Ma Dibu Blo—Jehovah Tin to Adà Towe Mẹ!

HUGAN owhe 50 die wayi, Harold C. Urey he mọ nunina pipà lẹnunnuyọnẹn nuflínflín lẹ tọn yí, dọho gando sọgodo go to ojlẹ vude to wuwujẹgbonu bọmbu tintan lọ tọn godo dọmọ: “Mí na dùnú to obu mẹ, mlọnai to obu mẹ, nọgbẹ̀ to obu mẹ bosọ kú to obu mẹ.” Na nugbo tọn, to egbehe, aihọn mítọn ko siọ do obu mẹ, podọ ehe ma yin nupaṣamẹ de gba! To egbesọegbesọ, linlinwe lẹ nọ lá nujijọ ylankan nukunbianamẹtọ lẹ tọn, sẹ́nhẹngba kanyinylan tọn lẹ, po azọ̀n he dabla lẹ po.

Taidi Klistiani lẹ, míwlẹ yọ́n nuhe ninọmẹ enẹlẹ zẹẹmẹdo. Yé dohia dọ mí to gbẹnọ to ‘azán godo tọn’ titonu ylankan ehe tọn lẹ mẹ, he Biblu dọ dọdai dọ yè na yọnẹn gbọn “ojlẹ awusinyẹn tọn lẹ” dali. (2 Timoti 3:1) Enẹwutu, jidide mítọn yín hinhẹn lodo dọ Jehovah Jiwheyẹwhe to madẹnmẹ na hẹn aihọn yọyọ de wá he mẹ dodowiwa na nọ̀. (2 Pita 3:13) Ṣigba, to alọnu din be Klistiani lẹ ko gán sọn obu si wẹ ya?

Nukun He Devizọnwatọ Jiwheyẹwhe Tọn lẹ Nọ Yí Do Pọ́n Obu

Jakobu, Davidi, po Elija po tin to devizọnwatọ Jehovah tọn he dibu jẹ bademẹ to whenuena ogbẹ̀ yetọn to owù mẹ lẹ mẹ. (Gẹnẹsisi 32:6, 7; 1 Samuẹli 21:11, 12; 1 Ahọlu lẹ 19:2, 3) E ma yindọ sunnu ehelẹ matindo yise wẹ gba. Kakatimọ, yé dohia dọ yé ganjẹ Jehovah go mlẹnmlẹn. Etomọṣo na gbẹtọvi lẹ wẹ yé yin wutu, obu yinuwado yé ji. “Gbẹtọ owalọ [kavi numọtolanmẹ] di mítọn hunkọnọ wẹ [Elija],” wẹ devi Jakobu wlan.—Jakobu 5:17.

Mílọsu lẹ sọgan jẹ budi ji dile mí to nulẹnpọn do ninọmẹ awusinyẹnnamẹ tọn he mí to pipehẹ to alọnu din kavi devo he mí sọgan wá pehẹ to sọgodo lẹ ji. Obu mọnkọtọn ma ylan gba. Humọ, Biblu dọ dọ Satani Lẹgba ko magbe nado “funawhàn” hẹ mẹhe “to osẹ́n Jiwheyẹwhe tọn yìn, bosọ hẹn okunnu Klisti tọn go gligli lẹ.” (Osọhia 12:17) Dile etlẹ yindọ ohó enẹlẹ na taun tọn yin didọ na Klistiani yiamisisadode lẹ, Paulu wlan dọmọ: ‘Yé he jlo na nọ jijọ-di-Jiwheyẹwhe tọn mẹ to Klisti Jesu mẹ lẹ, na nọ doakọnna homẹkẹn.’ (2 Timoti 3:12) Etomọṣo, obu ma dona hẹn mí gbọjọ eyin mí pehẹ nuhahun lẹ gba. Etẹwutu?

“Jiwheyẹwhe Whlẹngán Tọn De”

Psalm-kàntọ Davidi wlan dọmọ: “Jiwheyẹwhe whlẹngán tọn de wẹ Jiwheyẹwhe hlan míwlẹ.” (Psalm 68:20) Whlasusu wẹ Jehovah ko do nugopipe etọn nado whlẹn omẹ etọn lẹ hia, vlavo gbọn dide yé sọn ninọmẹ owù tọn lẹ mẹ kavi gbọn nina yé huhlọn nado doakọnna dali. (Psalm 34:17; Daniẹli 6:22; 1 Kọlintinu lẹ 10:13) To nuhe hiẹ ko plọn sọn Biblu mẹ lẹ mẹ, “whlẹngán” mọnkọtọn nẹmu wẹ hiẹ sọgan flin?

