JAJAPO RREVISÍTA
LEKSIÓN 7
Ani eñentrega
Téxto bíblico: ‘Ha káda día osegi omboʼe ha oikuaauka hikuái umi notísia porã’ (Hech. 5:42).
¿Mbaʼépa ojapo vaʼekue Pablo?
1. Ehecha pe VIDÉO, térã elee Hechos 19:8-10. Upe rire erresponde koʼã porandu:
¿Mbaʼérepa jaʼekuaa Pablo noñentregái hague oĩramo jepe oñemoĩ mbaretéva hese?
¿Káda mboýpa Pablo oipytyvõ umi ohendu porã vaʼekuépe chupe, ha mboy tiémporepa ojapo upéva?
¿Mbaʼépa ñaaprende Páblogui?
2. Tekotevẽ jajesakrifika ha ñamboyke heta tiémpo jajapo porã hag̃ua umi rrevisíta ha ñamoñepyrũ hag̃ua kúrso bíblico.
Jasegíkena Pablo ehémplo
3. Jaha vaʼerã javisita jey umi ohendu porã vaʼekuépe, pe óra opyta porãvehápe chupekuéra. Ñañeporandu vaʼerã: “¿Arakaʼe ha moõpa opyta porãvéta pe persónape añemongeta jey hag̃ua hendive? ¿Mbaʼe moméntopepa orekovéta tiémpo oñemongeta hag̃ua chendive?”. Jaha jey vaʼerã javisita umi ohendu porã vaʼekuépe ijetuʼúramo jepe ñandéve jaha pe óra okonvenivévape chupekuéra.
4. Emoĩ peteĩ óra ha día. Eñemongetapa rire pe persónandi, eñehaʼã emoĩ peteĩ día ha óra pesegi hag̃ua peñemongeta. Upéi eñehaʼãmbaite ekumpli la epromete vaʼekue.
5. Eñehaʼã siémpre ndepositívo. Ani epensa pe persóna ndoikuaaseiha mbaʼeve la Bíbliagui ijetuʼu haguére etopa hag̃ua hese térã naitiempoguasúi rupi (1 Cor. 13:4, 7). Iñimportánte ñañehaʼã jey jey jatopa pe ohendu porã vaʼekuépe, péro iñimportánte avei jajasegura ani hag̃ua japerde rei hese ñane tiémpo (1 Cor. 9:26).