Mí Yin Azọ́nplọn Nado Dekunnu Mlẹnmlẹn
“Mìwlẹ [na] yin kunnudetọ na mi to Jelusalẹm mẹ, to Jude lẹpo mẹ, po Samalia po, podọ jẹ opodo aigba tọn.”—OWALỌ LẸ 1:8.
1, 2. Azọ́n tẹwẹ yin didena Pita, podọ mẹnu wẹ de e na ẹn?
“JESU Nazalẹti tọn . . . naṣẹ mí nado dọyẹwheho hlan gbẹtọ lẹ, podọ nado dekunnu [mlẹnmlẹn] dọ, ewọ wẹ yè desọn Jiwheyẹwhe dè do basi whẹdatọ omẹgbẹ̀ po oṣiọ po tọn.” (Owalọ lẹ 10:38, 42) Hogbe ehelẹ wẹ apọsteli Pita yí do basi zẹẹmẹ azọ́ndenamẹ he e ko mọyi nado yin wẹndagbe-jlatọ de tọn na Kọneliọsi po whédo etọn po.
2 Whetẹnu wẹ Jesu deazọ́n enẹ na ẹn? Pita sọgan ko to nulẹnpọndo nuhe Jesu dọ to fọnsọnku etọn godo tlolo whẹpo e do hẹji yì olọn mẹ ji. To ojlẹ enẹ mẹ, Jesu dọna devi nugbonọ etọn lẹ dọmọ: “Mìwlẹ [na] yin kunnudetọ na mi to Jelusalẹm mẹ, to Jude lẹpo mẹ, po Samalia po, podọ jẹ opodo aigba tọn.” (Owalọ lẹ 1:8) Nalete, ojlẹ vude jẹnukọnna enẹ, Pita lọsu ko mọnukunnujẹemẹ dọ taidi devi Jesu tọn, ewọ dona dọ nuyise etọn gando Jesu go na mẹdevo lẹ.
Azọ́nplọnmẹ Owhe Atọ̀n Tọn
3. Azọ́njiawu tẹwẹ Jesu wà, podọ oylọ tẹwẹ e basina Pita po Andle po?
3 Osun susu to baptẹm Jesu tọn godo to owhe 29 W.M., e to yẹwhehodọ to fie Pita po nọvisunnu etọn Andle po nọ wazọ́n whèhuhu tọn te to Ohù Galili tọn ji. Ozán lọ blebu wẹ yé ko yí do wazọ́n to ovọ́ mẹ. Ṣogan, Jesu dọna yé dọ: “[Mì] sisẹ́ do odò ohù tọn mẹ; na mì ni kọ̀n odọ̀ mìtọn na bẹpli.” To whenuena yé wà nuhe Jesu dọ, “yé ṣinyọ́n whèvi susu dopọ: odọ̀ yetọn sọ tlẹ́n.” Obu di Pita to whenuena e mọ azọ́njiawu lọ, ṣigba Jesu hẹn ẹn deji bo dọna ẹn dọ: “A dibu blo, sọn dinvie yì, hiẹ na wle gbẹtọ lẹ [gbẹ̀te].”—Luku 5:4-10.
4. (a) Nawẹ Jesu plọnazọ́n devi etọn lẹ nado dekunnu gbọn? (b) Obá tẹ mẹ wẹ lizọnyizọn devi Jesu tọn lẹ tọn na gbloada jẹ yijlẹdo etọn titi go?
4 To afọdopolọji, Pita po Andle po—gọna Jakobu po Johanu po, visunnu Zẹbede tọn lẹ—jo vàtlẹ yetọn lẹ do bo hodo Jesu. Na nudi owhe atọ̀n, yé hodo Jesu dile e to yẹwhehodọ bosọ mọ azọ́nplọnmẹ yí nado yin wẹndagbe-jlatọ. (Matiu 10:7; Malku 1:16, 18, 20, 38; Luku 4:43; 10:9) To vivọnu azọ́nplọnmẹ lọ tọn, to Nisan 14, owhe 33 W.M., Jesu dọna yé dọ: “Mẹhe yí mi sè, azọ́n he yẹn wà, wẹ ewọ na wà ga; azọ́n he sọ klohu ehelẹ wẹ e na wà.” (Johanu 14:12) Devi Jesu tọn lẹ na dekunnu mlẹnmlẹn dile Jesu wà do ṣigba to obá he gbloada hugan de mẹ. Dile yé wá mọ do to godo mẹ, yewlẹ gọna mẹhe na lẹzun devi to sọgodo lẹpo na dekunnu to “akọta lẹpo” mẹ, kakajẹ “opodo aihọn tọn.”—Matiu 28:19, 20.
