Vom La Na’am Tuuma Zamesegɔ Viisegɔ Gɔŋɔ
© 2025 Watch Tower Bible and Tract Society of Pennsylvania
JULY 7-13
NAAYINƐ TUULUM YƐLA MAGAHA 21
Naresum Yelese’a N Wan Basɛ Ti Pɔɣedire Tara Pupeelum
w03 10/15 4 ¶5
Ho Wan Eŋɛ La Wani Ta’an Kɔ’ɛ Ho Puti’irɛ Soŋa?
To san eŋɛ kãbi kãbi kɔ’ɛ puti’irɛ, la ni ka ana soŋa. Magaha 21:5 kaɣɛ tɔ ti: “Ninmɔ’ɔredaana potɛn’ɛra tare en yɛ’a la kekeko poan, ge kaanbe kaanbedaana yeere la nɔŋɔ poan.” Makerɛ, bunbilipaalesi ka nari ti ba doose ba kunkoma’asum n boti sɛla kɔ’ɛ puti’irɛ ti ba wan di pɔɣa bii ele sira ge la nari ti ba nyɔkɛ bamea ti’isɛ yele la. San daɣena bala, ba wan baŋɛ ti William Congreve n yuun tɔɣɛ sɛla la dela yelemɛŋɛrɛ. A yuun dela Solemiine gɔngulesa n yuun boi yuun kɔbesɛka n pa’asɛ 18 la poan. A yuun yeti: “Ho san eŋɛ kãbi kãbi di pɔɣa bii ele sira, ho suure ta’an ta sa’am pooren.”
g 7/08 7 ¶2
Hon Wan Eŋɛ Se’em Ti Ho Pɔɣedire Ana Soŋa
Siregera Homea. “Da bahɛ ya te ya eta la sɛla n de nyika bonɔ bii ya pa’alɛ ya mɛhe te ya ta’an ŋmɛ ya nyɔn’ɔnrɔ. Ge sirihe ya mɛhe bɔ’ɔra taaba ge tɛn’ɛhe ya daarɛ woo te sɛba gane ya.” (Filipi 2:3) Nɔkpɛ’ɛma zo’e zo’e n boi pɔɣedire poan dela yele san bɔna, nɛra la a pɔɣa n wan tuɣum sirege bamea maalɛ yele la, ba ni nyɔ̃na la taaba. Sirege n mea wan soŋɛ hɔ ti ho kan tiregera ti hon tari buurɔ.
w06 9/15 28 ¶13
“Nyeena La Pɔgɔsɛka En Pɔhɛ Ho Boraanɛ La”
13 Ge nɛra la a pɔɣa n iti taaba se’em la san basɛ ti yeledaaŋɔ bɔna? La wan nara ti ba tiregɛ paa ta’an maalɛ yele la. Makerɛ, la ta’an dɛna ti ba tɔɣeri la yetɔɣepɔ̃’ɔsa bɔ’ɔra taaba ti la nyaa lebege ba halɛ. (Magaha 12:18) Wuu ton baŋɛ se’em zaseŋɔ seko n tole la, wana ta’an dɛna daaŋɔ paa. Wuu Baabule la n yele se’em la: “La ane soŋa te ho kɛn’ɛra pɔgɔtia poan ha, [nyana] hom boe la pɔgɔnyunyuŋa la sunsunyiim.” (Magaha 21:19) Ho san dɛna la pɔɣa ti ho sire-ele ana bala, soke homea yeti, ‘Mam halɛ n ani se’em la basɛ ti la kpe’em bo mam sira ti a lɛna mam?’ Baabule la yele sireba yeti: “Nɔŋɛ ya pɔgɔba ge da ete ya ba sɛla n ka ane soŋa.” (Kolose 3:19) Ho san dɛna sira, soke homea yeti, ‘Mam n ka ti’iseri n pɔɣa yele la ta’an basɛ ti a tum yalumtuuma?’ Yelemɛŋɛrɛ, bala ka pa’alɛ ti a tari yɔ’ɔ ti a sa’am pɔɣedire la. Ge bala n ta’an eŋɛ la pa’alɛ ti la nari ti ya yese ya suuren sɔsɛ yeledaaŋɔ la.
Vo’osum Poan Yɛla
w05 1/15 17 ¶9
Liligere N Tɔɣɛ Naayinɛ Na’am La Yele N Tum Tuuma Se’em
9 Yezu dela Naba n tari paŋa ge a daɣɛ nɛra n zĩ bonbila zuo. Baabule la yeti a bã la yeho, ti la pa’alɛ ti a ye’esi la zaberɛ. (Magaha 21:31) Liligere 6:2 yeti, “Te n behɛ nyɛ yeho peelega. Se’em n ban bo la daa zanle la tanhɔ, te ba bo en muŋa. A nya daa dɛna . . . nyaŋera ban [boŋa] yɛ’ɛha.” Leyɛ’ɛsa, yoomadaana David tɔɣɛ Yezu yele yeti: “Na’ayenɛ wan pa’ahɛ ho na’am kpe’eŋo Zion poan na. Ho wan sɔna ho diŋdoma beha.”—Yooma 110:2.
JULY 14-20
NAAYINƐ TUULUM YƐLA MAGAHA 22
Naresum Yelese’a N Wan Soŋɛ Hɔ Ti Ho Uge Ho Kɔma Soŋa
w20.10 27 ¶7
Ho Kɔma San Zo’e Ba Wan Pu’usa Naayinɛ?
