Mbaʼéichapa jaiporu vaʼerã pe folléto ¿Mávapa umi ojapóva Jehová rembipota koʼág̃a rupi?
Ojejapo ikatu hag̃uáicha ñaipytyvõ umi estudiántepe oikuaa hag̃ua Jehová organisasión
1. ¿Maʼerãpa ojejapo ko folléto pyahu?
1 Ndaʼareiete oñemeʼẽ ñandéve ko folléto pyahu hérava ¿Mávapa umi ojapóva Jehová rembipota koʼág̃a rupi? ¿Jaiporúmapa ko puvlikasión? Ko folléto ojejapo ñaipytyvõ hag̃ua umi ostudiávape la Biblia oikuaave hag̃ua: 1) Jehová organisasión, 2) ñane rembiapo ha 3) mbaʼéichapa oñembaʼapo pype. Umi leksión orekóva ko folléto ipuku una páhinante, upéicha rupi ikatúta ñahesaʼỹijo ñane estudiántendi cinco térã diez minúto aja, jastudiapa rire pe puvlikasión jaiporúva ñamboʼe hag̃ua chupe.
2. Emombeʼu mbaʼe mbaʼépa oreko pe folléto pyahu.
2 Mbaʼe mbaʼépa oreko pe folléto. Heʼiháicha pe primer párrafope, ko puvlikasión pyahu oreko mbohapy seksión omyesakãva heta mbaʼe iñimportánteva Jehová organisasióngui. Oĩ pype 28 leksión ha káda título peteĩ porandu oñembohováiva umi subtítulo oĩva létra hũvévape. Oreko avei heta fóto oñeguenohẽ vaʼekue cincuenta rasa tetãme ha iguýpe heʼi voi moõguarépa umíva. Upéva ohechauka mbaʼéichapa Ñandejára organisasión ombaʼapo ko yvy tuichakuére. Heta leksión oreko peteĩ rrekuádro heʼíva “Reikuaave hag̃ua”, upépe heʼi heta mbaʼe ikatúva ojapove umi estudiánte ojepokuaave hag̃ua Jehová organisasión rehe.
3. ¿Mbaʼéichapa ikatu ñahesaʼỹijo pe folléto umi estudiántendi?
3 Mbaʼéichapa ikatu jaiporu ko folléto. Reñepyrũ hag̃ua rehesaʼỹijo káda leksión, relee vaʼerã pe porandu oĩva oñepyrũvo pe páhina. Upe rire, peleekuévo umi párrafo emyesakã umi subtítulo. Ipahaitépe ejerure chupe tombohovái umi porandu oĩva opakuévo pe páhina. Péro ikatu avei peleepaite raẽ pe leksión térã peñeʼẽʼimi pehóvo káda párrafore. Eiporavo porã vaʼerã umi téxto peleétava ha ani nderesarái peñeʼẽʼimi hag̃ua umi fóto ha rrekuádro heʼihápe “Reikuaave hag̃ua”. Iporãvéta ñañepyrũramo jastudia leksión 1 guive, péro sapyʼánte ñahesaʼỹijo vaʼerã peteĩ téma pe estudiánte tekotevẽva oikuaa, por ehémplo og̃uahẽmbotávo peteĩ aty guasu ikatu jastudia hendive leksión 11.
4. ¿Mbaʼérepa javyʼaite jareko haguére ko folléto pyahu?
4 Ñamboʼévo la Biblia ñande rapichakuérape, ñaipytyvõ hína chupekuéra oikuaa hag̃ua ñande Ru oĩva yvágape. Péro ñaipytyvõ vaʼerã avei chupekuéra oikuaa ha oñemoag̃ui hag̃ua Jehová organisasión rehe (Prov. 6:20). ¡Ajépa javyʼaite ojejapo haguére ko folléto pyahu ñanepytyvõtava upearã!