5. Aliho tẹlẹ mẹ wẹ mí sọgan mọaleyi sọn azọ́nplọnmẹ he Jesu na hodotọ etọn lẹ mẹ te?
5 Mí to gbẹnọ to ojlẹ “opodo aihọn tọn” mẹ. (Matiu 24:3) To vogbingbọnmẹ na devi dowhenu tọn enẹlẹ, mí ma sọgan zọnhẹ Jesu bo pọ́n aliho he mẹ e to yẹwhehodọ na gbẹtọ lẹ te gba. Ṣogan, mí sọgan mọaleyi sọn azọ́nplọnmẹ etọn mẹ gbọn hihia lehe e dọyẹwheho gbọn po anademẹ he e na hodotọ etọn lẹ po to Biblu mẹ dali. (Luku 10:1-11) Nalete, hosọ ehe na dọhodo onú titengbe devo he Jesu dohia devi etọn lẹ ji—enẹ wẹ pọndohlan dagbe tintindo gando azọ́n yẹwhehodidọ tọn go.
E Nọ Hò Gbẹtọ lẹ Tọn Pọ́n
6, 7. Jẹhẹnu Jesu tọn tẹwẹ hẹn lizọnyizọn etọn tindo kọdetọn dagbe, podọ nawẹ mí sọgan hodo apajlẹ etọn to adà ehe mẹ gbọn?
6 Naegbọn kunnudide Jesu tọn do tindo kọdetọn dagbe sọmọ? Whẹwhinwhẹ́n dopo wẹ yindọ e tindo ojlo sisosiso to gbẹtọ lẹ mẹ bosọ nọ hò yetọn pọ́n. Psalm-kantọ lọ dọ dọdai dọ Jesu na “tindo lẹblanu to oyanọ po agbátọnọ po ji.” (Psalm 72:13) Na jide tọn, e hẹn dọdai enẹ di. Biblu dọ dọ to gbèdopo, “whenuena e mọ agundaho lẹ, e walẹblanuna yé, na yè hẹn agbọ́pé yé, bosọ hẹn apọṣi yé di lẹngbọ he ma tindo lẹngbọhọtọ de.” (Matiu 9:36) Mẹhe tlẹ peve to ylando mẹ lẹ lọsu mọdọ e nọ hò mẹtọn pọ́n bọ yé sọ dọnsẹpọ ẹ.—Matiu 9:9-13; Luku 7:36-38; 19:1-10.
7 Mílọsu lẹ na tindo kọdetọn dagbe to egbehe eyin mí nọ hò gbẹtọ lẹ tọn pọ́n to aliho dopolọ mẹ. Whẹpo hiẹ nido tọ́n yì lizọnyizọn lọ mẹ, naegbọn a ma na yí ojlẹ kleun de do lẹnnupọndo lehe gbẹtọ lẹ tindo nuhudo nudọnamẹ he hiẹ hẹn jei yé dè lọ tọn to niyaniya mẹ do ji? Lẹnnupọndo nuhahun he yé sọgan tindo lẹ ji ehe Ahọluduta lọ kẹdẹ wẹ na didẹ. Magbe nado yin pọndohlan dagbenọ gando mẹlẹpo go, na hiẹ ma yọ́n mẹhe na kẹalọyi owẹ̀n lọ. Vlavo mẹhe hiẹ na dọnsẹpọ bọdego ko to dẹ̀ho dọ mẹde taidi hiẹ ni wá gọalọna ẹn!
