Pe aty guasúpe ñamombaʼe Jehovápe

1, 2. Mbaʼe oportunidápa omeʼẽ ñandéve ñane asambléa de distríto, ha mbaʼéicha ikatu jajapo upéva?

¹ Umi asambléa de distríto jaguerekóva káda áño omeʼẽ ñandéve oportunida iporãitereíva ñamombaʼeguasu hag̃ua Jehovápe. Ñañeñandu David oñeñanduhaguéicha, opurahéirõ guare: “Che añetehápe romombaʼéta pe aty guasu oĩháme, ha umi tapicha hetaiterei ijatyhápe romomorãta” (Sal. 35:18). Mbaʼéichapa ikatu jaikuaa opavave ñamomorãtaha Jehovápe pe Asambléa de Distríto jaguerekótavape, hérava “Ñaneñeʼẽrendu Ñandejárape”?

² Upéva ikatúta jajapo ñane rembiapo porã rupive. Peteĩ administradór oñangarekóva peteĩ lugár ojejapohaguépe asambléa heʼi: “Rohecha rire pene asambléa, oĩ jave umi ótro grúpo rrelihióso oiporuséva ko lugár roʼe chupekuéra ou hag̃ua ohecha mbaʼéichapa peẽ pejapo jave pene asambléa, peguereko opa mbaʼe hendápe porã”. Pe ñamondéva, umi jeguaka jaiporúva, mbaʼéichapa ñaipytyvõ oñekotevẽhápe ha pe teko porã jaguerekóva, oipytyvõ oñemomorã hag̃ua ñane rembiapo. Pe oñemomorãva añetehápe haʼe Jehová (1 Ped. 2:12).

3, 4. Mbaʼéichapa pe akãguapy ñanepytyvõta ñañemonde hag̃ua peteĩ minístro kristiánoicha, ñaime aja asambleahápe ha upe rire avei?

³ Mbaʼéichapa ñañemonde ha ñañembojegua. Ñane akãguapyvaʼerã ñañemonde ha ñañembojegua hag̃ua ñamomorã hag̃uáicha Jehovápe (1 Tim. 2:9). Pe lívro Benefíciese páhina 132-pe heʼi: “Peteĩ iñakãguapýva ojepyʼapy ani hag̃ua ombopochy rei hapichápe, ha noñemondéi oñemaña hag̃uáicha hese”. Heta hendárupi hetave oĩ umi oñemonde vaíva. Jehová katu omombaʼe pe jajapóva ñañehaʼãramo jagueraha héra hekópe porã (Hech. 15:14). Ojejapóramo jepe ñane asambléa peteĩ estádiope, térã umi depórte ojepraktikahápe, pe asambléa oiko aja jaguereko upépe ñande “aty guasu”. Upévare, ñande aty aja upépe Jehová renondépe, ñañemondevaʼerã ñambovyʼa hag̃uáicha ichupe, pe Tekove ijyvatevéva oĩva ko univérsope (1 Cró. 29:11).

⁴ Káda día opa rire pe prográma tekotevẽ ñañatende avei ñandejehe, ñande ao ha ñande jeguakáre. Ñamondeséramo jepe umi ao jaiporúva ñaime rei jave, térã jaha hag̃ua peteĩ rrestaurántepe, tekotevẽ gueteri pe ñamondéva ha ñande jeguaka ohechauka ‘jaserviha Ñandejárape’ (1 Tim. 2:10). Nañamaʼẽi ko múndope ojeporuvévare jaikuaa hag̃ua mbaʼe aópa ñamondéta (1 Juan 2:16, 17). Ñane puvlikasionkuéra oguereko heta taʼanga ohechaukáva mbaʼéichapa ikatu ñañemonde opaichagua hendápe. Jaiporu meméramo ñande tarhéta asambléa rehegua pe táva ojejapohápe pe asambléa, ñanemomanduʼáta ñande minístro kristianoha jaha jahahápe (2 Cor. 6:3, 4).

5, 6. Mbaʼéichapa ikatu jahechauka ñamombaʼeha Jehová mesa espirituál?

