Jaagradesékena Ñandejárape ijopói porãitére
1. Mbaʼérepa jaagradesete Jehovápe?
1 Jehová ningo omeʼẽma ñandéve hetaiterei jopói ha umíva apytégui Itaʼýra rekove la iñimportantevéva (Sant. 1:17). Upéicha rupi ikatu oñeperdona ñane rembiapo vaikue ha jahupytykuaa avei hetaiterei mbaʼe porã (Efe. 1:7). Koʼág̃a ñaimeñaína Conmemoración tiémpope ha ikatu jaaprovecha jajepyʼamongeta hag̃ua ko jopói porãitére. Ajépa jaagradesete Ñandejárape ko mbaʼe porãite asýre!
2. Mbaʼéichapa ñamombaʼekuaa ñane rogayguándi pe jopói Ñandejára omeʼẽva ñandéve?
2 Ñamombaʼevaʼerã. Ko áñope Conmemoración ára hoʼáta 30 de marzo. Ha ikatu hag̃uáicha jahechauka ñamombaʼeha upéva jaaprovechakuaa pe Aty Jastudia Hag̃ua Ñande Rogayguándi, ha ñahesaʼỹijo umi informasión oñeʼẽva Jesús sakrifísiore. Iporãta avei jaleéramo ára ha ára umi párte ojeporavóva la Bíbliagui Conmemoracionrã. Káda uno jajepyʼamongetavaʼerã umi mbaʼe porã jahupytývare ko jopói rupive, ha avei mbaʼéichapa jahecha ñande rapichápe, ñande rekove, ñane renonderã ha Jehovápe. Ikatu avei ñañensaja umi purahéi pyahu ojeporútava Conmemoracionhápe, umíva hína número 8 ha 109 (Sal. 77:12).
3. Mbaʼéichapa ikatu jahechauka ñamombaʼeha Ñandejára jopói?
3 Jahechaukákena ñamombaʼeha. Ñande ningo ñamombaʼeterei Ñandejára jopói ha upéicha rupi ñamombeʼu enterovépe Jehová rembipota ha mbaʼeichaitépa ñanderayhu omboúvo Itaʼýra ko yvy ape ári (Sal. 145:2-7). Upévare oĩ família oñehaʼãva ojapo iprekursorádo auxiliar peteĩva jepe marzo, abril térã máyope. Mbaʼégui piko nañañehaʼãimi avei ñande jajapo upéva? Ha oiméramo ndéve ijetuʼu lénto rejapo hag̃ua, ndaikatuichéne piko ‘rejogua pe tiémpo hembýva’ ha repredikave? (Efe. 5:16.) Ñamombaʼéramo añete pe jopói ñañehaʼãmbaitéta ñaipytyvõ ikatumívape oĩ hag̃ua ñanendive Conmemoracionhápe (Rev. 22:17). Ikatu koʼág̃a guivéma jahai máva mávapepa ñainvitáta, ikatu pór ehémplo ñande rrevisíta, ñane estudiánte, ñane hénte, ñane kompañéro de traváho térã ñane vesínope. Iporãta avei kyreʼỹme ñasẽramo ñamosarambi pe invitasión Conmemoracionrã.
4. Mbaʼéichapa ikatu jaaprovecha porã Conmemoración tiémpo?
4 Conmemoración tiémpope ikatuhína jahechauka Jehovápe mbaʼeichaitépa jaagradese ha ñamombaʼe pe jopói omeʼẽva ñandéve. Jaaprovechákena jajepyʼamongeta porã hag̃ua ko jopóire ha ñañehaʼãmbaite jahechauka jaagradeseha “umi mbaʼeta ijojahaʼỹva oúva Crístogui” (Efe. 3:8).