ZASEŊƆ 23
YUUNƐ 2 Jehovah Is Your Name (Ho Yu’urɛ Dela Yehowa)
Yehowa Yu’urɛ La Pakɛ To La Wani?
“Na’ayenɛ yeti, . . . yamam . . . n de mam seradoma.”—ISA. 43:10.
YELEKPINE
Ton wan eŋɛ se’em pa’alɛ ti Yehowa dela zilamdaana ge ti sɛla woo ti Sitaana yele la dɛna pumpɔreŋɔ.
1-2. To eŋɛ la wani baŋɛ ti Yehowa yu’urɛ la pakɛ Yezu mɛ?
SƐLA yuun ka boi n pakɛ Yezu gana Yehowa yu’urɛ la. Nɛra ka boi n tabelɛ eŋɛ sɛla ti a basɛ ti nɛreba baŋɛ Yehowa yu’urɛ la gana Yezu. Wuu zaseŋɔ sɛka n tole la n pa’alɛ se’em la, Yezu yuun boti a ki la Yehowa yu’urɛ la zuo ti la niɛ peelumi pa’alɛ ti Yehowa dela zilamdaana ge ti a sarɔtɔ la me dɛna tontɔɔ. (Mr. 14:36; Heb. 10:7-9) Yezu Yuun Tusere Na’am Bisega la san ta ba’asɛ, a wan dekɛ kpe’eŋo la za’a bo Yehowa ti a yu’urɛ la ana zilam. (1 Ko. 15:26-28) Sɛla woo ti Yezu eŋɛ bo Yehowa pa’alɛ ti a nɔŋɛ en mɛ ti la ka tara makerɛ.
2 Yezu yuun wa’an tingɔŋɔ wa zuo ti a pa’alɛ nɛreba la Yehowa yɛla. (Yon 5:43; 12:13) A yuun basɛ ti a podɔleba la baŋɛ a Sɔ la yu’urɛ la. (Yon 17:6, 26) Eŋa n yuun pa’ali nɛreba ge tuna yelekiresi la, a yuun basɛ ti ba baŋɛ ti Yehowa n bo en yɛm la paŋa ti a ta’an ita bala. (Yon 10:25) Yezu yuun zusɛ Yehowa ti a bisera a podɔleba la “[A] yu’urɛ paŋa la poan.” (Yon 17:11) Naayinɛ yu’urɛ la yuun pakɛ Yezu mɛ gana sɛla woo. Bala la, nɛra wan eŋɛ la wani ta’an dɛna Krista podɔla a san ka mina Yezu Sɔ yu’urɛ?
3. To wan le sɔsɛ la bem zaseŋɔ wa poan?
3 Tomam n de yelemɛŋɛrɛ Kristakɔma la, Yehowa yu’urɛ la pakɛ to mɛ ti la pa’alɛ ti to tari la nɔŋerɛ la gilema bɔ’ɔra Yehowa ge me tɔɣesa Yezu. (1 Pe. 2:21) Zaseŋɔ wa poan, to wan baŋɛ sɛla n sɔi ti Yehowa dekɛ a yu’urɛ la bo sɛba n mɔɔli a “Sɔ’ɔlom yelesoma” la. (Mt. 24:14) Leyɛ’ɛsa, to wan sɔsɛ baŋɛ Yehowa yu’urɛ la n pakɛ tomam ayima ayima woo se’em.
‘NYƐ NƐREBA DEKƐ A YU’URƐ LA SIƔƐ BA’
4. (a) Yezu yuun dekɛ la bem tuunɛ bo a podɔleba la ge nyaa lebe saazuo? (b) Bem sokere ti to wan soke tomea tuunɛ wa poan?
4 Yezu n yuun yeti a lebe saazuo la, a yuun yele a podɔleba la ti: “Ya wan nyɛ paŋa la Yenɛ Sea la han wa’an ya zen’en na. Bilam te ya wan yele nɛreba Yerusalem teŋa poan, la Yudea teŋa poan, la Samaria teŋa poan la teŋhe zan’an yɛhera la yan mi mam se’em.” (Tm. 1:8) Bala pa’alɛ ti ba wan mɔɔlɛ yelesoma la ta yakɛ Israel tiŋa. Bala n wan basɛ ti tiŋa woo nɛreba ta’an nyɛ yɔ’ɔ ta dɛna Yezu podɔleba. (Mt. 28:19, 20) Ge Yezu yeti: “yan mi mam se’em” la ti ya wan mɔɔlɛ. Podɔleba wa n nan de saama la nari ti ba mina Yehowa yu’urɛ la bii ba wan mɔɔla la Yezu yɛla ma’a? Yelese’a n boi Tooma a zuo 15 la wan soŋɛ tɔ ti to baŋɛ sokere wa lebesego.