Owanyi Whàn Ẹn
8. To apajlẹ Jesu tọn hihodo mẹ, etẹwẹ nọ whàn hodotọ etọn lẹ nado dọyẹwheho wẹndagbe lọ tọn?
8 Jesu lá wẹndagbe gando hẹndi ojlo Jehovah tọn, klandowiwe oyín Etọn tọn, podọ whẹsuna nupojipetọ-yinyin Etọn go—yèdọ whẹho titengbe hugan he pannukọn gbẹtọvi lẹ. (Matiu 6:9, 10) Na Jesu yiwanna Otọ́ etọn wutu, e yin whinwhàn nado hẹn tenọgligo kakajẹ opodo bo dekunnu mlẹnmlẹn dogbọn Ahọluduta lọ, he na didẹ whẹho enẹlẹ dali. (Johanu 14:31) Mẹwhinwhàn dopolọ wẹ hodotọ Jesu tọn lẹ tindo to egbehe, enẹwutu yé nọ dovivẹnu susu dile yé to mahẹ tindo to lizọnyizọn lọ mẹ. Apọsteli Johanu dọmọ: “Ehe wẹ owanyi Jiwheyẹwhe tọn, dọ mí ni yìn osẹ́n etọn,” he mẹ gbedide lọ nado dọyẹwheho wẹndagbe lọ tọn bo hẹn gbẹtọ lẹ zun devi tin te.—1 Johanu 5:3; Matiu 28:19, 20.
9, 10. Gbọnvona owanyi Jiwheyẹwhe tọn, owanyi devo tẹwẹ nọ whàn mí nado dekunnu mlẹnmlẹn?
9 Jesu dọna hodotọ etọn lẹ dọmọ: “Eyin mì yiwanna mi, mì bo yìn osẹ́n ṣie lẹ. Ewọ he tindo osẹ́n ṣie lẹ, bosọ yìn yé, ewọ lọ wẹ mẹhe yiwanna mi.” (Johanu 14:15, 21) Enẹwutu, owanyi he mí tindo na Jesu dona whàn mí nado dekunnuna nugbo lọ bo setonuna onú devo he Jesu degbè etọn lẹ. To fọnsọnku Jesu tọn godo, e sọawuhia devi etọn lẹ to gbèdopo bo dotuhomẹna Pita dọmọ: “Yìn lẹngbọvu ṣie lẹ. . . . Yìn lẹngbọ ṣie lẹ. . . . Yìn lẹngbọ ṣie lẹ.” Etẹwẹ na whàn Pita nado wà ehe? Jesu do gblọndo lọ hia to whenuena e kanse Pita pludopludo dọ: “Hiẹ yiwanna mi? . . . Hiẹ yiwanna mi? . . . Hiẹ yiwanna mi?” Mọwẹ, owanyi he Pita tindo na Jesu wẹ na whàn ẹn nado dekunnu mlẹnmlẹn, bo mọ “lẹngbọ” Jesu tọn lẹ, bosọ yìn yé to gbigbọ-liho.—Johanu 21:15-17.
10 Mí ma jẹakọhẹ Jesu to egbehe dile Pita jẹakọhẹ ẹ do gba. Etomọṣo, mí mọnukunnujẹ nujọnu-yinyin nuhe Jesu wà na mí tọn mẹ ganji. Owanyi daho he sisẹ́ ẹ nado “dọ́ okú pọ́n na gbẹtọ lẹ dopodopo” nọ whàn ahun mítọn lẹ. (Heblu lẹ 2:9; Johanu 15:13) Mí tindo numọtolanmẹ dopolọ he Paulu tindo to whenuena e wlan dọmọ: ‘Owanyi Klisti tọn to huhlọnna mí; e kú na omẹ popo, na yé he tin to ogbẹ̀ lẹ ma nado tin to ogbẹ̀ sọn dinvie hlan yede ba, adavo hlan ewọ.’ (2 Kọlintinu lẹ 5:14, 15) Mí na dohia dọ mí yọ́n nuhọakuẹ-yinyin owanyi he Jesu tindo na mí tọn podọ dọ mílọsu yiwanna ẹn ga eyin mí nọ yí nukun nujọnu tọn do pọ́n azọ́ndenamẹ lọ nado dekunnu mlẹnmlẹn. (1 Johanu 2:3-5) Mí ma na yí nukun vlẹkẹsẹ do pọ́n azọ́n yẹwhehodidọ tọn mítọn gbede, taidi dọ avọ́sinsan Jesu tọn lẹzun onú mawé kavi onú tata de to nukun mítọn mẹ nkọ.—Heblu lẹ 10:29.
Nuhe Yin Nujọnu Hugan lọ Hinhẹn do Ayiha Mẹ
11, 12. Etẹwẹ yin lẹndai he wutu Jesu wá aihọn mẹ, podọ nawẹ e ze ayidonugo etọn lẹpo do ehe ji gbọn?
