Jasegíkena ñahaʼarõ pe siuda oĩtava pára siémpre

1. ¿Mbaʼépa Jesús oavisa vaʼekue oikotaha Jerusalén rehe?

UNOS kuánto día Jesús omano mboyvemi haʼe omombeʼu vaʼekue peteĩ profesía idisipulokuérape. Tenonderã ko profesía oñekumpli vaʼekue Jerusalén ha pe témplo oñehundírõ guare. Jesús oporoavisa vaʼekue umi ‘ehérsito omongoráta hague Jerusalén’ (Luc. 21:20). Haʼe heʼi vaʼekue idisipulokuérape ohecháre umi ehérsito haʼekuéra upepete okañy vaʼerã ha oho pe siudágui. Upe rire oñekumpli la Jesús heʼi vaʼekue ha umi ehérsito rrománo omongora vaʼekue Jerusalén (Luc. 21:​21, 22).

2. ¿Mbaʼépa Pablo heʼi vaʼekue umi kristiánope Judea ha Jerusalén rehe?

² Unos kuánto áño umi ehérsito rrománo omongora mboyve Jerusalén, Pablo oskrivi vaʼekue peteĩ kárta umi oikóvape Jerusalén ha Judéape g̃uarã, upe kárta koʼág̃a oĩ la Bíbliape ha ñahenói chupe Hebreos. La heʼíva pe kárta iñimportanteterei vaʼekue, upépe Pablo omeʼẽ unos kuánto konsého oipytyvõ hag̃ua umi kristiánope ojeprepara hag̃ua la oútavape g̃uarã. ¿Péro mbaʼépa la ohaʼarõva chupekuéra? Jerusalén oñehundíta kuri. Umi kristiáno ojesalva hag̃ua tekotevẽ vaʼekue oĩ preparádo oheja hag̃uáicha hóga ha inegosiokuéra. Upévare Pablo oñeʼẽrõ guare Jerusalénre heʼi vaʼekue: “Jaikuaa koʼápe ndajaguerekoiha peteĩ siuda oĩtava pára siémpre, péro ñande pyʼaite guive ñahaʼarõ pe siuda oútava amo gotyove” (Heb. 13:14).

3. ¿Mbaʼépa hína “pe siuda oguerekóva simiénto teete”, ha mbaʼérepa jasegi ñahaʼarõ upe siuda?

³ Umi kristiáno odesidírõ guare osẽ Jerusalén ha Judéagui heta hénte oñembohory hesekuéra ha heʼi itavyha hikuái, péro umi kristiáno ojesalva odesidi haguére upéva. Koʼág̃a avei la hénte oñembohory ñanderehe. ¿Mbaʼérepa? Pórke nañañehaʼãi ñandepláta heta ha nañapensái umi umáno osolusionataha entéro umi provléma. ¿Mbaʼérepa jadesidi ñapensa upéicha? Pórke ñande jaikuaa koʼẽrõitéma Ñandejára ojevaletaha Irréinore ohundi hag̃ua ko múndo aña. Upévare ñande ñahaʼarõ Ñandejára Rréino haʼéva hína “pe siuda oguerekóva simiénto teete” (Heb. 11:10; Mat. 6:33).a Ñaanalisakuévo umi subtítulo jahecháta mbohapy mbaʼe: 1) Mbaʼéichapa pe konsého Pablo omeʼẽ vaʼekue umi kristiánope oipytyvõ chupekuéra osegi hag̃ua ohaʼarõ “pe siuda oútava amo gotyove”, 2) mbaʼéichapa Pablo oipytyvõ umi kristiánope ojeprepara hag̃ua la oútavape g̃uarã, ha 3) mbaʼéichapa upe konsého ñanepytyvõ koʼág̃a.

JAJEROVIÁKENA JEHOVÁRE PÓRKE HAʼE NÚNKA NAÑANDEREJAMOʼÃI

4. ¿Mbaʼérepa umi kristiánope g̃uarã iñimportánte vaʼekue Jerusalén?