5. Tuntuneba la keendoma la n yuun boi Yerusalem la yuun eŋɛ la wani pa’alɛ ti la nari ti nɛra woo baŋɛ Yehowa yu’urɛ la? (Bisɛ foote la.)
5 Yuun 49 Y.B. poan, tuntuneba la keendoma la n yuun boi Yerusalem la yuun laɣum sɔsɛ mɛ ti ba baŋɛ nyaa satimadoma la nari ti ba ŋma ge nyaa dɛna Kristakɔma. Sɔsega la ba’asegɔ la, Yames n yuun de Yezu suɔ la yuun yeti: ‘Simeon tɔɣɛ soŋa soŋa pa’alɛ Naayinɛ n eŋɛ se’em pɔsɛ ŋmɛregɛ a puti’irɛ bo tisi la ti a ta’an nyɛ nɛreba dekɛ a yu’urɛ la siɣɛ ba.’ Yames yuun tɔɣeri la ani yu’urɛ yele? A yuun le tɔɣɛ Amos n gulesɛ sɛla la yeti: ‘La wan eŋɛ se’em ti nɛresɛba n gee la ta’an naɛ la tisi la nɛreba laɣum ãregɛ bamesi ɛ Yehowa, nɛresɛba ti ba tara mam yu’urɛ la yi’ira ba la.’ (Tm. 15:14-18) Daɣɛ ti podɔleba wa wan mina la Yehowa yu’urɛ la ma’a ge ‘a wan dekɛ a yu’urɛ la siɣɛ ba.’ Bala pa’alɛ ti ba wan basɛ ti nɛreba baŋɛ Naayinɛ ge ti nɛreba me mina ti Naayinɛ dekɛ a yu’urɛ la siɣɛ la bamam.
Yuun kɔbesɛka n deŋɛ nɛŋa tigere zuo bisegadoma sɔsega la poan, ba yuun bɔkɛ ti Kristakɔma dela sɛba ti Naayinɛ dekɛ a yu’urɛ la siɣɛ ba (Bisɛ kaalegɔ zɛ’an 5)
6-7. (a) Beni n sɔi ti Yezu yuun wa’an tingɔŋɔ wa zuo na? (b) Bem ninmu’urɛ yele n le pa’asɛ?
6 Yezu yu’urɛ la vuurɛ dela “Yehowa dela Faarɛdaana.” A me eŋɛ pa’alɛ ti Yehowa doli la eŋa poan faara sɛba n tari sakerɛ bɔ’ɔra en la. Yezu yuun wa’an tingɔŋɔ wa zuo ti a ki faaɛ la asaala basɛ. (Mt. 20:28) Eŋa n dekɛ lua bunɔ la bo la, a bo la yɔ’ɔ ti asaaleba wan ta’an nyɛ nyɔvore ge me ta vɔna daarewoo.—Yon 3:16.
7 Ge beni n sɔi ti asaaleba ɛɛra faarɛ? La dela sɛla n yuun eŋɛ Eden gaadin la poan la n sɔi. Wuu zaseŋɔ seko n tole la n pa’alɛ se’em la, to yia yaabedoma n de Adam la Hawa yuun eŋɛ la kpenkpasi la Yehowa, bala n sɔi ti ba yuun koŋe yɔ’ɔ la ti ba wan vɔna daarewoo la. (Pin. 3:6, 24) Ge Yezu n yuun wa’an tingɔŋɔ wa zuo na eŋɛ sɛla la, gani asaala faarɛ mɛ. Sitaana yuun parum la yɛla bo Yehowa. (Pin. 3:4, 5) Bala la, asaala san wan nyɛ faarɛ, la nari ti ba mina ti Yehowa ka tum be’em ge ti a yu’urɛ la me ana zilam. Yehowa n dekɛ a yu’urɛ la siɣɛ Yezu la zuo, Yezu yuun kɔ’ɔn bɔta la a basɛ ti Yehowa yu’urɛ la ana zilam.
Bala la, nɛra wan eŋɛ la wani ta’an dɛna Krista podɔla a san ka mina Yezu Sɔ yu’urɛ?
