Gbigbọnọ-Yinyin po Agbasalilo Towe Po
VLAVO hiẹ nọ yí suhugan whenu towe tọn zan nado penukundo agbasalilo towe go. To azán lẹpo gbè, hiẹ nọ damlọn na nudi ganhiho ṣinatọ̀n, bo nọ yí ganhiho delẹ zan nado danú bo dùnú, bosọ nọ yí ganhiho ṣinatọ̀n kavi humọ do wazọ́n nado sọgan sú ohọ̀-kuẹ bosọ dùnú. Eyin hiẹ jẹazọ̀n, vlavo hiẹ nọ yí whenu po akuẹ po zan nado yì doto de dè kavi nado wleawuna gbémasin de. Hiẹ nọ hẹn whégbè do wiweji, lawu, bo tlẹ sọgan nọ daihun lanmẹyiya tọn to gbesisọmẹ, popolẹpo na agbasalilo towe wutu.
Ṣigba, gbigbọṣi agbasalilo mẹ bẹ nususu hẹn hú nukunpipedo nuhudo agbasa tọn towe lẹ go poun. Onú devo sọ tin he nọ yí adà titengbe de wà to dagbemẹ-ninọ towe mẹ. Dodinnanu amasinzọnwiwa tọn ko dohia dọ agbasalilo towe tindo kanṣiṣa pẹkipẹki hẹ gbigbọnọ-yinyin towe.
Kanṣiṣa Tlọlọ De
“Suhugan dodinnanu tintan whenu tọn lẹ do whẹho ehe ji ko dohia dọ kanṣiṣa tlọlọ de tin to gbigbọnọ-yinyin dagbe po agbasalilo dagbe po ṣẹnṣẹn,” wẹ Mẹplọntọ daho Hedley G. Peach Wehọmẹ Alavọ Melbourne, Australie tọn dọ. The Medical Journal of Australia (MJA) basi zẹẹmẹ do dodinnanu ehe ji dọmọ: “E ko yin ayidego dọ sinsẹ̀nnọ-yinyin . . . nọ de sisà zẹjlẹgo ohùn tọn pò, nọ de cholestérol pò to lanmẹ . . . bo tlẹ nọ de owù azọ̀n agbasa wiwọ̀ tọn pò.”
Mọdopolọ, to États-Unis, dodinnanu 2002 tọn de heyin bibasi na gbẹtọ 6 545 gbọn Wehọmẹ Alavọ Californie tọn (UC), to Berkeley dali, dohia dọ “mẹhe nọ yì amísa whladopo to osẹ dopo mẹ lẹ ma nọ yawu kú di mẹhe nọ yawu gọ̀n kavi ma nọ yì gbede lẹ.” Doug Oman, heyin nukọntọ dodinnanu lọ tọn po mẹplọntọ de to Wehọmẹ Alavọ Berkeley tọn po dọmọ: “Mí mọ vogbingbọn ehe etlẹ yin to ayidonugo nina hlan whẹho lẹ taidi kanṣiṣa gbẹtọvi tọn lẹ po nuhahun agbasalilo tọn paa lẹ po, gọna azọ̀-nùnù po aihundida lanmẹyiya tọn po godo.”
To alọdindlẹndo alemọyi devo lẹ he mẹhe tindo pọndohlan gbigbọmẹ tọn to gbẹ̀mẹ lẹ nọ duvivi etọn mẹ, linlinwe MJA dọmọ: “Dodinnanu Australie tọn ko doayi e go dọ nuhahun alọwle tọn, ahàn sinsinyẹn po amasin adínọ ṣiṣizan po, walọyizan ylankan lẹ po mẹdetiti-hùhù po, magbọjẹ po apọṣimẹ sinsinyẹn po, gọna ṣejannabi nọ depò taun to mẹhe yin sinsẹ̀nnọ lẹ ṣẹnṣẹn.” To yidogọ mẹ, linlinwe BMJ (he nọ yin yiylọ dai dọ The British Medical Journal) na linlin dọmọ: “To whenuena mẹhe sẹpọmẹ de kú, mẹhe sọalọakọ́n nado yin sinsẹ̀nnọ lẹ nọ yawu duto awubla yetọn ji mlẹnmlẹn hú mẹhe ma yin sinsẹ̀nnọ lẹ.”
Linlẹn voovo lẹ wẹ tin gando nuhe gbigbọnọ-yinyin nujọnu tọn zẹẹmẹdo go. Ṣogan, ninọmẹ gbigbọmẹ tọn towe nọ yinuwado agbasalilo towe po ninọmẹ apọ̀nmẹ tọn towe po ji. Kunnudenu ehe sọgbe hẹ hodidọ Jesu Klisti tọn to nudi owhe 2 000 lẹ die. E dọmọ: “Ayajẹnọ wẹ mẹhe nuhudo gbigbọmẹ tọn yetọn nọ duahunmẹna lẹ.” (Matiu 5:3, NW) To whenuena e yindọ ninọmẹ gbigbọmẹ tọn towe nọ yinuwado agbasalilo po ayajẹ towe po ji, owhẹ̀ towe na whẹ́n nado kanse dọmọ: ‘Fie wẹ yẹn sọgan mọ anademẹ gbigbọmẹ tọn dejidego te? Podọ etẹwẹ gbigbọnọ-yinyin bẹhẹn?’