Dibusi Jehovah Bosọ Yìn Gbedide Etọn Lẹ
“Dibusi Jiwheyẹwhe bosọ yìn osẹ́n etọn lẹ: na ehe wẹ azọ́n gbẹtọ lẹpo tọn pete.”—YẸWHEHODỌTỌ 12:13.
1, 2. (a) Nawẹ obu sọgan whlá mí to agbasa-liho gbọn? (b) Naegbọn mẹjitọ nuyọnẹntọ lẹ nọ dovivẹnu nado zín obu he sọgbe do ohò ovi yetọn lẹ tọn mẹ?
“KẸDẸDILE adọgbigbo nọ ze ogbẹ̀ do owù mẹ do, mọwẹ obu nọ basi hihọ́na ẹn do,” wẹ Leonardo da Vinci dọ. Adọgbigbo zẹjlẹgo nọ hẹnmẹ ma nado doayi owù go, to whenuena obu nọ flinnumẹ nado nọ aṣeji. Di apajlẹ, eyin mí sẹpọ bẹbẹnu fiyiaga de tọn bo pọ́n doyiyi etọn hlan, suhugan mítọn wẹ nọ joagọyigodo to jọwamọ-liho. Mọdopolọ, e mayin dọ obu he sọgbe tintindo nọ yidogọna haṣinṣan dagbe tintindo hẹ Jiwheyẹwhe kẹdẹ wẹ gba, ṣigba sọ nọ họ́ mí sọn awugble mẹ, dile mí plọn to hosọ he jẹnukọn mẹ do.
2 Ṣigba, budisi owù egbezangbe tọn lẹ dona yin pinplọn. To whenuena e yindọ ovivu lẹ ma yọ́n nudepope gando owù miyọ́n lẹtliki tọn kavi tòhomẹ-liho he ji mọto nọ gbọ̀n tọn lẹ go, owùnú sinsinyẹn sọgan jọ do yé go.a Mẹjitọ nuyọnẹntọ lẹ nọ tẹnpọn nado zín obu he sọgbe do ohò ovi yetọn lẹ tọn mẹ, bo nọ na avase yé pludopludo gando owù he lẹdo yé pé lẹ go. Mẹjitọ lẹ yọnẹn dọ obu ehe sọgan whlẹn ogbẹ̀ ovi yetọn lẹ tọn taun.
3. Etẹwutu podọ nawẹ Jehovah nọ na mí avase gando owù gbigbọmẹ tọn lẹ go gbọn?
3 Jehovah tindo awuvẹmẹ dopolọ na dagbemẹ-ninọ mítọn. Taidi Otọ́ owanyinọ de, e nọ plọn mí gbọn Ohó etọn po titobasinanu etọn po gblamẹ nado hẹn ale wá na mí. (Isaia 48:17) Apadewhe tito-to-whinnu mẹpinplọn tọn ehe bẹ avase nina mí ‘gbọzangbọzan’ gando omọ̀ gbigbọmẹ tọn lẹ go hẹn na mí nido sọgan wleawuna obu he sọgbe de na owù mọnkọtọn lẹ. (2 Otannugbo lẹ 36:15; 2 Pita 3:1) To whenuho gblamẹ nugbajẹmẹji gbigbọmẹ tọn susu sọgan ko yin didapana podọ yajiji susu na yin aliglọnna ‘eyin gbẹtọ lẹ ko wleawuna ahun yetọn lẹ nado nọ dibusi Jiwheyẹwhe bosọ yìn gbedide etọn lẹ poun.’ (Deutelonomi 5:29) To ‘ojlẹ awusinyẹn tọn he vẹawu nado pehẹ’ ehelẹ mẹ, nawẹ mí sọgan wleawuna ahun mítọn nado dibusi Jiwheyẹwhe bosọ dapana owù gbigbọmẹ tọn gbọn?—2 Timoti 3:1.
Lẹkọ sọn Oylan Mẹ
4. (a) Wangbẹnanu tẹwẹ Klistiani lẹ dona wleawuna? (b) Etẹwẹ yin numọtolanmẹ Jehovah tọn gando ylanwiwa go? (Pọ́n nudọnamẹ odò tọn.)