8. Sɛba woo n tari sakerɛ bɔ’ɔra Yezu nari ti ba mina la bem?
8 Yezu podɔleba woo n tari sakerɛ bɔ’ɔra en la, nari ti ba mina ti Yezu Sɔ Yehowa n wan basɛ ti ba nyɛ faarɛ. (Yon 17:3) Leyɛ’ɛsa, wuu Yezu la, ba wan dɛna la sɛba ti Yehowa wan dekɛ a yu’urɛ la siɣɛ ba. La me le nari ti ba mina la yele n pakɛ se’em ti ba basɛ ti Yehowa yu’urɛ la ana zilam. Bala n wan basɛ ti ba nyɛ faarɛ. (Tm. 2:21, 22) Bala la, Yezu podɔleba woo nari ti ba zamesɛ baŋɛ Yehowa la Yezu soŋa. Bala n sɔi ti Yezu yuun ki’ilum a zusega la n boi Yon 17 la yeti: “N bahɛ te ba mina [ho yu’urɛ la]. N me wan kelom kɔ’ɔn bahera te ba mina bala. Te bala te nɔŋse’ere te ho tara bɔ’ɔra mam la wan bɔna la ba ge te mam me bɔna la ba.”—Yon 17:26.
“YAMAM . . . N DE MAM SERADOMA”
9. To wan eŋɛ la bem pa’alɛ ti Yehowa yu’urɛ la yele pakɛ tɔ?
9 Yehowa yu’urɛ la n wan ana zilam la, nari ti la pakɛ yelemɛŋɛrɛ Kristakɔma woo. (Mt. 6:9, 10) La nari ti to basɛ ti Yehowa yu’urɛ la pakɛ tɔ gana sɛla woo. To itigɔ n wan pa’alɛ bala. To wan eŋɛ la wani ta’an basɛ ti Yehowa yu’urɛ la ana zilam ge le eŋɛ pa’alɛ ti Sitaana n tɔɣɛ Yehowa yele se’em la dela pumpɔreŋɔ?
10. Isaiah a zuo 42 ta paɛ 44 tɔɣɛ la bem yɛla? (Isaiah 43:9; 44:7-9) (Bisɛ foote la.)
10 Isaiah a zuo 42 ta paɛ 44 la pa’alɛ tomam n wan ta’an eŋɛ sɛla ti Yehowa yu’urɛ la ana zilam. Zuto ana wa poan, Yehowa yele nɛresɛba n ka pu’useri en la ti ba eŋɛ pa’alɛ ti ba yina la sirum boi. Ge ba se’em sa’am ka ta’an eŋɛ pa’alɛ!—Kaalɛ Isaiah 43:9; 44:7-9.
To yetɔɣum la to itigɔ poan, to iti pa’ala ti Yinɛ ka boi gana Yehowa (Bisɛ kaalegɔ zɛ’an 10-11)
11. Yehowa yele a nɛreba la bem ti la bɔna Isaiah 43:10-12?
11 Kaalɛ Isaiah 43:10-12. Yehowa tɔɣɛ a nɛreba yele ti: “Yamam . . . n de mam seradoma, . . . Mam n de Yenɛ.” Yehowa boti la ba baŋɛ yele dena wa: “Mam ma’an n de Na’ayenɛ.” (Isa. 44:8) Bala la, la me dela yɔ’ɔ bɔ’ɔra tomam ti to baŋɛ bala. To yetɔɣum la to itigɔ n wan pa’alɛ ti Yehowa ma’a n sirum de yelemɛŋɛrɛ Naayinɛ. A yu’urɛ la gani yu’ura woo. Ton vɔi to vom se’em la n wan pa’alɛ ti to sirum nɔŋɛ Yehowa ge me tara yelemɛŋɛrɛ bɔ’ɔra en hali Sitaana san puɣum basɛ ti la kpe’em bo to. To san ita wana, la wan pa’alɛ ti to boti la Yehowa yu’urɛ la ana zilam.
12. Yetɔɣebiŋere la n boi Isaiah 40:3, 5 la yuun tum tuuma la wani?
12 To san soŋera Yehowa, to tɔɣeseri la Yezu Krista. Isaiah me tɔɣɛ biŋe ti nɛra wan “maalɛ sore pɔgɔtia la poan bo Na’ayenɛ.” (Isa. 40:3) Bala yuun tum tuuma la wani? Yon n de ko’om Musegadaana la yuun maalɛ sore bo Yezu, mina ti Yehowa yuun tum ti a wa’ana tɔɣɛ a yele la. (Mt. 3:3; Mr. 1:2-4; Lu. 3:3-6) Yetɔɣebiŋere kaŋa mea nɔɔ le yeti: “Na’ayenɛ soŋa la [wan] nɛɛ na.” (Isa. 40:5) La wan eŋɛ la wani ta’an tum bala? Yezu n yuun wa’an tingɔŋɔ wa zuo na la, a yuun kɔ’ɔn tɔɣesa Yehowa la nima nima ti la ana wuu Yehowa mea n wa’ana.—Yon 12:45.