7 Ya san dɛna nɛra la a pɔɣa n boti ya dɔɣɛ kɔma, soke yamea yeti: ‘Tomam dela sɛba n siregeri tomea ti vo’osum poan yɛla pakɛ tɔ ge ti Yehowa wan loe to ti to uge bia?’ (Ym. 127:3, 4) Ho san puɣum dɛna la dɔɣera, soke homea yeti: ‘Mam pa’ali n kɔma tunkpe’eŋo n tari nyuurɔ se’em?’ (Pa. 3:12, 13) ‘Mam tiregeri ti n te’ele n kɔma ti dɛŋa kan paɛ ba ge ti Sitaana tingɔŋɔ wa me kan sa’am ba halesoma la?’ (Mag. 22:3) Ho kan nyaŋɛ te’ele ho kɔma yeledaaŋɔ woo poan. Yelese’ere n kan ta’an tum n bala. Ge ho san soŋɛ ba ti ba mina ban wan ɛɛra Baabule ka’aŋɔ se’em, la wan basɛ ti ba ta’an ŋmibe yeledaaŋɔ poan. (Kaalɛ Magaha 2:1-6.) Makerɛ, ho yire nɛra san basɛ Yehowa pu’usegɔ, soŋɛ ho kɔma la ti ba zamesɛ Baabule la baŋɛ la yele n pakɛ se’em ti to tara yelemɛŋɛrɛ bɔ’ɔra Yehowa. (Ym. 31:23) Bii ho yire nɛra san ki, soŋɛ ba ti ba mina Baabule la n wan ta’an buɣelɛ ba suure se’em ge me basɛ ti ba tara suma’asum.—2 Ko. 1:3, 4; 2 Tim. 3:16.
w19.12 26 ¶17-19
Dɔɣereba, Pa’ala Ya Kɔma Ti Ba Nɔŋɛ Yehowa
17 Pɔsɛ pa’ala ho kɔma ban nan pɔ’ɛ la. Dɔɣereba san te’ele pa’alɛ ba kɔma ban nan pɔ’ɛ la, la wan soŋɛ ba. (Mag. 22:6) Geele Timoti yele la bisɛ. Saŋa ase’a a yuun ni doose la Paul ta mɔɔlɛ. Timoti ma Eunice, la a mayaaba Lois yuun pa’alɛ en mɛ se’em ma’a ti a dɛna “bia” la.—2 Tim. 1:5; 3:15.
18 Jean-Claude la a pɔɣa Peace n boi Côte d’Ivoire yuun ta’an uge ba kɔma bayoobe ti ba nɔŋɛ Yehowa ge pu’usa en. Bem n yuun basɛ ti ba ta’an eŋɛ bala? Ba yuun tɔɣesɛ la Eunice la Lois makesonɛ la. Ba yeti, “To yuun tɔɣeri Naayinɛ Yelesum la taɣesa mɛ bɔ’ɔra to kɔma la, ban yuun de bilɛɛsi la.”—Tɛɛ. 6:6, 7.
19 La vuurɛ dela bem ti ho tɔɣera Naayinɛ Yelesum la taɣesa bɔ’ɔra ho kɔma? Ho ‘tɔɣera taɣesa’ vuurɛ dela “ho pa’ala ge taɣesa sugumnɔɔrɛ zo’e zo’e.” Dɔɣereba san wan ta’an eŋɛ bala, la dela ba nyɛta nɛŋa bɔ’ɔra ba kɔma la. Saŋa ase’a dɔɣereba sunsɔa ta’an nyie, la san dɛna ti ba tɔɣɛ yele taɣesɛ bo ba kɔma. Ge dɔɣereba ni tiregɛ mɛ ti ba bisɛ ban wan eŋɛ se’em ta’an soŋɛ ba kɔma ti ba bɔkɛ Naayinɛ Yelesum la ge dekɛ tum tuuma.
w06 4/1 9 ¶4
Dɔɣereba, Dɛna Ya Makesonɛ Bɔ’ɔra Ya Kɔma
Yelemɛŋɛrɛ la dela, kɔma n de kɔma la zuo, la nɔŋɛ la ana se’em me, saŋa ase’a basɛba ta’an kpere tuba bii sa’am. (Pin’ileŋɔ 8:21) Dɔɣereba wan ta’an eŋɛ la wani? Baabule la yeti, ‘Gberen tuuma kɔ’ɔn pĩrɛ la bia suuren ge kafɛɛbega n wan ta’an yese de basɛ.’ (Magaha 22:15) Basɛba bisɛ ti wana dela putoo bii ŋmɛ’a saŋa tole mɛ. Yelemɛŋɛrɛ, Baabule la tɔɣɛ giisɛ putotuuma mɛ. Saŋa ase’a, yelebire la n de ‘kafɛɛbega’ la ze’ele bo la yɔ’ɔ sɛka ti dɔɣereba tara ti ba dɔlegɛ ba kɔma tuberɛ nɔŋerɛ sore poan, ban boti la ta ana ba soŋa la zuo.—Hebru 12:7-11.
Vo’osum Poan Yɛla
w21.08 22 ¶11
Basɛ Ti Ho Puurɛ Pee La Yɔ’ɔ Se’a Ti Ho Tara La
11 Bala mea nɔɔ, to san basɛ ti to puti’irɛ bɔna tunse’a ti ba dekɛ bo to Yehowa pu’usegɔ poan, to puurɛ wan pee. ‘Mu’ɛ nini’ mɔɔla ge me laɣum tuna tansugere tuuma. (Tm. 18:5; Heb. 10:24, 25) Ni maasum ge nyaa keŋɛ zamesegɔ, ta’an bo lebesego kpemese mabiisi giila. Ba san bo ho tuunɛ bakwai tiŋasuka zamesegɔ poan, ni tum dɛ soŋa. Ba san bo ho tuunɛ, ni eŋɛ kalam tum dɛ. Da ti’isa ti ban bo ho tunse’a la ka nari hɔ, bala ho kan sa’am ho saŋa tum dɛ. Tiregɛ kumesɛ homea pa’asɛ. (Mag. 22:29) Ho san mu’ɛ nini tuna vo’osum poan tuuma soŋa, ho wan nyɛta nɛŋa tɔlega kalam kalam ge me tara pupeelum. (Ga. 6:4) Leyɛ’ɛsa, mabia san nyɛ yɔ’ɔ ti ho bɔta, la kan kpe’em bo ho ti ho puurɛ pee.—Arom 12:15; Ga. 5:26.