11 To whenuena Jesu tin to Pọntiu Pilati nukọn, e dọmọ: “Hlan opodo he wẹ yè ko do ji mi, podọ hlan opodo he wẹ yẹn do wá aihọn mẹ, na yẹn nido dekunnu hlan nugbo lọ.” (Johanu 18:37) Jesu ma dike nudepope ni fẹayihasẹna ẹn sọn kunnudide hlan nugbo lọ mẹ gba. Nuhe Jiwheyẹwhe jlo dọ e ni wà niyẹn.
12 Matin ayihaawe, Satani tẹ́n Jesu pọ́n to whẹho ehe mẹ. To baptẹm Jesu tọn godo tlolo, Satani ze “ahọluigba aihọn tọn lẹpo, po gigo yetọn po” donukọnna ẹn bo dọna ẹn dọ emi na hẹn ẹn zun omẹ nukundeji de to aihọn mẹ. (Matiu 4:8, 9) To nukọn mẹ, Ju lẹ jlo na yí ì do doahọlu. (Johanu 6:15) Mẹdelẹ sọgan lẹnnupọndo ale he na ko dekọtọn sọn e mẹ lẹ ji eyin Jesu ko kẹalọyi nuzedonukọnnamẹ enẹlẹ, bo tlẹ sọgan lẹn to ohò yede tọn mẹ dọ Jesu sọgan ko wà onú dagbe susu na gbẹtọvi lẹ taidi ahọlu aigba ji tọn de. Ṣigba, Jesu gbẹ́ linlẹn mọnkọtọn dai. Kunnudide hlan nugbo lọ wẹ yin nujọnu hugan to nukun etọn mẹ.
13, 14. (a) Etẹwẹ ma fẹayihasẹna Jesu sọn azọ́n titengbe hugan etọn kọ̀n? (b) Dile etlẹ yindọ Jesu yin agbátọnọ to agbasa-liho, etẹwẹ e wadotana?
13 Afọdidona adọkunnu lẹ masọ fẹayihasẹna Jesu. Taidi kọdetọn de, e ma zan gbẹzan adọkunnọ tọn gba. E ma tlẹ tindo ohọ̀ edetiti tọn. To gbèdopo, e dọmọ: “Wọtupọẹ lẹ tindo odò, ohẹ̀ olọn tọn lẹ sọ tindo adọ́: ṣigba Ovi gbẹtọ tọn ma tindo fihe e na yí ota etọn dai te.” (Matiu 8:20) To whenuena Jesu kú, nuhọakuẹ dopo he Biblu dọna mí dọ e tindo wẹ awugbó etọn he ji awhànfuntọ Lomu tọn lẹ de ovò do. (Johanu 19:23, 24) Be ehe dohia dọ gbẹzan Jesu tọn pòta wẹ ya? Paali!
14 Jesu basi wadotana nususu tọn hugan adọkunnọ alọtlútọ lẹ lọsu. Paulu dọmọ: “Mìwlẹ yọ́n ojọmiọn Jesu Klisti Oklunọ mítọn tọn, dọ, le ewọ yin adọkunnọ, ṣigba na mìwlẹ tọn wutu, e lẹzun agbátọnọ, na mìwlẹ nido yin adọkunnọ gbọn ohẹ́n etọn mẹ.” (2 Kọlintinu lẹ 8:9; Filippinu lẹ 2:5-8) Dile etlẹ yindọ Jesu yin agbátọnọ to agbasa-liho, e hùn dotẹnmẹ dote na whiwhẹnọ lẹ nado duvivi ogbẹ̀ madopodo tọn to pipé mẹ. Lehe mí dopẹ́ na ẹn do sọ! Podọ mí jaya susu to ahọsumẹ he e mọyi mẹ na e ze ojlo Jiwheyẹwhe tọn wiwà do otẹn tintan mẹ to gbẹzan etọn mẹ wutu.—Psalm 40:8; Owalọ lẹ 2:32, 33, 36.
15. Etẹwẹ họakuẹ hugan adọkun?
15 To egbehe, Klistiani he nọ dovivẹnu nado hodo apajlẹ Jesu tọn lẹ ma nọ dike afọdidona adọkun ni fẹayihasẹna yé. (1 Timoti 6:9, 10) Yé yọnẹn dọ adọkunnu lẹ sọgan hẹn gbẹzan voawu, ṣigba yé sọ yọnẹn ga dọ sọgodo mavọmavọ yetọn ma sinai do adọkunnu lẹ ji gba. Eyin Klistiani de kú, adọkunnu etọn lẹ ma yọn-na-yizan na ẹn ba kẹdẹdile awugbó Jesu tọn ma yọn-na-yizan na ẹn to okú etọn godo do. (Yẹwhehodọtọ 2:10, 11, 17-19; 7:12) To whenuena Klistiani de kú, nuhọakuẹ dopo he e tindo wẹ haṣinṣan etọn hẹ Jehovah po Jesu Klisti po.—Matiu 6:19-21; Luku 16:9.