13. To wan eŋɛ la wani ta’an tɔɣesa Yezu?
13 Wuu Yezu la, tomam me dela Yehowa sɛɛradoma. Yehowa dekɛ la a yu’urɛ la siɣɛ tɔ. Bala la, to kɔ’ɔn tɔɣera la a yɛla bɔ’ɔra nɛra woo ti to wan seke. La nari ti to basɛ ti nɛreba baŋɛ Yezu n yuun eŋɛ sɛla ti a basɛ ti Yehowa yu’urɛ la ana zilam. To san tɔɣesa Yezu, bala wan pa’alɛ ti to tuni tuunɛ la soŋa. (Tm. 1:8) Yezu n de Yehowa Sɛɛradaana n diŋɛ nɛŋa ti tomam me tɔɣesa en. (Lil. 1:5) To wan le eŋɛ la bem pa’alɛ ti Yehowa yu’urɛ la pakɛ to mɛ?
TON LE ITA SE’EM PA’ALA TI YEHOWA YU’URƐ LA PAKƐ TƆ
14. Wuu Yooma 105:3 n pa’alɛ se’em la, la ani to la wani la Yehowa yu’urɛ la?
14 To zuo zɛ̃kɛ mɛ la ton tari Yehowa yu’urɛ la. (Kaalɛ Yooma 105:3.) Yehowa puurɛ pee mɛ la ton ŋmɛ̃’ɛri nyɔ̃’ɔrɔ la a yu’urɛ la. (Yer. 9:23, 24; 1 Ko. 1:31; 2 Ko. 10:17) Ton ‘ŋmɛ’ɛri nyɔ̃’ɔ Yehowa poan’ vuurɛ dela to basɛ ti to zuo zɛkɛ la Yehowa n de to Naayinɛ la. La dela yɔ’ɔ kãtɛ bɔ’ɔra tɔ ti to basɛ ti nɛreba baŋɛ ti Yehowa dela zilam ge ti sɛla woo ti a ita la me denɛ tontɔɔ. La ka nari ti valum tara tɔ ti to basɛ ti to tuuma tadaandoma, to sukuu tadaandoma, to yikpɛ’ɛsi la nɛreba basɛba baŋɛ ti to dela Yehowa Sɛɛradoma! Kolekpabɛ’a la ka boti to tɔɣera Yehowa yɛla bɔ’ɔra nɛreba. (Yer. 11:21; Lil. 12:17) Sitaana la a pumpɔreŋɔ nɛreba la boti la nɛreba tamɛ Yehowa yu’urɛ la. (Yer. 23:26, 27) Ge ton nɔŋɛ Yehowa yu’urɛ la n basɛ ti to puurɛ pɛɛra “daarɛ woo.”—Ym. 5:11; 89:16.
15. To yi’ira Yehowa yu’urɛ la vuurɛ?
15 To kɔ’ɔn yi’ira la Yehowa yu’urɛ la. (Yoe 2:32; Arom 10:13, 14) Ton yi’iri Yehowa yu’urɛ la ka pa’alɛ ti to yeen mina ge yi’ira ku ma’a. La pa’alɛ ti to mina Naayinɛ soŋa, tɔresɛ en ge me ni basɛ ti a pa’ala ge soŋera tɔ. (Ym. 20:7; 99:6; 116:4; 145:18) To me le basɛ ti nɛreba baŋera a yu’urɛ, la a hala la ge kpɛmesa ba giila ti ba basɛ ba be’em ge tiregɛ bisɛ ban wan eŋɛ se’em ti Yehowa puurɛ pee la ba.—Isa. 12:4; Tm. 2:21, 38.
