iporãvare, ñañeñandu porã ha ñamombarete hag̃ua ñande jerovia? Ko porandu oñembohováita ñande aty guasu dos diaguápe ojejapótava áño de servísio 2014-pe, hérava: “Ñandejára Ñeʼẽ ideprovécho ñaporomboʼe hag̃ua”, omopyendáva 2 Timoteo 3:16.
2. ¿Mbaʼe porandúpa ñanepytyvõta jahechakuaa hag̃ua umi mbaʼe iñimportantevéva oñemyesakãtava ñande aty guasúpe?
2 Umi porandu oñembohováitava ñande aty guasúpe. Koʼã porandu ñanepytyvõta jahechakuaa hag̃ua umi mbaʼe iñimportantevéva oñemyesakãtava ñande aty guasúpe:
• ¿Mbaʼéichapa ñanepytyvõ ñande rekovépe umi mbaʼe ñaaprendéva Ñandejára Ñeʼẽgui? (Is. 48:17, 18.)
• ¿Mbaʼépa jahupytýta ñamboykéramo heta mbaʼe jaservi hag̃ua Jehovápe de tiémpo kompléto? (Mal. 3:10.)
• ¿Mbaʼépa jajapo vaʼerã jajuhúramo “omboʼéva [...] japu”? (Heb. 13:9.)
• ¿Mbaʼéichapa ikatu jasegi Jesús ehémplo ñaporomboʼévo? (Mat. 7:28, 29.)
• ¿Mbaʼérepa akóinte ostudia vaʼerã umi oporomboʼéva kongregasiónpe? (Rom. 2:21.)
• ¿Maʼerãpa ideprovécho Ñandejára Ñeʼẽ? (2 Tim. 3:16.)
• ¿Mbaʼépa ojapo yvyporakuérare Ñandejára “oityvyro” haguére umi tetãme? (Ageo 2:6, 7.)
• ¿Ojeroviápa Jehová ñanderehe? (Efes. 5:1)
• ¿Mbaʼérepa ñañehaʼã vaʼerã akóinte jaiko Jehová heʼiháicha? (Luc. 13:24.)
3. ¿Mbaʼérepa ndajajavýi vaʼerã ni peteĩ diskúrso ojepreparáva ñande aty guasurã?
3 Jaʼe haguéicha ñande aty guasu omopyenda 2 Timoteo 3:16, ha umi versíkulo oĩva ko téxto mboyvemi omombeʼu mbaʼéichatapa umi ára pahápe. Upe tiémpo ijetuʼúvare apóstol Pablo heʼi vaʼekue: “Umi kuimbaʼe aña ha hovamokõiva oho vai vaive vaʼerã; ombotavýta ótrope ha haʼekuéra avei oñembotavýta ijupe voi” (2 Tim. 3:13). Ndajaipotáiramo avave ñanembotavy ni ñande voi nañañembotavyséiramo ñandejupe, tekotevẽterei ñahendu ha jajapo la Biblia omboʼéva. Upévare, jajapókena opa ikatúva ani hag̃ua jajavy ni peteĩ diskúrso ojepreparáva hiʼoraitépe ñande aty guasurã.