Mbaʼe ehémplopa ñameʼẽñaína?
1. Mbaʼépa oaprendéne Jesús remimboʼekuéra omañávo iñehémplore?
1 Jesús ningo ndahaʼéi ku heʼínteva mbaʼépa ojejapovaʼerã, síno oporomboʼe iñehémplo rupive. Haʼe heʼivaʼekue: ‘Peñemoĩ chendive che júgo guýpe ha che pomboʼéta’ (Mat. 11:29, NM). Katuete hetaiterei mbaʼe oaprende chugui hemimboʼekuéra. Ohecháne mbaʼéichapa hory, imbaʼeporã ha imbaʼerechakuaa (Mat. 8:1-3; Mar. 6:30-34). Ha arakaʼeve noñemombaʼeguasúi (Juan 13:2-5). Ohecháne avei hikuái mbaʼéichapa ikatupyry ha opredika kyreʼỹme (Luc. 8:1; 21:37, 38). Ha ñande, mbaʼe ehémplopa ñameʼẽ japredika jave?
2. Mbaʼérepa iñimportánte ñañemonde hekopete ha jaikokuaa ñande rapichakuéra renondépe?
2 Mbaʼépa opensa umi ñanerendúva. Ñañemondéramo hekopete, jaikokuaa ha jajepyʼapy añetérõ ñande rapicháre katuete ñanerendu porãta hikuái (2 Cor. 6:3; Fili. 1:27). Iñimportanteterei avei jaiporu meme la Biblia ha jajapysaka porã hesekuéra oñeʼẽ jave. Jajapóramo koʼã mbaʼe ñamoĩñaína ehémplo porã chupekuéra ha katuete oñehendu porãvéta Ñandejára marandu.
3. Mbaʼéichapa ñane ehémplo ikatu omokyreʼỹ ñane ermanokuérape?
3 Mbaʼépa opensa ñane ermanokuéra. Ñanekyreʼỹramo predikasiónpe umi ermáno katuete ikyreʼỹta avei opredika hag̃ua. Ha ñañembosakoʼi porãramo ñaikuaveʼẽ hag̃ua umi puvlikasión, umi ermáno osẽva ñanendive ikyreʼỹta avei oñembosakoʼi hag̃ua. Heʼi voi ningo la Biblia: ‘Iérro niko iérrope jey oñehaimbeʼe, yvypóra katu oñehekomboʼe hapicha ndive oñemongetávo’ (Pro. 27:17). Ñañehaʼãmbaitevaʼerã ñakumpli porã ñane rembiapo ñaanotávo máva mávapa ñanerendu porã ha javisita jey chupekuéra pyaʼe porã. Jajapóramo upéicha ambue ermáno oñehaʼãta avei osegi ñane ehémplo (2 Tim. 4:5).
4. Mbaʼérepa iporã jajepyʼamongeta umi mbaʼe jaʼe ha jajapóvare?
4 Jajepyʼamongetavaʼerã umi mbaʼe jaʼéva ha jajapóvare ha ñañeporandumi: “Mbaʼépa oaprende umi ótro chehegui?”. Jajapóramo opa mbaʼe Jehová oipotaháicha haʼe ñandeguerohorýta. Ha péicha ikatúta jaʼe apóstol Pablo heʼivaʼekue: ‘Peiko chéicha, che aikógui Cristo oiko haguéicha’ (1 Cor. 11:1, BNP).