16. To wan eŋɛ la wani pa’alɛ ti Sitaana dela pumpɔrema?
16 To kɔ’ɔn maasum mɛ ti to ŋmibe namesegɔ poan ti Yehowa yu’urɛ la nyɛ pɛ̃ka. (Yam. 5:10, 11) To san nyaŋɛ ŋmibe namesegɔ poan ge tara yelemɛŋɛrɛ bɔ’ɔra Yehowa, to iti pa’ala ti Sitaana dela pumpɔrema. Yob saŋa la, Sitaana yuun zɛregɛ sɛba n pu’useri Yehowa la ti: “Nɛra n tare sɛla woo la han wan sagom ge te a vɔna, a bote.” (Yob 2:4) Sitaana parum ti yɛla san ana soŋa ma’a ti nɛreba wan pu’usa Yehowa ge la san wuna ba, ba wan zaɣesɛ Yehowa. Yob yuun eŋɛ pa’alɛ ti la daɣɛ yelemɛŋɛrɛ. Zina beere wa, tomam me wan ta’an eŋɛ pa’alɛ ti bɔŋa la san puɣum kpe’em bo to la se’em me, to kan malum basɛ Yehowa. To kɔ’ɔn tara sakerɛ ti Yehowa wan bisa tɔ a yu’urɛ la zuo.—Yon 17:11.
17. Wuu 1 Peter 2:12 n pa’alɛ se’em la, bem ti to wan le ta’an eŋɛ ti la basɛ ti Yehowa yu’urɛ la nyɛ pɛ̃ka?
17 To tari la gilema bɔ’ɔra Yehowa yu’urɛ la. (Mag. 30:9; Yer. 7:8-11) Tomam n de Yehowa nɛreba ti a dekɛ a yu’urɛ la siɣɛ to la zuo, to itigɔ ta’an pɛ̃ɣera en bii la zɛregera en. (Kaalɛ 1 Peter 2:12.) Bala la, to wan bɔta ti to tiregɛ basɛ ti to yetɔɣum la to sareŋɔ pɛ̃ɣera Yehowa. To san ita bala, la boi bim ti to ka di mi’a ge to wan basɛ ti Yehowa yu’urɛ la tara gilema.
18. Sarɔkuni poan ti to wan le eŋɛ pa’alɛ ti Yehowa yu’urɛ la pakɛ to mɛ? (Bisɛ tiŋanɔɔrɛ yelesum.)
18 To na’aseri Yehowa yu’urɛ la mɛ, la ka pakɛ la nɛreba n ti’iseri se’em bɔ’ɔra tɔ. (Ym. 138:2) Beni n sɔi? Se’ere n sɔi la, to san ita yelese’a n peeri Yehowa puurɛ, nɛreba kan nɔŋɛ tɔ ge me wan tɔɣera yetɔɣepɔ̃’ɔsa bɔ’ɔra tɔ.a Yezu n yuun ki kum sebo taaba la, nɛreba yuun geele en ti a dela tunpɔ̃’ɔsadaana ge me dina en. Ge Yezu yuun kɔ’ɔn maasum me ti a ki la wan eŋɛ se’em ti Yehowa yu’urɛ la nyɛ pɛ̃ka. A yuun ka ‘vihe lebe pooren.’ Bala pa’alɛ ti a yuun ka ba’ɛ fabela nɛreba n tɔɣeri a yele se’em. (Heb. 12:2-4) A puti’irɛ yuun dela a tum Naayinɛ n boti sɛla.—Mt. 26:39.
19. Yehowa yu’urɛ la basɛ ti la ana hon la wani ge bem zuo?
19 To zuo zɛ̃kɛ mɛ la ton pu’useri Yehowa ge me dɛna Yehowa Sɛɛradoma la. Yehowa yu’urɛ la n pakɛ to la zuo, to kɔ’ɔn pɛ̃ɣera en mɛ hali nɛreba san puɣum zɛregera tɔ. Bala la, basɛ ya ti to lu to suure ti to wan kɔ’ɔn pɛɣera Yehowa, la ka pakɛ la yelese’a ti Sitaana tara paara tɔ la. To san ita bala, la wan pa’alɛ ti Yehowa yu’urɛ la n pakɛ tɔ gana sɛla woo wuu lan yuun pakɛ Yezu Krista se’em la.
YUUNƐ 10 Praise Jehovah Our God! (Pɛ̃ɣɛ Yehowa To Naayinɛ La!)
a Hali la yuun daam Yob mɛ la a zɔdoma batã la n yuun zɛregeri en la. Pɔsega la ti a yuun koŋe a kɔma la a lɔɣɔrɔ la, “Yob ka tom be’em, bii a nyɔna, Yenɛ te a tom enŋa la be’em.” (Yob 1:22; 2:10) Ge ban yuun parum ti a tum la be’em la, ti Yob yuun “tɔgɔra ge ka tɛn’ɛha.” Yob yuun basɛ ti amea yu’urɛ pakɛ en gana eŋa n wan basɛ ti Yehowa yu’urɛ la ana zilam la.—Yob 6:3; 13:4, 5; 32:2; 34:5.