JULY 21-27
NAAYINƐ TUULUM YƐLA MAGAHA 23
Naresum Yelese’a N Wan Soŋɛ Hɔ Daam Nyua Poan
w04 12/1 19 ¶5-6
Bisɛ Homea Soŋa Da’am Nyua Poan
5 Ge nɛra san nyuura daam ge bisera amea soŋa ti a kan nyu zo’e ti nɛreba baŋɛ ti a buge mɛ? Nɛreba basɛba boi mɛ ti hali ba san puɣum nyu daam zo’e la se’em me, la wan kpe’em ti ho baŋɛ ti ba buge mɛ. Ge nɛra san bisɛ ti bala daɣɛ daaŋɔ, a pã’aseri la amea. (Yeremia 17:9) Nɛra san ita bala, fii fii la, daam la yeti la ele en mɛ ti a nyaa lebege ‘daam nyuura.’ (Titus 2:3) Gɔngulesa ayima yu’urɛ n de Caroline Knapp tɔɣɛ pa’alɛ lan ni eŋɛ se’em ti nɛra ta dɛna daam nyuura yele yeti: “La ni dɛna la fii fii.” Nɛra san nyuura daam zɔ’ɔra, la ta’an ku en!
6 Yezu kaɣɛ tɔ ti: “Tare ya ya mɛhe soŋa soŋa yɛhera diihomm la [daam nyua], la teŋa wa zuo yɛla. Se’ere n sɔe la, ya han tɛn’ɛha yele ana wa ya potɛn’ya poan, ya kan mina daanse’ere daarɛ te teŋa wa zuo wan ba’ahɛ. Te teŋa wa zuo ba’ahegɔ daarɛ la yete la ana wo bɛnregɔ te ba bɛnrɛ biŋe nɛra woo teŋa zuo la.” (Luke 21:34, 35) Nɛra ta’an nyu daam ge ka buge ge daam la ta’an kelum basɛ ti a ma’ɛ vo’osum poan bii a dɛna zinnyaka. Ge Yehowa daarɛ la san wa’ana paɛ en sansɛka ti a buge?
it-1 656
Daambuka
Baabule la tɔɣɛ giisɛ dɛ mɛ. Baabule la tɔɣɛ giisɛ daambuka mɛ. Yɛmdaana la n gulesɛ Magaha gɔŋɔ la pa’alɛ la sɛla n wan ta’an paɛ nɛra n nyu daam buge. A yeti: “Ane n tare fabelegɔ? Ane n tare sunsagaŋɔ? Ane n zaberi? Ane n nyɔnɛ? Ane n pɔgɔlom yoo? Ane nini en ane mɔlɔ mɔlɔ? Sɛba n dole daam na’ma la en bala, sɛba n dole gɛnregera daam nyuura en bala. Da dagom beha daam la n mɔ’ɛ se’em loi ge tɛnra ŋmai ŋmai wanɛ la poan [se’em ma’a ti daam la tara kunkoma’asum, la nimpiilum la], te ho tugule te bo sigera bala mea soŋa soŋa [se’em ma’a ti la sigera yɔli yɔli]. Ba’ahegɔ zan’an, bo kɛ’ɛre mɛ wo kanpɛn’a la zankaŋa la [la ta’an basɛ ti bã’a nyɔkɛ nɛra mɛ (makerɛ, la ta’an basɛ ti nɛra nyɛ sunsoleŋo bã’a) ge me nyɛ puti’irɛ bã’a (la ta’an basɛ ti a ze’a ge gɔ̃ɣera), la me ta’an ku en]. Te ho nini nya nyɛta yelenyalema [daam la ta’an daam a zuputo, ti a eŋɛ yelese’a ti la san daɣena eŋa n nyu daam a kan eŋɛ ni bala; a ta’an ze’a ge nyɛta yɛla; a ta’an tɔɣera yelese’a n daɣɛ yelemɛŋɛrɛ ti la ana wuu de la yelemɛŋɛrɛ la; a ni ita la yelese’a woo n yeen wa’an a puti’iren], te ho nɔɔrɛ nya yɛta yetɔgɔyooro [yelese’a n boi a puti’iren, la a kunkoma’asum yɛla za’a, a wan tɔɣɛ. A san ka buge ni, a kan eŋɛ bala].”—Mag 23:29-33; Ho 4:11; Mt 15:18, 19.
Yɛmdaana la le tɔɣɛ pa’alɛ sɛla n paɛ daambugera la yeti: “Ho nɛŋa nya wan kaalena ge te ho tiira wo nɛra n boe ɔɔnrɔŋkantɛ poan [a wan ana wuu se’em ti ko’om di en ti a ka mina eŋa n wan eŋɛ se’em la, ba’asegɔ za’a a wan ana wuu a yɛm n bɔi la] te ko bɔna ko’kantɛ poan [daambugera la wan ana wuu ɔɔreŋɔ n yɛɣeleni la, a ta’an nyɛ accident bii stroke, a ta’an ta zabɛ bii eŋɛ sɛla n wan dekɛ a vom eŋɛ dɛŋa poan]. Ho wan yeti, ba kɛ mam mɛ ge en ka pɔgɔlom, ba ŋmɛ mam mɛ ge mam pon ka wuna [daambugera la tɔɣeri bɔ’ɔra la amea; a puɣum ka mina yelese’a n eŋɛ la, bala a ka mi ti a pɔɣelum mɛ]. N wan ihege la wane ma’an nyɛ en daam nyu [a nyu daam buge mɛ ge a san nyɛ ni a wan le nyu].” Nɔŋɔ wan kɛ̃ en se’ere n sɔi la a ligeri za’a kɛ̃ la daam poan ge ti a me kan nyaŋɛ le tum tuuma.—Mag 23:20, 21, 34, 35.
