¿Ikatúnepa ñasẽ japredika kaʼaruete?

1. Heʼiháicha peteĩ lívro, ¿mbaʼe órapa opredikámi vaʼekue apóstol Pablo?

¹ Peteĩ lívro hérava Daily Life in Bible Times (La vida cotidiana en tiempos bíblicos) heʼi apóstol Pablo opredikámi hague kaʼarukue, las cuatro guive kaʼarupytũ meve. Ndajaikuaái ningo haʼépa ojepokuaánte voi opredika upe órape, péro jaikuaa haʼe oĩ hague ojapo hag̃uáicha oimeraẽ mbaʼe “pe marandu porã rehehápe” (1 Cor. 9:19-23). Ha upearã oiméne omohenda porã rakaʼe itiémpo opredika hag̃ua ogahárupi pe óra opyta porãvetahápe umi héntepe.

2. ¿Mbaʼérepa iporãta ñasẽramo japredika kaʼaruete?

² Heta hendárupi, umi maranduhára ojepokuaa káda semána opredika ogahárupi pyharevekue. Péro, ¿upe órapepa jatopave hína umi hénte oĩvare ñande territóriope? Peteĩ prekursór omombeʼu: “Saʼi rotopa umi héntere de día, péro pyharekue katuete rotopa hesekuéra”. Upe órape ningo umi hénte itrankilove ha naiprovlémai oñemongeta hag̃ua. Avei ikatu jatopave umi kuimbaʼére japredika hag̃ua chupekuéra. Upévare, oiméramo pende territóriope ojetopave umi héntere pyharekue, ansianokuéra ojapovaʼerã avei kaʼaruete pe aty oñesẽ hag̃ua ojepredika.

3. ¿Mbaʼéichapa jahechaukáta ñanembaʼerechakuaa ha ñañatendeha japredikávo pyharekue?

³ Ñanembaʼerechakuaa ha ñañatendékena. Japredikáramo pyharekue ñanembaʼerechakuaavaʼerã. Pór ehémplo, ñag̃uahẽramo peteĩ ógape oñesena jave, ikatúnte jaʼe jaju jeytaha ag̃amieve. Ha avei ani ñañemoĩ iñypytũhápe, ikatu hag̃uáicha pe ogajára ñanderecha porã, ha pyaʼe porã jaʼevaʼerã chupe mávapa ñande ha maʼerãpa jaha hógape. Ndovaléi tardeterei ñag̃uahẽ umi hénte rógape, ikatúgui ojepreparáma hína oke hag̃ua (2 Cor. 6:3). Avei naiporãmoʼãi ojeho umi lugár iñypytũetereihápe térã ndaiporiguasuihápe hénte. Ha jahátaramo umi ipeligrosohápe katu, ikuentavéta japredikáramo pytũ mboyve (Prov. 22:3). Nañasẽivaʼerã avei ñaneaño ha ndovaléi ñañemomombyry umi ótro ermánogui.

4. ¿Mbaʼépa jahupyty japredikávo kaʼaruete?

⁴ Umi mbaʼe porã jahupytýva. Javyʼaiteve predikasiónpe jatopa ha ñañemongeta porãramo umi héntendi. Jaikuaa ningo péicharõ mante ikatutaha ñaipytyvõ hetavépe oaprende hag̃ua la Bíbliagui ha ojesalva (1 Tim. 2:3, 4). ¿Ikatúpa ñamohenda porã ñane tiémpo japredika hag̃ua kaʼaruete?