Gbọn Index des Publications Watch Towera yiyizan dali, naegbọn hiẹ ma na basi dodinnanu do nujijọ nugbo gbẹ̀mẹ tọn lẹ ji taidi Singigọ globu azán Noa gbè tọn lọ, whlẹngán Lọti po viyọnnu etọn lẹ po tọn sọn Sọdọmi po Gọmọla po, gbejizọnlin Islaelivi lẹ tọn sọn Egipti po zọnlinzinzin gbọn Ohù Vẹẹ mẹ po tọn, kavi aliglọnna sébibla Hamani tọn nado sukúndona Ju lẹ? Kandai mẹwhinwhàn tọn ehelẹ hihia po ayihamẹlinlẹnpọn do yé ji po na hẹn yise towe lodo dọ Jehovah yín Jiwheyẹwhe whlẹngán tọn de. Mọwiwà na gọalọna we nado pehẹ whlepọn yise towe tọn madibu.

Apajlẹ Egbezangbe Tọn Lẹ

Be hiẹ sọgan lẹnnupọndo mẹdelẹ ji he ko doakọnnanu to lẹdo towe mẹ ya? E sọgan yin mẹde he ko yin zizedo ganpamẹ na nugbonọ-yinyin etọn wutu. Hiẹ sọgan ko yọ́n Klistiani yọnhonọ de he to Jehovah sẹ̀n mahopọnna madogán agbasa tọn. Kavi lẹnnupọndo jọja susu he gbọṣi kada na aihọn lọ mahopọnna kọgbidinamẹ sọn hagbẹ wehọmẹ tọn yetọn lẹ dè. Mọdopolọ, mẹjitọ godoponọ lẹ he to nukunpedo ovi lẹ go matin alọgọtọ de, kavi tlẹnnọ lẹ he to Jehovah sẹ̀n mahopọnna numọtolanmẹ ṣokẹdẹ-ninọ tọn lẹ. Etẹwẹ hiẹ plọn sọn omẹ mọnkọtọn lẹ dè? Nulinlẹnpọn do nugbonọ-yinyin yetọn ji sọgan gọalọna we nado doakọnnanu bo ma na dibu mahopọnna whlepọn depope he na jẹnukọn na we.

E biọ adọgbigbo e ma yin to whenue mí pehẹ nukundiọsọmẹ po homẹkẹn po kẹdẹ wẹ gba ṣigba to whenue mí jẹ ayihaawe tindo ji gando owanyi Jehovah tọn na mí go ga. Mí dona wleawuna jidide dọ ofligọ Klisti tọn gando dopodopo mítọn lẹ go. (Galatianu lẹ 2:20) Gbọnmọ dali, mí sọgan dọnsẹpọ Jehovah ma hanú kavi madibu. Eyin mí lẹndọ mí ma jẹ na owanyi Jehovah tọn, mí sọgan lẹnnupọndo ohó Jesu tọn na hodotọ etọn lẹ ji he dọmọ: ‘Be oblẹnọ awe ma wẹ yé nọ sà yin abọgan-kuẹ pẹvi de? Mọ dopo yetọn ma na flẹ́ jẹ aigba to Otọ́ mìtọn godo. Ṣigba yèdọ odà ota mìtọn tọn lẹpo wẹ yè hia pé. Enẹwutu mì dibu blo, mìwlẹ doale hú oblẹnọ susu.’—Matiu 10:29-31.

Zinjẹgbonu linlinnamẹwe Atọ̀họ̀ Nuhihọ́ Lọ Tọn po Réveillez-vous! po nọ saba bẹ numimọ Kunnudetọ Jehovah tọn egbezangbe tọn he ko yí adọgbigbo do pehẹ whlepọn lẹ tọn hẹn. Enẹ ma dohia dọ oyà awufiẹsa tọn he ji yé te ma nọ vẹ́ na yé gba. Ṣigba yé ma joawuna numọtolanmẹ mọnkọtọn lẹ nado doalọtena yé sọn Jehovah sinsẹ̀n mẹ. Nuhe jọ do yé go lẹ zinzinjẹgbonu sọgan gọalọna we nado yí adọgbigbo do doakọnnanu ga. Gbadopọnna apajlẹ awe delẹ.