Vo’osum Poan Yɛla
w04 11/1 31 ¶2
Sokese’a Ti Sɛba N Kaali La Sɔkera
Makerɛ, nɛra n ba’ɛ kãregɛ ta’an pa’alɛ ti a dela diisa ge daɣɛ saŋa woo ti la dɛna bala. Bã’a ta’an basɛ ti nɛra ba’ɛ kãregɛ. Kãtɛ san bɔna nɛra yire poan, la ta’an basɛ ti a ba’ɛ kãregɛ. Tɛ̃ra ti to ta’an nyɛ nɛra baŋɛ ti a kãregɛ mɛ ge diisa ni kɔ’ɛ la a puti’irɛ ti a di zɔɛ. Nɛra inya kaam san ba’ɛ zo’e, la pa’alɛ ti a ba’ɛ kãregɛ mɛ ge diisa dela se’em n tari punya’anɛ bii se’em n ni di zɔɛ. Bala, daɣɛ nɛra n kãregɛ se’em n pa’alɛ ti a dela diisa ge eŋa n tari putɛsɛka dita la n pa’alɛ. Nɛra ta’an kãregɛ makɛ bii dɛna bãalega ge kelum dɛna diisa. Leyɛ’ɛsa, zɛ’an woo la ban geele kãtɛ n makɛ ma’a se’em.
JULY 28–AUGUST 3
NAAYINƐ TUULUM YƐLA MAGAHA 24
Basɛ Ti Ho Sakerɛ Kpe’em Biɣi Biɣi Saŋa Poan
‘Ze’a Kankaŋi, Da Miina’
15 Zamesa Naayinɛ Yelesum la ge ti’isa taɣesa. Tia san nyɛ nyɛɣerɛ a wan ta’an ze’a kankaŋi. Tomam me wan ta’an ze’a kankaŋi to san tara sakerɛ n kpe’em bɔ’ɔra Yehowa. Tia san zɔ’ɔra a nyɛɣa la sigeri mɛ ge kãregera. Tomam me san zamesa ge ti’isa taɣesa, to sakerɛ la wan kpe’em ti to sirum sakɛ ti Naayinɛ pa’alegɔ n ani soŋa. (Kol. 2:6, 7) Yeen ti’isɛ bisɛ Yehowa pa’alegɔ n soŋɛ a yamesi se’em daami sa. Makerɛ, Ezekiel yuun kɔ’ɔn kelese la soŋa soŋa se’em ma’a ti maleka la yuun makera vo’osum poan pu’usegɔ deo la. Liligere wa yuun kpemese Ezekiel giila mɛ. La me pa’alɛ to la tomam n wan eŋɛ se’em ta’an dɔla Yehowa pa’alegɔ ge ze’a kankaŋi a yelemɛŋɛrɛ pu’usegɔ la poan. (Eze. 40:1-4; 43:10-12) Tomam me wan nyɛ nyuurɔ to san zamesa ge ti’isa taɣesa yelese’a n boi Naayinɛ Yelesum la poan la.
w09 12/15 18 ¶12-13
Tara Pupeelum Yeledaaŋɔ Poan
12 Magaha 24:10 yeti: “Daaŋɔ han paɛ ho te ho tehege ho koŋɛ la paŋa.” Makerɛ ayima me yeti: “Suunre se’ere n sagom, koore la sea.” (Mag. 15:13) Kristakɔma basɛba suure ba’ɛ sa’am mɛ ti ba ka le bɔta ti ba kaala Baabule la ge ti’isa taɣesa ku. Ba zusega ka le nɛ nini ge ti ba me yelege bamea mabiisi la zɛ’an. La niɛ peelumi ti, to suure san ba’ɛ sa’am ti la yue, daaŋɔ ta’an paɛ tɔ.—Mag. 18:1, 14.
13 Ge to san tuɣum tara putɛsonɛ, la wan basɛ ti to puti’irɛ bɔna yelese’a n bo’ori to pupeelum la poan. David yuun gulesɛ yeti: “Mam Yenɛ wa, mam bote te n tom ho sunboolom la.” (Ym. 40:8) Yɛla san ka kena soŋa to vom poan, la ka nari ti to basɛ Baabule zamesegɔ. Yelemɛŋɛrɛ la dela, to suure san sa’am, la nari ti to ita yelese’a n bo’ori to pupeelum. Yehowa yele to ti to san kaala a Yelesum la ge ti’isa taɣesa ku poan daarewoo, to wan tara pupeelum. (Ym. 1:1, 2; Yam. 1:25) To Baabule kaalegɔ, la zamesegɔ kenɛ ni basɛ ti to wuna la “yetɔgɔsomɔ” n basɛ ti to puurɛ pɛɛra.—Mag. 12:25; 16:24.
w20.12 15
Sokese’a Ti Sɛba N Kaali La Sɔkera
Magaha 24:16 yeti: “Ba han pon [lui] sugumnɔɔren boyopɔe, ba wan le ihege.” Wana wa pa’alɛ la nɛra n tum be’em tabelɛ tabelɛ ti Naayinɛ di sugeri bo en yoi?
Yele la dela, kaalegɔ zɛ’an wa ka pa’alɛ bala. Ge la pa’alɛ la yeledaaŋɔ zo’e zo’e n paari nɛra ti la ana wuu a lui me la ge ti a nyaŋɛ tiregɛ ze’ele ti la ana wuu a le isige me la.
Bala la, Magaha 24:16 n yeti nɛra san ‘lui’ la, ka pa’alɛ ti a tum la be’em ge la pa’alɛ ti yeledaaŋɔ zo’e zo’e n paari nɛra la tabela. Bã’asi, la yeledaaŋɔ ase’a paari tontɔɔdaana mɛ tingɔŋɔ be’o wa poan. Hali gɔmena la ta’an mɛlesa en. Ge a ta’an dekɛ amea delum Yehowa ti a soŋɛ en ti a nyaŋɛ ŋmibe. Soke homea yeti, ‘Mam ka nyɛ ti saŋa zo’e zo’e yɛla keni soŋa bɔ’ɔra Naayinɛ yamesi’? Sɛla n sɔi ti la ana bala dela, to tari suure lua ti “Na’ayenɛ n zɛnkere sɛba n [lui] la saazuo, ge ihegera sɛba n gan teŋa la me saazuo.”—Ym. 41:1-3; 145:14-19.
