Heta mbaʼe porã ojehupyty ñaporoinvitáramo aty guasurã
Tres semána oiko mboyve ñande aty guasu ñañepyrũta ñainvita umi hénte oĩvape ñande territóriope ha jaikuaaháicha iñimportanteterei jajapo ko tembiapo. Umi hénte ohóma vaʼekue ñande aty guasuhápe omombaʼe umi diskúrso vívliko, oguerohory ohechávo mbaʼéichapa ombaʼapo hekoitépe umi ermáno, avei mbaʼéichapa ojoayhu ha ojeporta porã enterove (Sal. 110:3; 133:1; Is. 65:13, 14). Péro oĩ ningo oikóva mombyry ha tekotevẽva oviaha heta óra og̃uahẽ hag̃ua ñande aty guasuhápe, ¿oúnepa umíva ñainvitáramo chupekuéra?
Oiko rire peteĩ aty guasu tres diagua áño 2011-pe, peteĩ sukursál orresivi peteĩ kárta, oguerukáva chupekuéra peteĩ kuñakarai ojuhu vaʼekue peteĩ invitasión hokẽ guýpe, haʼe ningo ojepokuaámi okañy umi Testígogui. Upe kártape ohai péicha: “Areko peteĩ óga neporãva ha che ména ivuenoiterei, upévare aimoʼã arekopaitemaha umi mbaʼe aikotevẽva avyʼa hag̃ua. Upéicharõ jepe, ndavyʼapái. Upévare adesidi aha peteĩ sábado pe aty guasuhápe, amanehátaramo jepe 320 kilómetro ag̃uahẽ hag̃ua upépe”. Ha ogustaiterei rupi chupe pe aty guasu ohenói iménape oavisa hag̃ua ndohomoʼãiha hógape upe pyharépe, opytaségui avei pe domingo. Haʼe heʼi: “Ahendupaite umi diskúrso ha aikuaa heta Testígope. Hiʼãiterei voi chéve ndopái pe aty guasu”. Og̃uahẽ rire hógape, oñepyrũ ostudia la Biblia ha cuatro mése haguépe oikóma chugui maranduhára. Upéi heʼi: “¡Haʼetépe ajuhu pe invitasión che rokẽme! Koʼág̃a ae avyʼa añetehápe”.
Katuete ningo oĩta ohóva ñane asambleahápe ñainvitáramo chupekuéra. Upévare, ñaporoinvitákena kyreʼỹme ñande aty guasurã, avei jagueraha vaʼerã umi invitasión hembýva jasegi hag̃ua ñaporoinvita kállere térã ambue hendápe pe siuda oikohápe ñande aty.
[Rrekuádro oĩva páhina 4-pe]
¿Mbaʼéichapa ikatu ñaporoinvita?
Ñainvitaséramo enterove hénte oĩva ñande territóriope mbykymínte ñañeʼẽ vaʼerã. Ha ikatu jaʼe péicha: “Mbaʼéichapa. Roinvita ningo enterovépe peteĩ aty guasurã ha ahejase ndéve ko invitasión oñemosarambíva ko múndo tuichakuére. Koʼápe retopáta moõ ha arakaʼépa ojejapóta”. Ñanekyreʼỹkena ñaporoinvitávo. Ha ñasẽ jave ñaporoinvita fín de semanakue, opyta porãramo ñandéve ikatu avei ñaikuaveʼẽ umi rrevísta.