Ikatu ñandepyʼaguapy oĩramo jepe gérra
Gary anteve haʼe vaʼekue peteĩ militár, ha haʼe heʼi: “Astudia mboyve la Biblia nantendéi vaʼekue mbaʼérepa la hénte iñañaite, ojejapo hetaiterei inhustísia ha oĩ hetaiterei provléma ko múndope. Péro koʼág̃a chepyʼaguapy, pórke aikuaa Jehová ojapotaha ko múndogui peteĩ lugár isegúrova”.
Oĩ heta oñeñandúva avei Gary oñeñanduháicha. Ehechamína mbaʼéichapa la Biblia oipytyvõ chupekuéra.
LA BIBLIA HEʼI: “Jehová, nde ningo nevuenoiterei ha reime oreperdona hag̃uáicha” (Salmo 86:5).
MBAʼÉICHAPA ÑANEPYTYVÕ: “Ko versíkulo chembopyʼaguapy, pórke oasegura chéve Jehová ñandeporiahuverekoha. Aikuaa ningo haʼe oĩha cheperdona hag̃uáicha entéro umi mbaʼe vai ajapo vaʼekuére aĩrõ guare gerrahápe” (Wilmar, Colombia).
LA BIBLIA HEʼI: “Che ajapo hína yvága ha yvy pyahu, ha avave naimanduʼamoʼãi umi mbaʼe oiko vaʼekuére yma, umíva ojeietétama pene korasõgui” (Isaías 65:17).
MBAʼÉICHAPA ÑANEPYTYVÕ: “Umi mbaʼe ahasa vaʼekuére pe ehérsitope añetrauma, ajestresaiterei ha avei areko depresión. Péro ko téxto ohechauka chéve Jehová chepytyvõtaha anivéma hag̃ua apensa umi mbaʼe vai ahasa vaʼekuére, ha avei ndachepesadillamoʼãvéima. Umi mbaʼe vaieta noĩmoʼãvéima che akãme ni che korasõme. ¡Upéva chembovyʼaiterei!” (Zafirah, Estados Unidos).
LA BIBLIA HEʼI: “Pe rréi ogoverna vove, umi ihústovape oho porãta. Pe jasy ningo siémpre oĩta, upéicha avei oĩta pyʼaguapy opa ára g̃uarã” (Salmo 72:7).
MBAʼÉICHAPA ÑANEPYTYVÕ: “Siémpre chemanduʼa la heʼívare ko téxto. Koʼẽrõitéma umi mbaʼe vai oikóva umi gérra káusare opaitéta, ha natekotevẽmoʼãvéima jajepyʼapy oikórõ g̃uarã peteĩ mbaʼe vai ñane hénte térã ñane amigokuérare” (Oleksandra, Ucrania).
LA BIBLIA HEʼI: ‘Umi omano vaʼekue oikove jeýta. ¡Peẽ peiméva pe yvýpe, pepáykena ha pesapukái vyʼápe!’ (Isaías 26:19).
MBAʼÉICHAPA ÑANEPYTYVÕ: “Ojejukapasérõ guare umi tútsipe, haimete ojejukapa che família kompletoitépe. Péro ko téxto oasegura chéve ahecha jeytaha chupekuéra. Ahaʼarõitereíma ningo og̃uahẽ pe tiémpo ikatutahápe ahendu vyʼápe oĩmbaha hikuái” (Marie, Ruanda).
LA BIBLIA HEʼI: “Koʼẽrõitéma opáta umi hénte iñañáva [...]. Péro umi hénte ivuénova opytáta ko yvy ape ári, haʼekuéra ovyʼaitereíta pórke oikóta pyʼaguapýpe ha noñekevrantamoʼãi mbaʼevete asýre” (Salmo 37:10, 11).
MBAʼÉICHAPA ÑANEPYTYVÕ: “Pe gérra opáramo jepe peteĩ hendápe, osegi gueteri oĩ umi inhustísia ha hénte iñañáva. Upévare tuichaiterei chepytyvõ koʼã versíkulo. Jehová ningo ohechapaite la oikóva, haʼe ontende umi mbaʼe che ahasáva. Upévare opromete koʼẽrõitéma entéro sufrimiénto opataha ha ni nañanemanduʼaveitamaha umívare” (Daler, Tayikistán).
¿Mbaʼéichapa ipyʼaguapy raʼe koʼã omombeʼúva iñexperiénsia? Chupekuéra, ha entéro umi testígo de Jehovápe, tuichaiterei oipytyvõ la Biblia. Haʼekuéra oaprende nomboykéi vaʼerãha avavépe, tahaʼe haʼéva la irrása, ipaís, itrívu térã ikultúra (Efesios 4:31, 32). Umi testígo de Jehová noñentremetéi polítikare, ni ndopartisipái umi manifestasión ivioléntovape (Juan 18:36).
Umi testígo de Jehová avei oñopytyvõ oĩ rupi peteĩ família ojoayhuetereívape (Juan 13:35). Por ehémplo, Oleksandra, ñañeʼẽma hague ajeʼi, oho kuri iñermánandi ótro paíspe pe gérra káusare. Haʼe omombeʼu: “Rokrusamírente pe frontéra rohecháma umi testígo de Jehová oreraʼarõha orerresivi hag̃ua. Tuichaiterei orepytyvõ kuri hikuái ikatu hag̃uáicha rojepokuaa upe país pyahúpe kómo rrefuhiáda”.
Ore testígo de Jehová roipotaite rehomi ore rreunionkuérape. Upépe reaprendéta mbaʼéichapa koʼág̃ama voi ikatu reiko pyʼaguapýpe, ha avei mbaʼépa la Biblia opromete koʼẽrõite g̃uarã. Eike jw.org-pe eikuaa hag̃ua moõpa opyta porãvéta ndéve reho hag̃ua, térã ejerure hag̃ua peteĩ kúrso bíblico gratiete. Peteĩ testígo de Jehová vyʼápe ostudiáta nendive la Biblia, oipurúvo pe folléto ¡Jaikóta vyʼápe pára siémpre!