⁴ Jerusalén haʼe vaʼekue peteĩ siuda iñimportánteva umi kristiánope g̃uarã. Upépe oñepyrũ vaʼekue pe primera kongregasión áño 33-pe, ha pe kuérpo governánte oĩ vaʼekue avei upe siudápe. Hiʼarive upépe heta kristiáno oguereko la hóga ha hetave mbaʼerepy, péro Jesús oavisa vaʼekue chupekuéra tekotevẽtaha osẽ Jerusaléngui ha avei Judéagui (Mat. 24:16).

5. ¿Mbaʼéichapa Pablo oipytyvõ vaʼekue umi kristiánope ojeprepara hag̃ua la oikótavape g̃uarã?

⁵ Pablo oipota vaʼekue umi kristiáno oĩ preparádo osẽ hag̃ua Jerusaléngui. Upévare oipytyvõ chupekuéra ontende hag̃ua mbaʼépa Jehová opensa pe siudáre. Pe apóstol omomanduʼa chupekuéra Jehová ndoguerohoryveimaha pe servísio omeʼẽva umi saserdóte ha ndoaseptaveimaha umi sakrifísio ojejapóva upépe (Heb. 8:13). La majoría umi oikóva Jerusalénpe orrechasa vaʼekue pe Mesíaspe. Natekotevẽvéima kuri ojeho Jerusalénpe añoite ojeadora hag̃ua Jehovápe, upéva rangue Jerusalén ha pe témplo oñehundíta kuri (Luc. 13:​34, 35).

6. ¿Mbaʼérepa umi kristiáno tekotevẽ kuri ohendu pe konsého Pablo omeʼẽ vaʼekue chupekuéra oĩva Hebreos 13:​5, 6-pe?

⁶ Apóstol Pablo oskrivírõ guare umi hebréope, Jerusalén haʼe vaʼekue peteĩ siuda oho porãitereíva hese. Peteĩ eskritór rrománo upe tiémpope guare heʼi vaʼekue Jerusalén haʼe hague pe siuda ifamosovéva oĩva upe sónape. Umi judío oviaha vaʼekue upépe káda áño omboarete hag̃ua umi fiésta ha upéva oipytyvõ oike hag̃ua pláta pe siudápe. Upéva ideprovéchone rakaʼe avei algúno kristiánope pórke ou iplatave. Oiméne upévare Pablo heʼi vaʼekue chupekuéra: “Aníkena peiko pendeplatarayhu, upéva rangue pevyʼáma vaʼerã umi mbaʼe perekóvare”. Upéi Pablo omensiona la heʼíva peteĩ párte Ñandejára Ñeʼẽ. Upépe Jehová oasegura káda únope: “Núnka ndorohejamoʼãi ha núnka nderepytamoʼãi neaño” (elee Hebreos 13:​5, 6; Deut. 31:6; Sal. 118:6). Umi kristiáno oikóva Jerusalénpe ha Judéape tekotevẽta kuri upéi imanduʼa Jehová ndohejamoʼãiha chupekuéra. ¿Mbaʼérepa jaʼe upéva? Pórke orresivi riremínte upe kárta haʼekuéra ohejámante vaʼerã kuri hóga, inegósio ha imbaʼerepy. Upéi oñepyrũta kuri oiko hikuái peteĩ lugár ipyahúvape chupekuéra g̃uarã.

7. ¿Mbaʼérepa koʼág̃ama voi jajeroviave vaʼerã Jehováre?

⁷ ¿Mbaʼépa ikatu ñaaprende? ¿Mbaʼépa oikóta koʼẽrõitéma? Pe “jehasa asy guasu” oñepyrũta ha ko múndo aña oñehundíta (Mat. 24:21). Umi kristiáno Jerusalénpe guaréicha tekotevẽ avei ñande ñañatende porã ha jajeprepara (Luc. 21:​34-36). Pe jehasa asy guasu aja ikatu hína avei japerde ñande róga, ha entéro umi ótra kósa jarekóva. Upe tiémpope jaguerovia vaʼerã ñande pyʼaite guive Jehová nañanderejamoʼãiha. Koʼág̃ama voi oñepyrũ mboyve pe jehasa asy guasu ikatu jahechauka jajeroviápa hína Jehováre. Eñeporandumína: “¿Ojekuaápa la ajapóvare ha umi mbaʼe ahupytysévare ajeroviaha Jehováre ha ndahaʼéi pe plátare?” (1 Tim. 6:17). Ikatu ningo ñaaprende heta mbaʼe la oiko vaʼekuégui umi kristiáno yma guarére. Péro ñanemanduʼa vaʼerã pe jehasa asy guasu oútava ijetuʼuetereivetaha, núnka ndoikóiva peichagua jehasa asy. Upéicharõ, ¿mbaʼéichapa jaikuaáta mbaʼépa jajapo vaʼerã oñepyrũ vove pe jehasa asy guasu?

