Kuatiañeʼẽ omboúva Cuerpo Gobernante
Ore ermanokuéra pohayhuetéva:
Ajépa javyʼaite ñañehenói haguére testigos de Jehová! Jaiporuñaína pe Mburuvicha tuichavéva réra. Upe téra ningo ndaijojahái, opytáta tapia g̃uarã ha arakaʼeve noñehundimoʼãi. Jehová voi omoĩ ñandéve ko téra ha upévare áño 1931 guive ñañehenói testigos de Jehová (Isa. 43:10). Ñande jaikuaa upéva tuicha mbaʼeha ha upéicha rupi ñamombaʼeterei.
Pe Aña ruvicha katu oipota tarovaite Ñandejára réra opyta tesaráipe. Umi tetã oĩva ipoguýpe ndoikuaaséi mbaʼeve Jehová réragui. Entéro umi rrelihión japu katu ndaijaʼeiete voi Ñandejára rérare ha upévare oipeʼaka umi bíbliagui anive hag̃ua ojeporu. Jesús katu ndaupeichaiete, haʼe ombotuicha Itúva réra. Upévare omboʼérõ guare hemimboʼekuérape oñemboʼe hag̃ua heʼi: ‘Peẽ peñemboʼevaʼerã kóicha: “Ore Ru reiméva yvágape, toñemomarangatu nde réra”’ (Mat. 6:9). Ambue árape oñemboʼérõ guare Itúvape, ipyʼaite guive Jesús heʼi: ‘Che aikuaauka nde réra umi kuimbaʼe nde remeʼẽvaʼekue chéve’ (Juan 17:6, ÑÑB). Jesús ojapo haguéicha ñande avei kyreʼỹme ñamoherakuã Jehová réra oparupiete ko yvy ape ári.
Pe téysto 2009-pe g̃uarã haʼékuri: “Jaikuaaukáke opárupi ha hekoitépe pe marandu porã”. Ko téysto ñanemokyreʼỹ japredika meme hag̃ua (Hech. 20:24). Jahecha porãiterei Jehová tuicha ohovasa hague ñane rembiapo pe áño ohasavaʼekuépe. Japredika oparupiete oñembotuicha ha oñemombaʼeguasu hag̃ua Jehová réra. Koʼág̃a ñaiméma 7.313.173 puvlikadór ha oñondivepa japredika ha ñamboʼe entéro umi ipyʼaporãvape ha oikuaaséva mbaʼéichapa oñemyatyrõta umi provléma oĩva koʼẽ koʼẽre. Conmemoraciónpe ñaimékuri 18.168.323, ha péva ohechauka ikatuha hetave tapichágui oiko testígo de Jehová oñehundi mboyve ko múndo aña.
Jehová oipotaha peve ñande japredikáta kyreʼỹme, ha jajapóta opa ikatumíva ñamog̃uahẽ hag̃ua pe marandu porã ñande territóriope (Mat. 24:14; Mar. 13:10). Japredikávo umi héntepe hógape, kállere, plása térã negosiohárupi, jahaívo kárta térã ñañeʼẽvo teléfonope, ñañehaʼãkena jaikuaauka maymávape Jehová réra ha hembipota.
Ikatu jajerovia koʼẽrõitéma Jehová ojapotaha oñekotevẽva omomarangatu hag̃ua héra (Eze. 36:23). Og̃uahẽʼíntema pe ára ojejurumboty hag̃ua entéro umi otakývape Jehová rérare. Ajépa ovyʼaitéta upéva oiko vove, entéro Jehová rembiguaikuéra oñehaʼãva oikuaauka Héra ha oñemoĩ igoviérno ykére.
Jehová ohayhu hembiguaikuérape ha oñangareko hesekuéra. Upéva ojekuaa porã pe aty guasu tres diaguápe hérava “Peñatende Porãke”, ojejapovaʼekue 2009-pe. Heta hendápe ojejapo avei asamblea internacional. Koʼã aty ningo tuichaiterei mbaʼe Jehová puévlope g̃uarã ha ñanepytyvõ jahecha hag̃ua mbaʼérepa tekotevẽterei jajesareko meme Jehová ára guasúre (Mar. 13:37; 1 Tes. 5:1, 2, 4).
Añetehápe jaʼekuaa Jehová imbaʼeporãha ñanendive; Haʼe ningo ñanembopyʼarory. Haʼete ñandegueraháva kapiʼipe hovyũ asývare, oĩháme ysyry piroʼysã asy japytuʼu hag̃ua (Sal. 23:1, 2; 100:2, 5).
Ore ermanokuéra, pejeroviákena Jehová akóinte penderovasataha pembaʼapo kyreʼỹramo Irréino rehehápe umi més oúvape.
Penemanduʼákena avei ore pohayhuetereiha.
Pene ermanokuéra,
Cuerpo Gobernante de los testigos de Jehová