Nukundiọsọmẹ Ma Hẹn Ẹn Gbọjọ
16. Nawẹ Jesu yinuwa to nukundiọsọmẹ glọ gbọn?
16 Nukundiọsọmẹ ma fẹayihasẹna Jesu sọn kunnudide hlan nugbo lọ mẹ gba. Dile e tlẹ yọnẹn ganji dọ lizọnyizọn etọn to aigba ji na dekọtọn do okú avọ́sinsan tọn mẹ, enẹ ma hẹn ẹn gbọjọ gba. Paulu dọ gando Jesu go dọ: “Na ayajẹ he yè ze do nukọn etọn wutu e doakọnna [yatin] lọ, ma hò winyan lọ pọ́n, bosọ sinai to adusilọ ofìn Jiwheyẹwhe tọn ji.” (Heblu lẹ 12:2) Doayi e go dọ Jesu ‘ma hò winyan pọ́n gba.’ Nuhe agọjẹdomẹtọ lẹ na lẹn gando e go ma dotukla ẹ gba. Ayidonugo etọn lẹpo tin to ojlo Jiwheyẹwhe tọn wiwà ji.
17. Etẹwẹ mí sọgan plọn sọn akọ́ndonanu Jesu tọn mẹ?
17 Paulu yí akọ́ndonanu Jesu tọn zan taidi apajlẹ bo na tuli Klistiani lẹ dọmọ: “[Mì] lẹn ewọ he doakọnna hodọdomẹgo ylandonọ lẹ tọn he hunkọ tọn pọ́n, na onú nikaa dikọna mì, na agbọ́ nikaa pé ayiha mìtọn.” (Heblu lẹ 12:3) Nado dọ hójọhó, pipehẹ nukundiọsọmẹ kavi mẹṣanko egbesọegbesọ sọgan hẹn apọṣimẹ. E sọgan hẹn agbọ́pemẹ nado to avùntenọ egbesọegbesọ sọta nudọ̀nmẹdogo aihọn tọn lẹ, ehe sọgan zọ́n bọ hẹnnumẹ he nọ na tuli mí nado “yin nude” lẹ na nọ mọhodọdo mí go. Ṣigba, taidi Jesu, mí nọ ganjẹ alọgọ Jehovah tọn go dile mí yí nujikudo do to Ahọluduta lọ ze do otẹn tintan mẹ to gbẹzan mítọn lẹ mẹ.—Matiu 6:33; Lomunu lẹ 15:13; 1 Kọlintinu lẹ 2:4.
18. Nuplọnmẹ dagbe tẹwẹ mí sọgan mọyi sọn nuhe Jesu dọna Pita mẹ?
18 Jesu dohia dọ emi ma yin ayihafẹsẹna to whenuena e jẹ didọna devi etọn lẹ ji dọ emi na kú to madẹnmẹ. Pita dọna Jesu dọ ‘Jiwheyẹwhe ni wàlẹblanu to e ji’ bosọ hẹn ẹn deji dọ ‘ehe ma na jọ’ do e go gbede. Jesu sú otó etọn do nudepope he sọgan dekanpona gbemima etọn nado wà ojlo Jiwheyẹwhe tọn. E lẹ́godo do Pita bo dọmọ: “Tọ́nsọn godo ṣie, Satani: zannu [ahlìda tọn] wẹ hiẹ hlan mi: na hiẹ ma hà onú he yin Jiwheyẹwhe tọn gba, adavo onú gbẹtọ tọn lẹ.” (Matiu 16:21-23) Mọdopolọ, mì gbọ mílọsu lẹ ni magbe nado gbẹ́ linlẹn gbẹtọ tọn lẹ dai gbidigbidi. Kakatimọ, mì dike linlẹn Jiwheyẹwhe tọn lẹ ni nọ deanana mí to whepoponu.
