Peteĩ invitasión iporãitereíva
1. ¿Arakaʼe guivépa ñañepyrũta ñaporoinvita asamblearã?
1 Ñakombidase jave ñane hénte térã ñane amigokuérape okaru hag̃ua ñanendive, ñañehaʼãmbaite jepi japrepara umi tembiʼu iporãva, upéicha rupi kyreʼỹme ñainvita chupekuéra. Upéicha avei, heta oñembaʼapo ojeprepara hag̃ua umi informasión oñepresentátava umi asambléa de distríto ha internasionálpe. Ha Jehová omeʼẽ ñandéve pe priviléhio ijojahaʼỹva, ñainvita hag̃ua umi héntepe tres semána og̃uahẽ mboyve pe aty guasu tres diagua. ¿Mbaʼépa ñanepytyvõta kyreʼỹme ñaporoinvita hag̃ua?
2. ¿Mbaʼépa ñanemomýita kyreʼỹme ñaporoinvita hag̃ua?
2 Tuichaiterei ningo ñanepytyvõta umi mbaʼe ñahendútava pe aty guasúpe, upévare jajepyʼamongetárõ umi mbaʼére ha jahechauka ñandeagradesidoha, ñanemomýita kyreʼỹme ñaporoinvita hag̃ua (Is. 65:13, 14). Ñanemanduʼa vaʼerã káda áño ojehupytyha heta mbaʼe porã ñaporoinvita rupi. Upéicha avei, ko áñope heta persóna ñainvitáva ikatu hína oho pe aty guasuhápe. Péro ohóramo jepe heta térã nahániri, ñañehaʼãmbaitéramo ñaporoinvita ñamombaʼeguasu hína Jehovápe ha jahechauka haʼe imbaʼeporãha opavavéndi (Sal. 145:3, 7; Rev. 22:17).
3. ¿Mbaʼéichapa ñamosarambíta umi invitasión?
3 Umi ansiáno káda kongregasionpegua odesidíta mbaʼépa ojejapóta oñemosarambi hetave hag̃ua umi invitasión, por ehémplo ohecha vaʼerã ojehejátapa umi óga ndojetopaihápe avavére térã oñemeʼẽtapa avei umi lugár oñemoĩhápe mesa térã karríto. Fin de semanakue katu, otoka porãrõ ikatu ñaikuaveʼẽ hendive umi rrevísta. Avei ñamosarambi aja pe invitasión, pe primer sábado del mes nañaikuaveʼẽmoʼãi estúdio vívliko. Ñaporoinvitáramo kyreʼỹme, katuete javyʼaitereíta ñamohuʼã vove ko kampáña, jaikuaa rupi ñainvita hague heta héntepe oho hag̃ua oñevenefisia umi informasión porãite Jehová omeʼẽvagui.