Jahechaukákena ñandeagradesidoha Conmemoración tiémpope

1. ¿Mbaʼe oportunidápa jarekóta Conmemoración tiémpope?

¹ Pe Conmemoración hoʼáta 14 de abril, upe tiémpope jarekóta peteĩ oportunida ijojahaʼỹva jahechauka hag̃ua Jehovápe jaagradeseha chupe imbaʼeporã haguére ñanendive. Pe rreláto oĩva Lucas 17:11-18-pe ohechauka porã Jehová ha Jesús omombaʼetereiha umi ijagradesídovape. Upépe omombeʼu Jesús omonguera hague diez leprósope, péro peteĩnte oagradese chupe. ¡Ajépa imalagradesidoite umi ótro! Jehová ombou vaʼekue Itaʼýra omano hag̃ua ñanderehehápe, upéicha rupi koʼẽrõitéma opáta opaichagua jehasa asy ha jahupytýta jeikove opaveʼỹva. Og̃uahẽ vove upe ára, káda día jaagradeséta Jehovápe omeʼẽ haguére ñandéve hetaite mbaʼe porã. Péro, ¿mbaʼéichapa ikatu jahechauka ñandeagradesidoha umi semána oúvape?

2. ¿Mbaʼépa ñanepytyvõta ñandeagradesído hag̃ua?

² Mbaʼépa ñanepytyvõta ñandeagradesído hag̃ua. Ñapensáramo umi mbaʼe porã ojejapóvare ñanderehehápe, ñanemomýita ñandeagradesído hag̃ua. Upévare, ñapensa ha ñamombaʼe hag̃ua ñande pyʼaite guive pe rreskáte, ojeprepara peteĩ prográma jalee hag̃ua la Biblia Conmemoración tiémpope. Upéva ikatu jatopa ñande kalendáriope ha ñande folléto Ñahesaʼỹijo Ñandejára Ñeʼẽ ára ha árape. Jaaprovechákena ko prográma jalee hag̃ua ñane famíliandi. Péicha jajapóramo, ñamombaʼevéta pe rreskáte ha upéva ñanemomýita jaiko hag̃ua hekoitépe (2 Cor. 5:14, 15; 1 Juan 4:11).

3. ¿Mbaʼe mbaʼépa ikatu jajapo Conmemoración tiémpope jahechauka hag̃ua ñandeagradesidoha?

³ Ñandeagradesídokena. Umi mbaʼe jajapóvare ojekuaa ñandeagradesidoha (Col. 3:15). Pe lepróso oho vaʼekue Jesús rendápe oagradese hag̃ua chupe. Avei oiméne vyʼápe omombeʼu raʼe opavavépe Jesús ojapo vaʼekue hese (Luc. 6:45). Ha ñande, ¿jahechaukátapa avei ñandeagradesidoha ñamosarambívo kyreʼỹme umi invitasión Conmemoracionrã? Upe tiémpope iporãitereíta avei jajapóramo ñande prekursorádo auxiliár térã ñasẽve predikasiónpe. Ha og̃uahẽ vove upe día, jahechaukáta ñamombaʼeha Jesús sakrifísio jarresivi porãvo umi hénte oúvape Conmemoracionhápe ha ñambohováivo chupekuéra umi mbaʼe oikuaaséva.

4. ¿Mbaʼérepa jaaprovecha vaʼerã ko Conmemoración?

⁴ Ndajaikuaái ningo oimépa última ves jajapóta hína pe Conmemoración (1 Cor. 11:26). Péro la jaikuaa porãva, upe féchape jarekoha peteĩ oportunida ijojahaʼỹva jahechauka hag̃ua ñandeagradesidoha, ¿jaaprovechátapa pe oportunida? Jehová ningo imbaʼeporãiterei rupi omeʼẽ Itaʼýra ñanderehehápe, upévare jahechaukákena umi mbaʼe jaʼe, ñapensa ha jajapóva rupive jaagradeseha chupe (Sal. 19:14).