ÑANEÑEʼẼRENDÚKENA UMI ÑANDEGIÁVAPE

8. ¿Mbaʼépa Jesús heʼi vaʼekue idisipulokuérape?

⁸ Pablo omondo rire ikárta umi hebréope, ohasa unos kuánto áñonte ha umi kristiáno ohecháma umi ehérsito rrománo omongoraha Jerusalén. Oikórõ guare upéva haʼekuéra oikuaáma kuri og̃uahẽma hague pe tiémpo osẽ hag̃ua Jerusalén ha Judéagui, pórke upe riremíntema oñehundíta kuri upe lugár (Mat. 24:3; Luc. 21:​20, 24). ¿Péro moõpa oho vaʼerã hikuái okañy? Jesús sólamente heʼi vaʼekue chupekuéra: “Peẽ peikóva Judéape, pedipara vaʼerã peho umi montáñare” (Luc. 21:21). Upérupi oĩ vaʼekue heta montáña, ¿moõite piko upéicharõ oho vaʼerã hikuái?

9. ¿Mbaʼérepa oiméne umi kristiáno oñeporandu mbaʼe montáñapepa oho vaʼerã hikuái? (Ehecha pe mápa).

⁹ Ñapensamína algúno umi montáña ikatu haguépe oho umi kristiáno okañy. Por ehémplo oĩ vaʼekue montáña Samáriape, Galiléape, Líbanope, avei oĩ vaʼekue Sérro Hermón ha oĩve vaʼekue montáña ojehasávo pe Rrío Jordán (ehecha pe mápa). Umi lugár oĩhárupi umi montáña oĩ vaʼekue umi siuda haʼetévaicha la isegúro porãva. Por ehémplo pe siuda hérava Gamala oĩ vaʼekue peteĩ montáña ijyvatéva ruʼãme, ha ijetuʼueterei vaʼekue oñeg̃uahẽnte hag̃ua upépe. Upévare algúno umi judío opensa vaʼekue upe siuda oikoiteha oho hag̃ua hikuái oiko upépe trankílo porã. Péro umi rrománo oataka ha ohundi vaʼekue upe siuda ha hetaiterei hénte oikóva upépe omano vaʼekue.b

10, 11. a) ¿Mbaʼéichapa oiméne Jehová ogia vaʼekue umi kristiánope? (Hebreos 13:​7, 17). b) ¿Mbaʼépa oiko vaʼekue umi kristiáno iñeʼẽrendu rupi umi ogiávape chupekuéra? (Ehecha pe taʼanga).

¹⁰ Ikatu oime Jehová ojevale raʼe umi ermáno ogiávare pe kongregasión ikatu hag̃uáicha umi kristiáno oikuaa moõpa oho vaʼerã hikuái. Tiémpo rire peteĩ expérto hérava Eusebius oskrivi la oiko vaʼekue upe tiémpope. Haʼe heʼi Ñandejára oikuaauka hague algúno umi ermáno oĩvape Jerusalénpe umi kristiáno osẽ vaʼerãha Jerusaléngui ha oho Pélape, peteĩ siuda oĩva Peréape. Pe siuda hérava Pela opyta porã vaʼekue umi kristiánope pórke namombyryguasúi Jerusaléngui ha upévare ndahaʼéi kuri la ijetuʼuetereítava oñeg̃uahẽ hag̃ua upépe. Avei jareko vaʼerã enkuénta upe siudápe la majoría umi hénte ndahaʼéi hague judío, upévare haʼekuéra ndoikói vaʼekue oñorairõ umi rrománo kóntrape (ehecha pe mápa).