Vo’osum Poan Yɛla
w09 10/15 12
Sokese’a Ti Sɛba N Kaali La Sɔkera
Baabule saŋa la, buraa san yeti a “mɛ [a] yire” bii a di pɔɣa ge dɔɣɛ kɔma, a yuun nari ti a soke amea yeti, ‘Mam maasum ti n ta’an bisa n pɔɣa la kɔnsɛba ti to wan ta dɔɣɛ?’ Ge ti a nyaa di pɔɣa ge ta dɔɣɛ kɔma la, a tari a tuuma mɛ n de a kɔɔra. Bala la, Today’s English Version la lerege gulesegɔ wa yeti: “Da mɛ ho yire bii tara pɔɣa la kɔma ge ti ho dia nyaa wɔm ge la dɛna sansɛka ti ho wan ta’an bisa homea.” Naresum yele wa kelum tara nyuurɔ zina beere wa?
Ɛɛ. Buraa n boti a di pɔɣa nari ti a maasum soŋa ta’an tum a zugbere tuunɛ. A san tara paŋa, a nari ti a tum tuuma. Yelemɛŋɛrɛ la dela, ban yeti buraa tiregɛ bisa a deodoma la daɣɛ inganɛ poan yɛla ma’a. Naayinɛ Yelesum la pa’alɛ ti buraa n ka biseri a deodoma inganɛ poan yɛla, ba suure poan yɛla, la ba vo’osum poan yɛla dela nɛreyaalega gana se’em n ka tari sakerɛ! (1 Tim. 5:8) Bala la, buraa san maasena ti a di pɔɣa ge dɔɣɛ kɔma, la nari ti a soke amea yeti: ‘Mam maasum n mea soŋa ti n ta’an bɔ’ɔra n deodoma yelese’a n pakɛ ba? Mam maasum ti n dɛna zuodaana n wan ta’an soŋɛ ba ti ba pu’usa Yehowa? Mam wan ta’an naɛ la n pɔɣa, la n kɔma zamesa Baabule la daarewoo?’ Naayinɛ Yelesum la tɔɣɛ yele ana wa mɛ ti la niɛ peelumi.—Tɛɛ. 6:6-8; Ep. 6:4.
Bala la, burasa’arɛ n boti a di pɔɣa nari ti a geele naresum yele la n boi Magaha 24:27 la. Bala mea ti pɔɣesa’arɛ nara ti a soke amea bisɛ a maasum ti a ta tum pɔɣa, la ma tuuma. Nɛra la a pɔɣa me ta’an ti’isa soke ana wa yele ba san bɔta ti ba dɔɣɛ kɔma. (Luke 14:28) Naayinɛ nɛreba san tara Baabule pa’alegɔ tuna tuuma, la wan gu ba yeledaaŋɔ zo’e zo’e poan ge ti ba wan tara pupeelum ba yire poan.
AUGUST 4-10
NAAYINƐ TUULUM YƐLA MAGAHA 25
Naresum Yelese’a N Wan Soŋɛ Tɔ Ti To Tɔɣera Yetɔɣesomɔ
w15 12/15 19 ¶6-7
Basɛ Ti Ho Yetɔɣɔm Ana Soŋa
6 Magaha 25:11 pa’alɛ la lan de ninmu’urɛ se’em ti to mina sansɛka n nari ti to tɔɣɛ. La yeti: “Hon tɔgɛ yetɔgom bo narehom saŋa, la ane wo sanlema kuga te ba maalɛ kɛn’ɛhɛ sanlenpeela poan la.” Salema kuga ani soŋa mɛ. Ge ba san dekɛ ba eŋɛ salenpɛɛlega laa poan, la ni ba’ɛ ana la soŋa. Bala mea nɔɔ, to san mina sansɛka n nari ti to tɔɣɛ, la wan basɛ ti to yetɔɣum ana soŋa ge kɛ̃’ɛra suure. Wani wani?
7 To san ka tɔɣɛ sansɛka n nari poan, nɛreba kan bɔkɛ tɔ ge me kan sakɛ ton yeti sɛla la. (Kaalɛ Magaha 15:23.) Makerɛ, March 2011 poan ti tinmiiŋo sige Japan dapɔya bɔba, ku nɛreba n gaŋɛ 15,000. La boi bim ti Yehowa Sɛɛradoma zo’e zo’e la ba yidoma n boi zɛ’an la poan yuun ki mɛ ge ba yuun dekɛ la Baabule la buɣelɛ nɛresɛba me yidoma n ki la suure. Nɛreba la zo’e zo’e dela Buddha pu’usegɔdoma ge me ka tara Baabule mi’ilum. Bala la, mabiisi la yuun baŋɛ ti la daɣɛ sankaŋa n nari ti ba tɔɣɛ kum isigere la yele bo ba. Ge ba yuun tuɣum pa’alɛ ba la sɛla n sɔi ti namesegɔ paara nɛresondoma ta’an buɣelɛ ba suure.
w15 12/15 21 ¶15-16
Basɛ Ti Ho Yetɔɣɔm Ana Soŋa
15 Ton tɔɣeri sɛla, la ton wan tɔɣɛ de se’em yele pakɛ mɛ. Se’em ma’a ti Yezu yuun tɔɣera Nazaret zamesegɔ deo la poan la, la yuun eŋɛ nɛreba la “pakerɛ la yetɔgɔsomɔ la te [a] tɔgɛ la.” (Lu. 4:22) Yetɔɣesomɔ kɛ̃’ɛri la nɛreba suure. Nɛreba san wum ton yele sɛla la, la ni soŋɛ ba mɛ. (Mag. 25:15) To wan ta’an tɔɣesɛ Yezu yetɔɣesomɔ la to san ita som bɔ’ɔra nɛreba ge tara ba giile. Yezu n yuun nyɛ nɛreba la n tiregeri ti ba kelese en la, nimbũ’ɔ n yuun tari en ti a pɔsɛ “pa’ala ba yɛla kekeko.” (Mr. 6:34) Hali ban yuun tuuri en la, a yuun ka lebese to ba.—1 Pe. 2:23.