Asidan de Diọ Gbẹzan Etọn

Réveillez-vous! 22 avril 2003 tọn bẹ hosọ de hẹn he dọmọ: “Lehe Asidan de Diọ Gbẹzan Ṣie Do.” To e mẹ, Stanley Ombeva, he yin dopo to Kunnudetọ Jehovah tọn lẹ mẹ to Kenya, basi todohukanji avùnnukundiọsọmẹnu he e pehẹ lẹ to whenue ohún he to wezun ji de gbá ẹ tọn. Dile agbasalilo etọn jẹ godo yì ji, e hẹn agbasazọ́n po akuẹ he ahọlu dona nọ sú i to gbọjẹ yíyí godo lẹpo bu. “Dile yẹn to nukunnumọjẹ lehe ninọmẹ ṣie sinyẹn sọ mẹ vudevude, yẹn lẹzun agọjẹdonutọ, ṣejannabinọ, bo nọ yawu gblehomẹ. To whedelẹnu, n’nọ gblehomẹ bo sọ nọ fiẹ,” wẹ Mẹmẹsunnu Ombeva dọ. Mahopọnna dọ e to ninọmẹ awusinyẹn tọn mẹ, sunnu Klistiani ehe gbọṣi adọgbigbo mẹ. E ma dike flumẹjijẹ ni gbàhundona ẹn bo hẹn ẹn nado gbọjọ mlẹnmlẹn gba. Kakatimọ, e ganjẹ Jehovah go. “Ewọ nọ gọalọna mi to awusinyẹnnamẹnu ṣie lẹpo whenu—sọmọ bọ, winyan nọ hù mi to whedelẹnu,” wẹ Mẹmẹsunnu Ombeva dọ. “Yẹn magbe sinsinyẹn nado nọ hia bosọ lẹnayihamẹpọn do wefọ he sọgan miọnhomẹna mi lẹ ji.”

Zẹẹmẹ ahundoponọ Mẹmẹsunnu Ombeva tọn ko hẹn mẹdevo lẹ penugo nado doakọnna whlepọn lẹ po adọgbigbo po. “Yẹn viavi to whenue yẹn hia hosọ ehe,” wẹ mẹmẹyọnnu de wlan. “Numọtolanmẹ ṣie wẹ yindọ gbọn hosọ ehe dali Jehovah to owanyi po mẹtọnhopọn etọn po dohia bosọ to homẹmiọnna mi.” Kunnudetọ devo wlan dọmọ: “Hosọ he taidi ehelẹ nọ dotuhomẹna mí mẹhe tindo numimọ ehe nkọtọn bọ awufiẹsa mítọn ma nọ saba yin yinyọnẹn lẹ.”

Pipehẹ Numọtolanmẹ Ayimajai Tọn

Numimọ he whànmẹ devo wẹ sọ yin Herbert Jennings tọn he yin didọ to hosọ de mẹ he dọmọ: “Hiẹ Ma Yọ́n Nuhe gbẹzan Towe Na Yin to Sọgodo Gba.”b Mẹmẹsunnu Jennings pehẹ apọ̀nmẹ-zọ̀n psychose maniaco-dépressive tọn. To nulinlẹnpọn do bẹjẹeji azọ̀n etọn tọn ji, e dọmọ: “Ahidídí taun wẹ e yin nado yì opli Klistiani tọn lẹ poun. Etomọṣo, yẹn tindo nujikudo mlẹnmlẹn gando nuhọakuẹ gbẹdido gbigbọmẹ tọn go. Nado pehẹ ẹ, yẹn nọ saba biọ Plitẹnhọ Ahọluduta tọn mẹ to whenuena gbẹtọgun lọ ko sinai godo, bosọ nọ tọ́n whẹpo yé do nọ jẹ tintọ́n ji to vivọnu tito-to-whinnu lọ tọn.”

