Agóstope jarekóta oportunida ñambaʼapove hag̃ua Jehová servísiope

1. ¿Mbaʼépa jajapóta agóstope?

¹ Ko áñope ojapo hína 100 áño Jehová omoñepyrũ hague igoviérno, upévare iporãitereíta ñamombaʼeguasúramo chupe ñambaʼapo kyreʼỹvo iservísiope. Ha jajapo hag̃ua upéva, mes de agóstope jarrepartíta ko yvy tuichakuére peteĩ tratádo pyahu hérava ¿Mávarepa ikuentave jajerovia? Ko tratádo omokyreʼỹta umi héntepe oheka hag̃ua la Bíbliape umi mbaʼe oikuaaséva, ha avei omyesakãta mbaʼéichapa pe sítio jw.org/gug ikatu oipytyvõ chupekuéra.

2. ¿Mbaʼépa ikatu jajapo ñamombaʼeguasu hag̃ua Jehovápe mes de agóstope?

² Ñamombaʼeguasúta Jehovápe. Ikatu hag̃uáicha oñembaʼapove Jehová servísiope, mes de agóstope umi puvlikadór ojevautisámava ikatúta ojapo iprekursorádo auxiliár de 30 óra. Upe mes ningo oreko cinco fin de semána, upéicha rupi umi puvlikadór ohóva gueteri eskuélape térã umi ombaʼapóva éntre semána, orekóta avei oportunida ojapo hag̃ua iprekursorádo auxiliár. Jahechakuaáramo ñane estudiánte térã ñane famíliagui ikatumaha oiko puvlikadór, pyaʼemi ñañeʼẽ vaʼerã umi ansiánondi. ¡Ovyʼaitéta ningo hikuái oñepyrũramo opredika ko mes iñimportantetévape! Oĩ ningo prekursór rregulár ohupytýmava hiʼóra agosto mboyve, upéicha rupi agóstope saʼivéma osẽ opredika opytuʼumi hag̃ua. Péro ko áñope iporãta prekursorkuéra omohenda porãramo itiémpo, ikatu hag̃uáicha kyreʼỹme orreparti avei ko tratádo. Káda família jahecháma vaʼerã mbaʼépa ikatu jajapo ñambaʼapove hag̃ua Jehová servísiope ko mes iñimportantetévape (Esd. 3:11; Prov. 15:22).

3. ¿Mbaʼe iporãvapa jahupytyse hína agóstope?

³ Jaikuaa ningo heta vésema jajapo hague koichagua tembiapo, ha jahupyty jepi heta mbaʼe, péro agóstope jahupytyse hetaiteve mbaʼe porã. Por ehémplo, jaipota oĩ hetave puvlikadór, tojepredika hetave óra ha hetave ermáno tojapo iprekursorádo auxiliár. Mes de agóstope oñemohuʼãta hína pe áño de servísio 2014, ha ñamombaʼeguasuse Jehovápe arakaʼeve ojejapoʼỹ haguéicha. Haʼe ningo katuete ovendesíta umi mbaʼe jajapótava upe méspe, ikatu hag̃uáicha ñamosarambi pe marandu porã ko yvy tuichakuére (Mat. 24:14).