¿Mbaʼépa ikatu jajapo javyʼave hag̃ua Conmemoración tiémpope?

1. ¿Mbaʼépa rejapokuaa Conmemoración tiémpope revyʼave hag̃ua Jehová servísiope?

¹ ¿Mbaʼépa rejapokuaa marzo, abril ha máyope revyʼave hag̃ua Jehová servísiope? Ikatu resẽ pyʼỹive predikasiónpe, ha ijáramo ndéve, ejapo nde prekursorádo auxiliár. ¿Mbaʼérepa nembovyʼáta upéva?

2. ¿Mbaʼérepa javyʼave ñasẽvéramo predikasiónpe?

² Javyʼave hag̃ua. Jehová ñandeapo vaʼekue ikatu hag̃uáicha javyʼa ha ñañeñandu porã ñamombaʼeguasu jave chupe (Mat. 5:3). Avei ñandeapo javyʼa hag̃ua ñameʼẽvo ñande rapichakuérape (Hech. 20:35). Ha pe predikasión rupive ikatu jajapo koʼã mokõi mbaʼe. Upéicha rupi, ñasẽvéramo predikasiónpe javyʼave, ha ndahaʼéi upéva añónte, avei ñandekatupyryve ñaporomboʼe hag̃ua. Upéva ñanepytyvõ ñandepyʼaguasu ha ñañeñandu porãve hag̃ua ñañeʼẽ jave umi ogajárandi. Avei ñañeʼẽ rupi hetave héntendi, jarekovéta oportunida ñamoñepyrũ hag̃ua estúdio vívliko. Koʼã mbaʼe ñanembovyʼave Jehová servísiope.

3. ¿Mbaʼérepa marzo ha abrílpe opyta porãitereíta jajapo hag̃ua ñande prekursorádo auxiliár?

³ Marzo ha abrílpe opyta porãitereíta jajapo hag̃ua ñande prekursorádo auxiliár, ¿mbaʼérepa? Ikatúta rupi jaiporavo jajapótapa treinta térã cincuenta óra. Avei koʼã méspe kyreʼỹme ñamosarambíta hína umi invitasión Conmemoracionrã. Upéva jajapóta sábado 22 de marzo guive og̃uahẽ meve pe día ojejapotahápe pe Conmemoración, hoʼátava lunes 14 de abril. Upérõ umi kongregasiónpe ojepredika kyreʼỹta hína, oĩtagui hetaiterei puvlikadór “ombaʼapo jejopýtava ojoykére”, omog̃uahẽ hag̃ua pe invitasión pe território tuichakuére umi tres semána aja (Sof. 3:9).

4. ¿Mbaʼépa rejapokuaa oiméramo reservise hína de prekursór auxiliár?

⁴ Koʼág̃ama jajeprepara vaʼerã. Oiméramo neʼĩra rejeprepara, koʼág̃ama reñepyrũ vaʼerã remohenda porã ne rembiapokuéra, ikatu hag̃uáicha resẽve predikasiónpe uno térã dos mése aja. Ha upearã iporãta reñemboʼéramo Jehovápe (Sant. 1:5). Avei, reporandukuaa ne familiakuérape ha umi ermáno oĩvape ne kongregasiónpe mbaʼépa ikatu rejapo (Prov. 15:22). Ikatu ningo oime nderasy térã rembaʼapo un diaite, upéicharõ jepe ikatu hína ija ndéve rejapo hag̃ua nde prekursorádo auxiliár.

5. ¿Mbaʼépa jahupytýta ñambaʼapovéramo Jehová servísiope Conmemoración tiémpope?

⁵ Jehová ningo oipota hembiguaikuéra ovyʼa (Sal. 32:11). Upévare katuete javyʼavéta ñañehaʼãramo ñambaʼapove Jehová servísiope Conmemoración tiémpope, ha ndahaʼéi upéva añónte, avei ñambopyʼarorýta ñande Ru yvagapeguápe (Prov. 23:24; 27:11).