¹¹ Umi kristiáno ohóva okañy umi montáñare osegi vaʼekue Pablo konsého ha ‘iñeʼẽrendu umi ogiávape chupekuéra’ kongregasiónpe (elee Hebreos 13:​7, 17). Upéicha rupi Ñandejára puévlo ojesalva. Jehová ndohejareíri umi isiérvo ojeroviávape Irréinore, pórke haʼekuéra osegi vaʼekue “ohaʼarõ pe siuda oguerekóva simiénto teete” (Heb. 11:10).

12, 13. ¿Mbaʼéichapa Jehová ohechaukáma ogia hague ipuévlope ijetuʼúrõ guare la situasión?

¹² ¿Mbaʼépa ikatu ñaaprende? Jehová ojevale umi ermáno ñandegiávare omeʼẽ hag̃ua ñandéve umi instruksión ñaikotevẽva. La Bíbliape oĩ heta ehémplo ohechaukáva mbaʼéichapa Jehová ojevale vaʼekue umi kuimbaʼe ifiélvare ogia hag̃ua ipuévlope ijetuʼúrõ guare (Deut. 31:23; Sal. 77:20). Koʼág̃arupi avei ojekuaa porãiterei Jehová osegiha ojevale umi ogiávare ipuévlope.

¹³ Ñanemanduʼamína la oiko vaʼekuére oñepyrũrõ guare pe pandémia de COVID-19. Upérõ guare umi ermáno ñandegiáva omeʼẽ vaʼekue instruksión umi kongregasiónpe. Por ehémplo ojeʼe vaʼekue umi ansiánope mbaʼéichapa ojejapo vaʼerã umi rreunión ikatu hag̃uáicha jasegi jaadora Jehovápe. Unos kuánto mése pe pandémia oñepyrũ rire ojejapóma kuri peteĩ aty guasu mas de 500 idiómape. Umi ermáno ha ermána ikatu vaʼekue ohecha pe aty guasu Internet térã televisión rupive ha oĩ vaʼekue umi ohendúva rrádio rupive. Upe tiémpo peve núnka ndojejapóiva gueteri peteĩ aty guasu peichagua. Jahecha mbaʼéichapa pe pandémia aja Jehová osegi vaʼekue omeʼẽ umi mbaʼe ñaikotevẽva ñamombarete hag̃ua ñande jerovia. Upéicha rupi ipuévlo osegi vaʼekue oĩ unído. Upévare toiko la oikóva amo gotyove, ndajadudái Jehová osegitaha oipytyvõ umi ermáno ñandegiávape odesidi porã hag̃ua. Jahecha haguéicha, ñaĩ hag̃ua preparádo pe jehasa asy guasúpe g̃uarã ha jadesidi porã hag̃ua tekotevẽ jajerovia Jehováre ha ñaneñeʼẽrendu. ¿Péro mbaʼe ótra kualidápa ñanepytyvõta avei upe tiémpope g̃uarã?

JAJOAYHU OÑOERMÁNOICHA HA JAJORRESIVI PORÃKENA

14. Ohechaukaháicha Hebreos 13:​1-3, ¿mbaʼe kualidápa tekotevẽ vaʼekue umi kristiáno ohechauka oñehundi mboyve Jerusalén?

¹⁴ Pe jehasa asy guasu oñepyrũ vove tekotevẽtereíta mas ke núnka jahechauka jajoayhuha. Upe tiémpope jasegi vaʼerã pe ehémplo ohejáva umi kristiáno oiko vaʼekue Jerusalén ha Judéape. Haʼekuéra siémpre voi ohechauka vaʼekue ojoayhuha (Heb. 10:​32-34). Péro unos kuánto áño oñehundi mboyve Jerusalén tekotevẽvéntema kuri haʼekuéra ohechauka ‘ojoayhuha oñoermánoicha’ ha ‘ojorresivi porã’ (elee Hebreos 13:​1-3).c Ha ñande avei tekotevẽtereíta jajapo upéva amás ke hiʼag̃ui pe tiémpo oñehunditahápe ko múndo aña.

15. ¿Mbaʼérepa tekotevẽ vaʼekue umi kristiáno ohechauka ojoayhuha ha ojorresivi porãha osẽ rire Jerusaléngui?

