¿Rejapótapa nde prekursorádo auxiliár?
1. ¿Mbaʼérepa Conmemoración tiémpope opyta porãiterei ñasẽve hag̃ua predikasiónpe?
1 Conmemoración tiémpope ningo opyta porãiterei ñasẽve hag̃ua predikasiónpe. Ko tiémpope jajepyʼamongeta pe mborayhu ijojahaʼỹva ohechauka vaʼekuére Jehová omeʼẽvo Itaʼýra ñandepeʼa hag̃ua pekádo ha ñemano poguýgui (Juan 3:16). Ha jaagradeségui Jehovápe ko mbaʼére, ñanemomýi ñamombeʼu hag̃ua ñande rapichakuérape mávapa Haʼe ha mbaʼépa ojapo hína yvyporakuéra rehehápe (Is. 12:4, 5; Luc. 6:45). Upévare, javyʼaiterei ñainvitávo Conmemoracionrã ñane vesinokuéra, ñane hénte ha ambue tapicha jaikuaávape. Upe rire, javisita vaʼerã avei umi oho vaʼekuépe ko atýpe. Upéicharõ, ¿mbaʼérepa nderejapói nde prekursorádo auxiliár ág̃a marzo, abril térã máyope?
2. ¿Mbaʼérepa marzo opyta porãiterei jajapo hag̃ua ñande prekursorádo auxiliár?
2 Jaaprovechákena márzope. Marzo ningo opyta porãiterei jajapo hag̃ua ñande prekursorádo, ikatúta rupi jaiporavo jajapótapa treinta térã cincuenta óra. Oiméramo pe superintendénte de sirkuíto pende visitáta márzope, umi ojapóva iprekursorádo auxiliár upe méspe ikatúta opyta opaite peve pe aty ojejapóvape umi prekursór rregulár ha espesiál ndive. Pe Conmemoración ojejapóta 26 de marzo 2013-pe, ha ñañepyrũta ñaporoinvita 1 de marzo guive, upéicharõ hetave tiémpo jarekóta jajapo hag̃ua upéva umi áño ohasavaʼekuégui. Marzo oreko avei cinco fin de semána. ¡Ajépa opyta porãite japredikave hag̃ua! Ñañehaʼãmbaitékena jaaprovecha.
3. ¿Mbaʼépa koʼág̃ama jajapo vaʼerã ñasẽve hag̃ua predikasiónpe?
3 Ehecháma vaʼerã mbaʼépa ikatu rejapo. Koʼág̃ama rehecha vaʼerã mbaʼéichapa remohendáta ne tiémpo ikatu hag̃uáicha rejapo nde prekursorádo. Ha reikotevẽta rupi ne família nepytyvõ, iporãta peaprovecha pe Aty Jastudia Hag̃ua Ñande Rogayguándi peñemongeta hag̃ua umi mbaʼe pehupytysévare ha mbaʼéichapa pemohendáta pene tiémpo upearã (Prov. 15:22). Péro ani nekangy ndaikatúiramo rejapo nde prekursorádo auxiliár. ¿Mbaʼépa upéicharõ ikatu rejapo? Ijáramo ndéve ikatu repytamie resẽ jave predikasiónpe térã reñehaʼãkuaa resẽve ótro día.
4. ¿Mbaʼe iporãvapa jahupytýta ñasẽvéramo predikasiónpe marzo, abril ha máyope?
4 Ñasẽvéramo predikasiónpe marzo, abril ha máyope, javyʼavéta ikatu haguére jaservi Jehovápe ha ñaipytyvõ ñande rapichakuérape (Juan 4:34; Hech. 20:35). Péro pe iñimportantevéva umi mbaʼe jajapóva ombovyʼáta Jehovápe (Prov. 27:11).