16 To san mina nɛra, la ta’an kpe’em bo to ti to tɔɣera bɔ’ɔra en mama, la gilema sore poan. To ta’an ti’isa ti la ka nari ti to bisɛ tomea soŋa la ton tɔɣeri en se’em. La ta’an dɛna bala to san tɔɣera bɔ’ɔra to yire nɛra bii to zɔ n boi tansugere la poan. Hon ti’isɛ ti Yezu yuun tɔɣeri a podɔleba la eŋa n boti se’em ti ba dela a zɔdoma zuo? Daɣɛ bala la fii me! Yezu podɔleba la n yuun ŋmɛ’ɛri nɔkpe’ene ti ba baŋɛ se’em n gani la, a yuun tɔɣɛ la mama sore poan ge dekɛ bia eŋɛ makerɛ bo ba ta’an demese ba puti’irɛ. (Mr. 9:33-37) Keendoma wan ta’an tɔɣesa Yezu ba san ka’ana mabiisi mama sore poan.—Ga. 6:1.
w95 4/1 17 ¶8
Sodeni Poan Ti To Wan Ta’an Tara Nɔŋerɛ La Tunsoma?
8 Ton pu’useri Naayinɛ se’em la ta’an dɛna makesonɛ n wan kpemese mabiisi giila. Yezu makesonɛ la yuun kpemese a kɛleseriba la giila mɛ. A yuun nɔŋɛ la a mɔɔla yelesoma la ge yeti la dela a dia. (Yon 4:34; Arom 11:13) Nɛra san mu’ɛ nini, to me ni bɔta la to tɔɣesa en. Ho wan ta’an basɛ ti nɛreba baŋɛ hon tari pupeelum se’em na’am mɔɔlegɔ tuuma la poan? Tɔɣɛ hon nyɛ sɛla na’am mɔɔlegɔ poan bo mabiisi ge bisɛ homea soŋa ti la da ana wuu ho ŋmɛ’ɛri la ho nyũ’ɔ. Hon la nɛreba san naɛ taaba keŋɛ na’am mɔɔlegɔ, bo ba yɔ’ɔ ti ba me tɔɣɛ to Naaŋɔ Kãtɛ Daana Yehowa yele bo nɛreba. Bala wan basɛ ti bamam me puurɛ pee.—Magaha 25:25.
Vo’osum Poan Yɛla
it-2 399
Mama
Sɛla n basɛ ti nɛra ana mama dela eŋa n tari sakerɛ ge ti Naayinɛ bɔna la en la. A ka iti sunsɔa a tɔtɔ. Nɛra san ana bura, tara puti’ira ayi ayi, ka tara sakerɛ, la beere sa’am puti’irɛ ge me ita kãbi kãbi, la ta’an basɛ ti a kan ana mama. Baabule la tɔɣɛ nɛra n daɣɛ mama yele yeti: “Nɛra han ka tana a suunre di’inha, la ane wo teŋa en ka tare sɛla n gu’ure [dɛ la].” (Mag. 25:28) La ka kpe’em ti a ti’isa putɛbe’ero. Bala me ta’an basɛ ti a eŋɛ sɛla n ka ani soŋa.
AUGUST 11-17
NAAYINƐ TUULUM YƐLA MAGAHA 26
Da Lɛna “Gerego”
it-2 729 ¶6
Saa
Saŋa. Pu’ulumbiŋere Tiŋa la poan, ba me yuun tari la uunɛ la sĩɔ saŋa. (Dekɛ makɛ Ym 32:4; Sol 2:11.) April ta paɛ October tiŋasuka bɔba, saa ni ka le niira zɔ’ɔra. Saa n ni ka le niira bala la zuo, ba yuun ni dekera la dia sankaŋa. Magaha 26:1 pa’alɛ ti dia dekeri saŋa la, la yuun ka sonti saa ni. (Dekɛ makɛ 1Sa 12:17-19.) Saa nia saŋa, la yuun ni yibesa mɛ niira. Lan yuun le dɛna ɔɔrɔ saŋa la zuo, nɛreba ni ka ta’an ze’a yiŋa. (Ezr 10:9, 13) Bala la, ho san nyɛ zɛ’an ti ho wan bɔna ta’an te’ele homea, la ni ana la soŋa.—Isa 4:6; 25:4; 32:2; Yob 24:8.
w87 10/1 19 ¶12
Tubedɔlegerɛ Tari La Suma’asum Kena Na
12 Saŋa ase’a, nɛreba basɛba boi mɛ nara tubedɔlegerɛ paa wuu Magaha 26:3 n yeti: “Kafɛɛbega nare la yeho, te mi’an nara la boŋa, te gerego poore nara la kpa’aherɛ.” Saŋa ase’a, Israeldoma la san ni tari daaŋɔ paɛ bamea, Yehowa yuun ni ka gu de basɛ: “Ba bire la poore bahɛ Yenɛ yelehom la, ba zagahɛ la Gaŋɛ zan’an daana la kan’aŋɔ. Bala te a dekɛ ba tuunle namehegɔ seko n tɔe, te ba gɛnta, te se’em ka bɔna wan soŋɛ ba. Te ba nya kaahɛ bo Na’ayenɛ ba daaŋɔ la poan, te a fan ba ba ninbaanlega la poan bahɛ.” (Yooma 107:11-13) Ge geto basɛba boi mɛ n kãbɛ suure ti tubedɔlegerɛ ka boi n wan ta’an tee ba: “Ba han ne tanhɛ hɔ te ho zagahɛ ge kpere toba, ho wan sagom te maalegɔ kana.”—Magaha 29:1.
it-2 191 ¶4
Wɔbega
Maɣesa. Naba Solomon yuun yeti, “Ho han tom gerego, la ane mɛ wo ho ŋmaɛ la ho na’arɛ deyema bahɛ la [ho wan dɛna wɔbega] bii ho nyu la yabega la.” Sira, se’em n dekɛ gerego ti a tuna bɔ’ɔra en la daani la amea. Amea wan nyɛ ti a tuuma la sa’ani mɛ ge ti a wan lui.—Mag 26:6.