Ahọluduta lọ Na Hẹn Ale Mavọmavọ lẹ Wá
19. Dile etlẹ yindọ Jesu wà azọ́njiawu susu, etẹwẹ yin adà titengbe hugan lizọnyizọn etọn tọn?
19 Jesu wà azọ́njiawu susu nado dohia dọ ewọ wẹ yin Mẹssia lọ. E tlẹ fọ́n oṣiọ lẹ ga. Gbẹtọ susu yiwanna azọ́njiawu enẹlẹ, ṣigba Jesu ma wá aigba ji nado wà azọ́n homẹdagbe tọn lẹ poun gba. E wá nado dekunnu hlan nugbo lọ. E yọnẹn dọ alọgọ agbasa-liho tọn depope he emi namẹ ma na dẹn-to-aimẹ gba. Mẹhe tlẹ yin finfọnsọnku lẹ nasọ kú. Aliho dopo akàn he e sọgan yí do gọalọna mẹdelẹ nado mọ ogbẹ̀ madopodo wẹ nado dekunnu hlan nugbo lọ.—Luku 18:28-30.
20, 21. Nawẹ Klistiani nugbo lẹ nọ hẹn jlẹkajininọ go to azọ́n dagbe lẹ wiwà mẹ gbọn?
20 To egbehe, mẹdelẹ nọ tẹnpọn nado hodo apajlẹ azọ́n dagbe he Jesu wà lẹ tọn gbọn dotowhé lẹ gbigbá kavi alọgigọna wamọnọ he tin to aihọn mẹ lẹ dali. To whedelẹnu, yé nọ yí onú susu do sanvọ́ nado sọgan wà ehe, podọ ojlo dagbe yetọn jẹna pipà; ṣigba kọgbọ depope he yé wleawuna nọ yin na ojlẹ gli de poun. Ahọluduta Jiwheyẹwhe tọn kẹdẹ wẹ na hẹn kọgbọ mavọmavọ wá. Nuhe zọ́n niyẹn bọ Kunnudetọ Jehovah tọn lẹ hẹn alọnu ján, dile Jesu wà do, to kunnudide hlan nugbo lọ dogbọn Ahọluduta enẹ dali mẹ.
21 Na nugbo tọn, Klistiani nugbo lẹ lọsu nọ wà azọ́n dagbe susu. Paulu wlan dọmọ: “Le míwlẹ mọtẹn do, mì gbọ mí ni nọ wà dagbe hlan omẹ popo, humọ hlan yé he yin yise whédo tọn lẹ.” (Galatianu lẹ 6:10) Eyin nugbajẹmẹji lẹ jọ kavi eyin mẹde tin to nuhudo mẹ, mí ma nọ whleawu nado “wà dagbe” na kọmẹnu mítọn lẹ kavi mẹmẹsunnu Klistiani mítọn lẹ gba. Etomọṣo, mí ma nọ dike nudepope ni fẹayihasẹna mí sọn azọ́n titengbe hugan lọ kọ̀n—enẹ wẹ nado dekunnu hlan nugbo lọ.
Plọnnu sọn Apajlẹ Jesu Tọn Mẹ
22. Naegbọn Klistiani lẹ nọ dọyẹwheho na kọmẹnu yetọn lẹ?
22 Paulu wlan dọmọ: “Dindọn tin hlan mi, eyin yẹn ma dọyẹwheho wẹndagbe tọn!” (1 Kọlintinu lẹ 9:16) E ma yí nukun vlẹkẹsẹ do pọ́n wẹndagbe lọ gba na lilá ẹ zẹẹmẹdo ogbẹ̀ na ewọ po mẹhe dotoaina ẹn lẹ po wutu. (1 Timoti 4:16) Pọndohlan dopolọ wẹ mí tindo gando lizọnyizọn mítọn go. Mí jlo na gọalọna kọmẹnu mítọn lẹ. Mí jlo na do owanyi mítọn hia na Jehovah. Mí jlo na do owanyi mítọn hia na Jesu po pinpẹn-nutọn-yinyọnẹn mítọn po na owanyi daho he e tindo na mí. Enẹwutu, mí nọ dọyẹwheho wẹndagbe lọ tọn bo nọ gbọnmọ dali nọgbẹ̀, e ma yin “hlan wantuntun gbẹtọ tọn, adavo hlan ojlo Jiwheyẹwhe tọn.”—1 Pita 4:1, 2.