¹⁵ Umi ehérsito rrománo omongora vaʼekue Jerusalén péro derrepentete ohopa jey vaʼekue hikuái. Upepete umi kristiáno ikatu vaʼekue osẽ pe siudágui, péro ndaikatúi vaʼekue ogueraha hetaiterei mbaʼe (Mat. 24:​17, 18). Oviahakuévo hikuái og̃uahẽ hag̃ua umi montáñape odependémante vaʼerã kuri ojuehe, ha og̃uahẽ rire Pélape katu oñopytyvõ vaʼerã kuri ikatu hag̃uáicha oñepyrũ oiko hikuái peteĩ lugár ipyahúvape chupekuéra g̃uarã. Katuete oĩne raʼe umi ermáno ‘oikotevẽtereíva’ ajúda. Upépe umi kristiáno oreko vaʼekue oportunida ohechauka hag̃ua ojoayhuha oñoermánoicha ha ojorresivi porãha oñopytyvõvo ha okompartívo la orekóva (Tito 3:14).

16. ¿Mbaʼéichapa ikatu jahechauka jahayhuha ñane ermanokuérape oikotevẽ jave hikuái? (Ehecha pe taʼanga).

¹⁶ ¿Mbaʼépa ikatu ñaaprende? Jahayhu rupi ñane ermanokuérape ñaipytyvõ chupekuéra oikotevẽ jave. Por ehémplo oĩ heta Testígo oheja vaʼekue hóga pe gérra ha umi desástre naturál káusare. Upévare heta ñane ermáno omeʼẽ chupekuéra la oikotevẽva oikove hag̃ua ha omokyreʼỹ chupekuéra osegi hag̃ua oservi Jehovápe. Peteĩ ermána Ucraniagua oheja vaʼekue hóga pe gérra káusare. Haʼe heʼi: “Heta vésema ahecha Jehová oregia ha orepytyvõha umi ermanokuéra rupive. Haʼekuéra ningo orerresivi porã ha orepytyvõ Ucrániape, Hungríape ha koʼág̃a avei Alemániape”. Ñande ikatu jaheja Jehová ojevale ñanderehe ñaipytyvõ jave ñane ermanokuérape ha jakuidávo hesekuéra (Prov. 19:17; 2 Cor. 1:​3, 4).

17. ¿Mbaʼérepa iñimportánte koʼág̃ama voi jajoayhu oñoermánoicha ha jajorresivi porã?

¹⁷ Pe jehasa asy guasu oñepyrũ vove tekotevẽvétantema ñañopytyvõmba (Hab. 3:​16-18). Upévare Jehová koʼág̃ama voi ñandeprepara ikatu hag̃uáicha jajoayhu oñoermánoicha ha jajorresivi porã hag̃ua. Ani ñanderesarái koʼã kualida koʼytevéntema jahechauka vaʼerãha upe tiémpope.

¿MBAʼÉPA ÑANERAʼARÕ AMO GOTYOVE?

18. ¿Mbaʼéichapa ikatu jasegi umi kristiáno yma guare ehémplo?

¹⁸ Jerusalén oñehundírõ guare, ojesalva vaʼekue umi kristiáno iñeʼẽrendúva ha ohóva okañy umi montáñare. Haʼekuéra oheja vaʼekue pe siuda ha ikosakuéra, péro Jehová núnka ndohejái kuri chupekuéra. ¿Mbaʼépa ikatu ñaaprende iñehemplokuéragui? Ñande ningo ndajaikuaái entéro mbaʼe oikótava amo gotyove, péro Jesús ñandeavisáma ‘ñaime vaʼerãha preparádo’ (Luc. 12:40). Avei ikatu jajapo umi mbaʼe Pablo heʼi vaʼekue ikártape umi hebréope. Ñanemanduʼa vaʼerã avei Jehová oprometéma hague káda únope núnka nañanderejamoʼãiha (Heb. 13:​5, 6). Upévare jasegíkena ñahaʼarõ Ñandejára Rréino haʼéva hína pe siuda oĩtava pára siémpre. Péicha jadisfrutáta umi vendisión porã porã opa ára g̃uarã (Mat. 25:34).