Yẹwhehodidọ lọsu kàn dẹpẹ biọ. “To whedelẹnu, etlẹ yin to ohọ̀ lọ kọ̀n jijẹ pó godo, yẹn ma nọ tindo adọgbigbo sọmọ nado húhú ohọ̀n . . . gba,” wẹ Mẹmẹsunnu Jennings dọ. “Etomọṣo, yẹn ma na lẹkọ gba, na yẹn yọnẹn dọ lizọnyizọn mítọn zẹẹmẹdo whlẹngán na mídelẹ po mẹhe kẹalọyi i lẹ po. (1 Timoti 4:16) Ojlẹ vude godo, yẹn nọ penugo nado duto numọtolanmẹ ṣie ji, bo nọ yì ohọ̀n devo ji, bosọ nọ tẹ́n ẹn pọ́n whladopo dogọ. Gbọn mahẹ tintindo zọnmii to lizọnyizọn lọ mẹ dali, yẹn gbọṣi agbasalilo gbigbọmẹ tọn dagbe mẹ, podọ enẹ hẹn nugopipe ṣie jideji nado to akọ́ndona.”

Kandai ahundoponọ Mẹmẹsunnu Jennings tọn gọalọna wehiatọ susu nado pehẹ ayimajai po adọgbigbo dopolọ po. Di apajlẹ, mẹmẹyọnnu Klistiani dopo wlan dọmọ: “To owhe 28 he yẹn ko to linlinnamẹwe Atọ̀họ̀-Nuhihọ́ Lọ Tọn po Réveillez-vous! po hia lẹ mẹ, yẹn ma ko yin whinwhàn sọmọ pọ́n dile yẹn yin whinwhàn do to whenuena n’hia hosọ ehe. Yẹn ko doalọtena sinsẹ̀nzọn whenu-gigọ́ tọn bo tindo numọtolanmẹ whẹhuhu tọn, bo nọ to linlẹn dọ e yin yẹn ko tindo yise ganji wẹ, be n’na ko zindonukọn. Hihia lehe Mẹmẹsunnu Jennings dona jo azọngban de do nado penukundo azọ̀n etọn go gọalọna mi nado pọ́n ninọmẹ ṣie hlan to aliho dopolọ mẹ. Na nugbo tọn, gblọndo de wẹ e yin na odẹ̀ ṣie lẹ.”

Mọdopolọ, mẹmẹsunnu de wlan dọmọ: “To devizọnwiwa taidi mẹho agun tọn na owhe ao godo, yẹn dona jo lẹblanulọkẹyi ṣie do na apọ̀nmẹ-zọ̀n de wutu. Numọtolanmẹ awugbopo tọn ṣie sinyẹn sọmọ bọ nado hia hosọ otàn gbẹzan tọn lẹ, he nọ saba bẹ wadotana dagbe he omẹ Jehovah tọn lẹ tindo hẹn nọ yin apọṣimẹnu na mi. Ṣigba linsinsinyẹn Mẹmẹsunnu Jennings tọn jlọ mi dote. Yẹn ko hia hosọ lọ whlasusu.”

Nukọnzinzindo po Adọgbigbo Po

Taidi Mẹmẹsunnu Ombeva po Jennings po, susu to Kunnudetọ Jehovah tọn lẹ mẹ ko zindonukọn po adọgbigbo po to Jehovah Jiwheyẹwhe sinsẹ̀n mẹ mahopọnna aliglọnnamẹnu sinsinyẹn lẹ. Eyin hiẹ tin to yé mẹ, be a jẹ na pipà. Tindo nujikudo dọ: “Jiwheyẹwhe ma yin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia gbọn oyín etọn dali, na le mì to devizọnwa hlan mẹwiwe lẹ do, bosọ to bibasi i.”—Heblu lẹ 6:10.

Kẹdẹdile Jehovah gọalọna omẹ nugbonọ hohowhenu tọn etọn lẹ nado gbawhàn kẹntọ yetọn lẹ tọn do, ewọ sọgan gọalọna we nado duto aliglọnnamẹnu depope he hiẹ sọgan pehẹ ji. Enẹwutu, hẹn ohó he Jehovah dọ gbọn yẹwhegán Isaia gblamẹ lẹ do ayiha mẹ he dọmọ: “A dibu blo; na yẹn tin po hiẹ po: Adòyanú we blo, na yẹn wẹ Jiwheyẹwhe towe: Yẹn na na huhlọn we; yẹn na gọalọna we; nugbo, yẹn na yí adusilọ ṣie dodo tọn do ze we daga.”—Isaia 41:10.

[Nudọnamẹ Odò Tọn]

[Yẹdide to weda 16]

Taidi Stanley Ombeva (to aga) po Herbert Jennings po (to adusi mẹ), mẹsusu to Jehovah sẹ̀n po adọgbigbo po

[Asisa Yẹdide tọn to weda 14]

Fọto USAF tọn