23, 24. (a) Etẹwẹ mí plọn sọn azọ́njiawu whèhuhu tọn lọ mẹ? (b) Mẹnu lẹ wẹ to kunnude mlẹnmlẹn to egbehe?
23 Taidi Jesu, mí ma nọ yin ayihafẹsẹna sọn azọ́n titengbe hugan mítọn kọ̀n eyin mẹdevo lẹ tlẹ to mí ṣanko kavi yí homẹgble do gbẹ́ owẹ̀n mítọn dai. Mí plọnnu sọn azọ́njiawu he Jesu wà mẹ to whenuena e ylọ Pita po Andle po nado hodo e. Mí mọdọ eyin mí setonuna Jesu bo kọ̀n odọ̀ mítọn do osin he taidi nuhe ma tindo whèvi lẹ mẹ, odọ̀ mítọn sọgan ṣinyọ́n whèvi susu ji to yẹhiadonu-liho. Whèhutọ Klistiani susu ko tindo kọdetọn dagbe to azọ́nwiwa to aigba-denamẹ he taidi dehe ma nọ de sinsẹ́n tọ́n lẹ mẹ to owhe susu godo. Mẹdevo lẹ ko penugo nado sẹtẹn yì fie whèhuhu lọ pọnte te podọ yé ko tindo kọdetọn dagbe susu to finẹ. Depope he whẹho lọ sọgan yin, mí ma na doalọtena kunnudide hlan nugbo lọ gba. Mí yọnẹn dọ Jesu ma ko lá dọ azọ́n yẹwhehodidọ tọn ko fó to fidepope to aigba ji gba.—Matiu 24:14.
24 Kunnudetọ Jehovah tọn hugan livi ṣidopo wẹ hẹn alọnu ján to aigba hugan 230 lẹ ji to egbehe. Zinjẹgbonu Atọ̀họ̀-Nuhihọ́ Lọ Tọn 1er février 2005 tọn na bẹ linlin whemẹwhemẹ tọn gando nuhe yé wadotana to owhe sinsẹ̀nzọn 2004 tọn mẹ lẹdo aihọn pé go hẹn. Linlin enẹ na do dona susugege Jehovah tọn do azọ́n yẹwhehodidọ tọn ji hia. To gblagbla ojlẹ he pò na titonu ylankan ehe tọn mẹ, mì gbọ mí ni zindonukọn nado hẹn ohó zodolanmẹnamẹ Paulu tọn lẹ do ayiha mẹ dọmọ: “Nọ dọyẹwheho ohó lọ tọn: do magbọjẹ na dewe.” (2 Timoti 4:2) Mì gbọ mí ni zindonukọn nado to kunnude mlẹnmlẹn kakajẹ whenue Jehovah na dọ dọ azọ́n lọ ko yin tadona.
Bẹsọn owhe ehe mẹ, Linlin Owhe Sinsẹ̀nzọn tọn Heyin Kunnudetọ Jehovah tọn lẹ tọn Lẹdo Aihọn Pé ma na nọ sọawuhia to zinjẹgbonu Atọ̀họ̀-Nuhihọ́ Lọ Tọn 1er janvier tọn mẹ ba. Kakatimọ, e na nọ sọawuhia to zinjẹgbonu 1er février tọn mẹ.
Be Hiẹ Sọgan Na Gblọndo Ya?
• Nawẹ mí sọgan mọaleyi sọn azọ́nplọnmẹ he Jesu na devi etọn lẹ mẹ gbọn?
• Etẹwẹ yin pọndohlan Jesu tọn gando mẹhe e dọyẹwheho na lẹ go?
• Etẹwẹ nọ whàn mí nado dekunnu mlẹnmlẹn?
• Aliho tẹlẹ mẹ wẹ mí sọgan ze ayidonugo mítọn lẹpo do ojlo Jiwheyẹwhe tọn wiwà ji, dile Jesu wà do?
[Yẹdide to weda 15]
Mí na tindo kọdetọn dagbe to lizọnyizọn mítọn mẹ eyin mí nọ hò gbẹtọ lẹ tọn pọ́n dile Jesu wà do
[Yẹdide to weda 16, 17]
Lẹndai tangan he wutu Jesu wá aigba ji wẹ nado dekunnu hlan nugbo lọ
[Yẹdide to weda 17]
Kunnudetọ Jehovah tọn lẹ ze ayidonugo yetọn lẹpo do kunnudide mlẹnmlẹn ji