⁵ Ñamombaʼe Jehová mesa espirituál. Ko univérso Mburuvicha Guasu omoĩ ñane renondépe peteĩ okasión javyʼa hag̃ua (Isa. 25:6; 1 Cor. 10:21). Ñamombaʼéramo pe lugár oñemeʼẽva ñandéve Jehová mesa espirituálpe, ñañehaʼãta ñaime káda día pe asambléape. Ndépa reguerekóma moõpa repytáta ha mbaʼéichapa rehóta? Reñeʼẽmapa nembaʼapohápe ani hag̃ua rembaʼapo asambléa aja? Reikuaámapa mboy tiémpo reiporúta rejeprepara ha reho hag̃ua, ikatu hag̃uáicha reg̃uahẽ voi porã reiporavo hag̃ua moõpa reguapýta, reñemongeta hag̃ua umi ermáno ndive ha hendivekuéra remomorã hag̃ua Jehovápe pe purahéi ha peñemboʼévo oñondivepa oñepyrũvo pe asambléa? (Sal. 147:1.)

⁶ Ñamombaʼéramo Jehová mesa ñañatende porãta pe prográma aja, nañañeʼẽmoʼãi ñande ykeregua ndive natekotevẽiramo, ndajakarumoʼãi ni ndajaguatamoʼãi upérupi pe prográma oiko aja. Jehová oiporu pe tembiguái jeroviaha ha iñarandúva omeʼẽ hag̃ua ñandéve pe tembiʼu espirituál ñaikotevẽva ko tiémpope (Mat. 24:45). Naiporãmoʼãi ñandéve g̃uarã jajavýramo michĩmi jepe pe tembiʼu espirituál. Tuvakuéra oguapyvaʼerã taʼyrakuéra ndive, ha oipytyvõvaʼerã chupekuéra pe asambléa ojapo porã hag̃ua hesekuéra (Deut. 31:12).

7. Mbaʼépa ojejerure ñandéve jajapo hag̃ua jakaru hag̃ua asambleahápe, ha mbaʼérepa?

⁷ Ojejerure ñandéve jagueraha hag̃ua ñane rembiʼurã, ani hag̃ua ñasẽ asajekue pe asambléa oikohágui jaheka hag̃ua tembiʼu. Pe asambléa ohasavaʼekuépe haimete enterove ojapo pe ojejerurevaʼekue, ha upéva ñanembovyʼa. Iporãitétapa enterove jajapóramo upéicha avei ko asambléa oúvape (Heb. 13:17). Jajapóramo pe ojejerureháicha ñandéve, jaguerekovéta tiémpo javyʼa hag̃ua ñane ermanokuéra ndive, ha ñameʼẽ hag̃ua ñandejehegui, ñaime hag̃ua upépe peteĩ ñeʼẽme ha pyʼaguapýpe, ha upéicha ñamomorã hag̃ua avei Jehovápe (Sal. 133:1).

8, 9. Mbaʼéichapa ikatúta avei ñamomorã Jehovápe pe asambléa oúvape?

⁸ Japredika oimehápe. Jahakuévo asambleahápe, ha jaju jeývo, heta hendápe ikatu ñañeʼẽ Jehovágui (Heb. 13:15). Jakaru jave peteĩ rrestaurántepe, térã ñañemongeta jave umi tapicha ndive japytahárupi, ñañehaʼãvaʼerã ñañeʼẽ Ñandejára propósitogui. Ñane akã ha ñane korasõ henyhẽta hetã rrikésa espirituálgui. Ñañeʼẽkena umi mbaʼe porãgui ikatu vove jatopahápe tapichakuéra (1Ped. 3:15).

⁹ Jaipotáma og̃uahẽ pe asambléa, ikatu hag̃uáicha ñavendesi Jehovápe ‘umi tapichaita ijatýva apytépe’ (Sal. 26:12). Enterovékena peteĩ ñeʼẽme ñamomorã Jehovápe ñane asambléa de distríto oúvape, hérava ‘Ñaneñeʼẽrendu Ñandejárape’.

[Rrekuádro oĩva páhina 5-pe]

Marandukuéra Asambléa de Distrítope g̃uarã

◼ Prográma. Pe prográma oñepyrũta pyhareve lás 9:30 káda día. Ikatúta jaike pe asambléa oikotahápe káda pyhareve lás 8:00. Oñepyrũ mboyvemi, pe sesión omoakãva oguapýta pe platafórmape oñehendu aja músika teokrátika. Upérõ g̃uarã hiʼãma enterove jaguapypa, ikatu hag̃uáicha pe prográma oñepyrũvo opa mbaʼéma oĩ hendápe porã. Viernes ha sábado pe prográma kaʼarugua opáta lás 5:05, ha Domingo opáta lás 4:10.