Vo’osum Poan Yɛla
it-1 846
Gerego
Ho san lebese gerego “gɔɔn lebegɔ,” la pa’alɛ ti ho sakɛ a geren-yetɔɣum la mɛ ti hon la eŋa dɛna buyina. To san ka bɔta ti to ana wuu gerego yeledena poan, la nari ti to kelese makerɛ la n yeti: “Da lebehe gerego gɔɔn lebegɔ.” Ge Magaha 26:4, 5 me pa’alɛ ti to lebese en “a gɔɔn toonɛ la en ane se’em la.” Bala pa’alɛ ti to geele eŋa n yele sɛla la, basɛ ti la niɛ peelumi ti la dela yetɔɣeyooro ge basɛ ti a baŋɛ ti eŋa n tɔɣɛ sɛla la dela pumpɔreŋɔ ge me ka tara vuurɛ. Wana n ani soŋa.
AUGUST 18-24
NAAYINƐ TUULUM YƐLA MAGAHA 27
Zɔsonɔ N Soŋeri To Se’em
w19.09 5 ¶12
Yehowa Yamesi N Siregeri Bamea Dela Tuulum Bɔ’ɔra En
12 Ba san ka’am sirege n meadaana, a puurɛ ni pee mɛ. Makɛ bisɛ ti ho boi la tansugere zamesegɔ poan. Ho sɔsɛ mɛ la mabiisi zo’e zo’e. Pooren ti ayima yi ho lebe kinkɛleŋa ge yele ho yeti dia n sɛɣɛ ho nyɛna poan. Nɔkpe’ene kai ti vi wan kɛ̃ ho. Ho puurɛ kan pee la eŋa n basɛ ti ho baŋɛ la? Bisɛ ho puurɛ n wan pee ni se’em nɛra san te’ele yele ni ho kalam! Bala mea nɔɔ, la nari ti to sirege tomea ge basɛ ti to puurɛ pee mabia san nyɛ sukpe’ene ka’am tɔ. La nari ti to geele en ti a dela to zɔ ge daɣɛ to dima.—Kaalɛ Magaha 27:5, 6; Ga. 4:16.
it-2 491 ¶3
Se’em N Lɛm Hɔ
La san wuna hɔ ti ho yi nɛra ti a nyaŋɛ soŋɛ hɔ, la pa’alɛ ti ho wan ta’an dekɛ homea delum en. Magaha gɔŋɔ la ka’am tɔ ti: “Da tamɛ ho zɔdoma bii ho sɔ zɔdoma yele. Ho han bɔna muguhego poan da keŋɛ ho sɔɔn zen’en te a soŋɛ ho, se’em n lɛm ho [sha·khenʹ] ta’an soŋɛ ho nyana ho sɔɔn n boe zen’en zaan.” (Mag 27:10) Mina n gulesɛ yele wa la boti a pa’alɛ ti se’em n lɛm tɔ tari nyuurɔ mɛ ti la nara ti to basɛ ti a soŋɛ tɔ nyana to suɔ n boi zɛ’an n zaaɛ. Se’ere n sɔi la, to suɔ n boi zɛ’an n zaaɛ la ta’an ka maasum bii a bɔŋa ta’an kan ana soŋa ti a soŋɛ tɔ wuu se’em n lɛm tɔ n wan ta’an soŋɛ to se’em la.
Bunbilipaalesi—Ya Wan Bɔta Ti Ya Eŋɛ La Bem Ya Vom Poan?
7 Sɛla ayima ti to wan ta’an zamesɛ Yehoas n yuun ka kɔ’ɛ a puti’irɛ soŋa la poan dela, la nari ti to nyɔɣɛ zɔdoma sɛba n nɔŋɛ Yehowa ge bɔta ti ba basɛ ti a puurɛ pee. Zɔdoma bana wan soŋɛ tɔ ti to tum sɛla n ani soŋa. La daɣɛ to tadaandoma ma’a ti to wan ta’an nyɔɣɛ ba zɔtɔ ge to ta’an nyɔɣɛ sɛba n gani tɔ me zɔtɔ. Tɛ̃ra ti Yehoas yuun pɔ’ɛ mɛ ge nyɔɣɛ Yehoida zɔtɔ. Ho san tara zɔdoma, soke homea yeti: ‘Mam zɔdoma wa soŋeri mam ti n tara sakerɛ n kpe’em bɔ’ɔra Yehowa? Ba kpemeseri mam giila ti n dɔla Naayinɛ pa’alegɔ la? Ba tɔɣeri Yehowa la yelese’a ti ba zamesɛ Baabule la poan la yɛla? Ba ni bo mam kã’aŋɔ la san nara bii ba ni yeen tɔɣɛ la mam boti n wum sɛla ma’a?’ (Mag. 27:5, 6, 17) Yelemɛŋɛrɛ, ho zɔdoma san ka nɔŋɛ Yehowa, ho ka eeri ba. Ge ho zɔdoma san nɔŋɛ Yehowa, kɔ’ɔn gurɛ ba kankaŋi. Ba wan soŋɛ hɔ saŋa woo!—Mag. 13:20.
Vo’osum Poan Yɛla
w06 9/15 19 ¶12
Magaha Gɔŋɔ La Yelekpina
27:21. Ba san pɛ̃ɣɛ tɔ, la ta’an pa’alɛ ton de nɛresɛba taaba. To san siregera tomea ge ti ba pɛ̃ɣɛ tɔ, to wan dekɛ pɛ̃ka la bo Yehowa. La me wan kpemese to giila ti to kelum pu’usa en. Ba san pɛ̃ɣɛ tɔ ti la ana to wuu to gani nɛreba mɛ, la pa’alɛ ti to ka siregeri tomea.
