Jajepreparákena vyʼapópe Conmemoracionrã
1. ¿Mbaʼérepa javyʼaiterei Conmemoración tiémpope?
1 Ko áñope pe Conmemoración ojejapóta Martes 26 de marzo. Upe tiémpope ningo javyʼaiterei ñapensa rupi Jehová ojapo vaʼekuére omeʼẽvo Itaʼýra ñandesalva hag̃ua (Is. 61:10). Upévare, koʼág̃ama voi javyʼáramo, tuicha ñanepytyvõta jajeprepara porã hag̃ua upe díape g̃uarã. Jahechamína mbaʼérepa.
2. ¿Mbaʼépa ñanemomýi japrepara hag̃ua umi mbaʼe tekotevẽva Conmemoracionrã?
2 Umi mbaʼe ojeprepara vaʼerã. Pe Conmemoración ningo iñimportanteterei, péro isensillomínte vaʼerã. Ha ani hag̃ua ñanderesarái umi mbaʼe iñimportántevagui, koʼág̃ama jajeprepara vaʼerã jahávo (Prov. 21:5). Por ehémplo, tekotevẽ: oñekonsegi pán ha víno ikatu vaʼerãichagua ojeporu, ojeporavo moõ ha mbaʼe órapa ojejapóta, ojehecha pe lugár ojeporavóva ipotĩ ha oĩtapa preparádo órape. Avei pe diskursánte ojeprepara porã vaʼerã, umi akomodadór ha ombohasátava pe pán ha víno tekotevẽ oikuaa porãma mbaʼe mbaʼépa ojapóta. Péro oime vaʼerã japreparapa léntoma koʼã mbaʼe. Ñande ñamombaʼeterei Jesús omeʼẽ haguére hekove ñandesalva hag̃ua, ha upéva ñanemomýi jajeprepara porã hag̃ua (1 Ped. 1:8, 9).
3. ¿Mbaʼéichapa ikatu japrepara ñane korasõ Conmemoracionrã?
3 Japreparákena ñane korasõ. Tekotevẽterei avei japrepara porã ñane korasõ (Esd. 7:10). Upéicharõ añoite ñamombaʼevéta upe ára iñimportantetéva. Upearã ñañemotiémpo vaʼerã jalee hag̃ua umi téxto vívliko ojeporavóva Conmemoración tiémpope g̃uarã, ha jajepyʼamongeta umi mbaʼe Jesús ohasa vaʼekuére omano mboyvemi. Haʼe ningo oñemeʼẽmbaite vaʼekue Jehová servísiope ha jajepyʼamongetáramo iñehémplore, ñanemomýita ñahaʼanga hag̃ua chupe (Gál. 2:20).
4. Hetaiterei mbaʼe porã ningo ikatu jahupyty Jesús sakrifísio rupive, ¿mbaʼépa ndéve nembovyʼave umívagui?
4 Jesús sakrifísio rupive ojehechauka Jehová añoite orekoha derécho ogovernávo, ñandepeʼa pekádo ha ñemano poguýgui, ñanepytyvõ ñaime porã hag̃ua Ñandejárandi ha jahupyty jeikove opaʼỹva (Col. 1:21, 22; 1 Juan 2:2). Jajepyʼamongetávo upe sakrifísiore, ñanemokyreʼỹta jasegi hag̃ua Jesucristo ehémplo ha ñakumpli hag̃ua umi mbaʼe ñapromete vaʼekue Jehovápe ñañemeʼẽrõ guare Chupe (Mat. 16:24). Upévare, jajeprepara porãramo Conmemoracionrã ha jaha upe rreuniónpe, katuete javyʼaitereíta.