◼ Estasionamiénto. Oĩháme estasionamientorã ñande ñañangarekóva, ikatúta ojeporu ojepagaʼỹre mbaʼeve. Ojeikéta henyhẽmeve pe lugár. Ñande tarhéta asamblea rehegua jahechaukavaʼerã jaike hag̃ua. Ndatuicháiramo pe estasionamiénto, umi oguerekóva áuto ikatu oñomongeta oho hag̃ua oñondive. Upéicha káda áuto ikatúta henyhẽ, ohorangue peteĩ térã mokõi persónante káda áutope.

◼ Kontrivusión. Ojejapo hag̃ua peteĩ asambléa de distríto oĩ heta gásto. Ikatu upéva ñamombaʼe ha ñameʼẽ ñane kontrivusión. Ikatu ñamoĩ ñane Salón del Réinope térã pe asambléa oikohápe, ñaipytyvõ hag̃ua pe predikasión mundiál ojejapóvape.

◼ Umi nohenduporãivape g̃uarã. Ikatúta ojeporu rrádio FM oñehendu hag̃ua ko asambléa. Oñehendúta pe asambléa jerére añónte. Oñepyrũvo pe prográma ojejapóta peteĩ anúnsio upéva rehegua. Reiporútaramo, reguerahavaʼerã peteĩ rrádio FM ha peteĩ aurikulár remoĩ hag̃ua nde apysápe.

◼ Tembiʼu asaje g̃uarã. Jaguerahákena ñane rembiʼurã, ani hag̃ua ñasẽ asajekue jaheka pe jaʼuvaʼerã. Ikatu jagueraha peteĩ mbaʼyru ñamoĩ hag̃ua ñane asiénto guýpe. Pe asambléa oikohápe ndaikatúi jagueraha mbaʼyru tuichaitereíva, térã vevída alkoólika.

◼ Ojegrava hag̃ua. Pe asambléa oikohápe ndaikatúi oñemoĩ mbaʼeveichagua gravadóra pe sistéma eléktrikore, ni pe sistéma de sonídore, ha ikatu ojeporu nomolestáiramo avavépe.

◼ Fóto oguenohẽsévape g̃uarã. Renohẽramo fóto, ndaikatúi ojeporu flásh pe prográma oiko aja.

◼ Teléfono selulár ha komunikadór. Umíva ikatu ojeprepara ani hag̃uáicha oporomolesta.

◼ Aksidénte ha emerhénsia. Oĩramo peteĩ oñepyrũva hasyete pe asambleahápe, oñemombeʼu pyaʼe vaʼerã peteĩ akomodadórpe. Haʼe ohenóita pyaʼe porã umi ermáno ombaʼapóva Primeros Auxilios departaméntope. Upépe oĩ umi ikatúva oñatende pe hasývare. Haʼekuéra ndaikatúiramo oipytyvõ chupe heʼíta mbaʼépa ikatu ojejapo.

◼ Hotel. (1) Reiporútaramo peteĩ hotel, reñongatukavaʼerã umi koty reikotevẽtavante, ha naiporãi hetave persóna oiporu peteĩ koty pe oñepermitívagui. (2) Ndereiporumoʼãiramo peteĩ koty reñongatukavaʼekue rehenoivaʼerã pe hotélpe pyaʼe porã remombeʼu hag̃ua chupekuéra. (3) Ani rekosina nde kotýpe pe hotélpe, ndahaʼéiramo peteĩ koty oñemeʼẽva upévarã. (4) Eheja propína káda día pe kotýre oñangarekóvape. (5) Ani reiporu vai pe tembiʼu oñemoĩva rambosag̃ua, térã pe kafe ha iélo oñemeʼẽva reiporu hag̃ua reime aja pe hotélpe. (6) Reñemongeta vove pe hotélpe ombaʼapóva ndive, ehechauka reguerekoha pe frúto Ñandejára espíritu omoheñóiva, espesialménte oñembaʼapo jave nde kuatiáre reike hag̃ua pe hotélpe ha resẽta jave.