AUGUST 25-31
NAAYINƐ TUULUM YƐLA MAGAHA 28
Tunfɛ̃’ɛsadaana, La Tontɔɔdaana N Boi To’ore To’ore Se’em
w93 5/15 26 ¶2
Hon Doli Yehowa La Ho Suure Za’a?
“Tontɔɔdaana la wan kpeem wo gbegenpaalega.” (Magaha 28:1) Tontɔɔdoma tari la sakerɛ. Ba dekɛ la bamea delum Naayinɛ Yelesum la ge tara sukpe’ene pu’usa Yehowa, la ka pakɛ la daaŋɔ seto n wan paɛ ba.
it-2 1139 ¶3
Bɔkerɛ
Sɛba n zaɣesɛ Naayinɛ. Tunfɛ̃’ɛsadaana san yeti a kɔ’ɛ puti’irɛ eŋɛ sɛla, a ni ka geele Naayinɛ puti’irɛ n de se’em. (Yob 34:27) Eŋa n iti a suure n boti sɛla ge me ka tara bɔkerɛ la zuo, a itigɔ woo ka ani soŋa. (Ym 36:1-4) Hali a san puɣum yeti eŋa pu’useri la Naayinɛ, a nɔŋɛ la a kɛlesa nɛreba puti’irɛ gana Naayinɛ. (Isa 29:13, 14) A san tum be’em, a ni bisɛ ti la dela “de’eŋɔ” (Mag 10:23) nyaa kɔ’ɔn tuna be’em. A ti’isegɔ pa’alɛ ti a ka tari yɛm, hali ti a ti’isa ti Naayinɛ ka nyɛti a be’em tuuma la. A ni basɛ ti la ana wuu Naayinɛ ka le tara paŋa n wan nyɛta yelese’a n iti. (Ym 94:4-10; Isa 29:15, 16; Yer 10:21) A itigɔ la basɛ ti la ana wuu a yeti “Yenɛ ka boe” (Ym 14:1-3) ge puɣum ka geele Naayinɛ ti a dela sɛla. Eŋa n ka tari Naayinɛ pa’alegɔ tuna tuuma la zuo a kan nyaŋɛ bɔkɛ yɛla soŋa, geele yɛla ge nyaŋɛ kɔ’ɛ a puti’irɛ soŋa.—Mag 28:5.
it-1 1211 ¶4
Birikinte
Nɛra san wan ta’an tara birikinte, la daɣɛ amea paŋa poan ge la dela eŋa n tari sakerɛ bɔ’ɔra Yehowa ge dekɛ amea delum En ti eŋa ma’a n wan ta’an faaɛ en basɛ. (Ym 25:21) Naayinɛ pu’ulum biŋe ti a wan dɛna “tɛ’ɛlɛga,” la to “paŋa” ge gu’ura tɔ to san tara birikinte. (Mag 2:6-8; 10:29; Ym 41:12) Ban kɔ’ɔn bɔta ti ba ita sɛla n wan basɛ ti Yehowa puurɛ pee la n soŋeri ba ti ba ze’a kankaŋi. La me ni soŋɛ ba ti ba ta’an eŋɛ ban boti ba tum sɛla bo Yehowa la. (Ym 26:1-3; Mag 11:5; 28:18) Yob yuun baŋɛ ti tunfɛ̃’ɛsadoma itigɔ ta’an basɛ ti la wuna tontɔɔdoma, hali ba ta’an ki mɛ. Ge Yehowa basɛ ti to tara suure lua ti a nyɛti yelese’a n paari tontɔɔdoma la mɛ ge me wan kã bo ba ti ba ta tara suma’asum bɔna tingɔŋɔ wa poan. (Yob 9:20-22; Ym 37:18, 19, 37; 84:11; Mag 28:10) Yob yele la pa’alɛ ti nɛra san tara birikinte, a tari la tuulum ti nɛreba me wan bɔ’ɔra en gilema ge daɣɛ la eŋa n de buntata. (Mag 19:1; 28:6) Kɔma san tara dɔɣera n tari birikinte, ba puurɛ ni pee mɛ (Mag 20:7) ge ti ba wan nyɛ nyuurɔ ba sɔ tunsoma, a yusonɛ, la nɛreba n bo’ori en gilema se’em la zuo.
Vo’osum Poan Yɛla
w01 12/1 11 ¶3
Ho Wan Ta’an Gu Homea Vo’osum Suure Bã’a Poan
Se’em N Ba’ɛ Bisɛ Nam Amea. Nɛreba zo’e zo’e ni ti’isɛ ti bamam kɔ’ɔn tara la imma’asum ge ti suure bã’a ni kelum nyɔkɛ ba. Saŋa zo’e zo’e ba ta’an ni ti’isa ti la yele ka pakɛ ti ba keŋɛ ta kɛki bamea, sɛla n sɔi la ba tari la imma’asum. Bala mea nɔɔ, basɛba ta’an ti’isa ti bamam n de Kristakɔma ti la yue la zuo, sɛsɛla kan ta’an eŋɛ ba. Ba ta’an kan le kumesa bamea vo’osum poan bii ba tara Baabule la viisa bamea. Ba ta baŋera la, ti yele n paɛ ba. La ani soŋa ti to kelese tuntuna Paul n ka’am tɔ ti to bisɛ tomea soŋa la to da ba’ɛ nam tomea la. A yuun yeti: “Dene poan, hon se’em n tɛn’ɛhe te ho sɛ ze’ele sontii ho tara ho mea soŋa soŋa gee da le lu.” To san tɛ̃ra ti to ka di mi’a ge tara Baabule la viisa tomea saŋa woo, la pa’alɛ ti to tari la yɛm.—1 Korint 10:12; Magaha 28:14.