4 Biblu basi zẹẹmẹ dọ ‘budisi Jehovah zẹẹmẹdo wangbẹna oylan.’ (Howhinwhẹn lẹ 8:13) Wezẹhomẹ Biblu tọn de basi zẹẹmẹ wangbẹnanu ehe tọn taidi “aliho nuyiwa tọn de hlan mẹde kavi nude he yè jẹagọdo, gbẹwanna, he hiọawu bọ yè ma na jlo nado tindo kọndopọ kavi haṣinṣan hẹ.” Enẹwutu budisi Jiwheyẹwhe bẹ gbigbẹkọ kavi wangbẹna nuhe yin oylan to nukun Jehovah tọn mẹ lẹpo hẹn.b (Psalm 97:10) E nọ whàn mí nado lẹkọ sọn oylan mẹ, kẹdẹdile mí na lẹkọ sọn bẹbẹnu fiyiaga de tọn do to whenuena obu jọwamọ tọn mítọn na avase mí. “Gbọn [budisi] OKLUNỌ tọn dali wẹ gbẹtọ fọnyi sọn oylan mẹ,” wẹ Biblu dọ.—Howhinwhẹn lẹ 16:6.
5. (a) Nawẹ mí sọgan hẹn budisi Jiwheyẹwhe po wangbẹna nuhe yin oylan po mítọn lodo gbọn? (b) Etẹwẹ whenuho akọta Islaeli tọn plọn mí gando ehe go?
5 Mí sọgan hẹn obu he sọgbe po wangbẹna nuhe yin oylan po lodo gbọn nulinlẹnpọn do kọdetọn awugble tọn he ylando nọ hẹnwa to godo mẹ ji dali. Biblu hẹn mí tindo nujikudo dọ mí na gbẹ̀n nuhe mí dó—vlavo mí dó hlan agbasa kavi hlan gbigbọ. (Galatianu lẹ 6:7, 8) Na whẹwhinwhẹ́n ehe wutu Jehovah basi zẹẹmẹ kọdetọn he kọgbigbẹ́ gbedide etọn lẹ go po sinsẹ̀n-bibasi nugbo gbigbẹdai po nọ hẹnwa to godo mẹ tọn hezeheze. Matin hihọ́ Jiwheyẹwhe tọn, akọta pẹvi he ma lodo Islaeli tọn na ko jai jẹ alọ otò huhlọnnọ po kanylantọ he lẹdo yé pé lẹ tọn po mẹ. (Deutelonomi 28:15, 45-48) Kọdetọn awubla tọn na tolivivẹ Islaeli tọn yin kinkàndai to gigọ́ mẹ to Biblu mẹ ‘na avase de’ na míwlẹ nido sọgan plọnnu sọn e mẹ bo wleawuna obu Jiwheyẹwhe tọn.—1 Kọlintinu lẹ 10:11.
6. Apajlẹ Owe-wiwe tọn tẹlẹ wẹ mí sọgan gbadopọnna to obu Jiwheyẹwhe tọn pinplọn mẹ? (Pọ́n nudọnamẹ odò tọn.)
6 Gbọnvona nuhe jọ do akọta blebu Islaeli tọn go, Biblu bẹ numimọ nugbo gbẹzan mẹdopodopo heyin dududeji gbọn awuwhàn, fẹnnuwiwa, nukunkẹn, kavi goyiyi dali lẹ tọn hẹn.c Delẹ to omẹ ehelẹ mẹ ko sẹ̀n Jehovah na owhe susu, ṣigba to ojlẹ whlepọn tọn de mẹ to gbẹzan yetọn mẹ, obu Jiwheyẹwhe tọn yetọn ma lodo sọmọ, bọ yé sọ tindo kọdetọn awubla tọn. Nulinlẹnpọn do apajlẹ Owe-wiwe tọn mọnkọtọn lẹ ji sọgan hẹn gbemima mítọn lodo ma nado jai jẹ nuṣiwa dopolọ mẹ. Lehe e na blawu do sọ eyin mí nọte kakajẹ whenuena mí tindo numimọ awubla tọn mẹdetiti tọn whẹpo do kẹalọyi ayinamẹ Jiwheyẹwhe tọn! To vogbingbọn mẹ na nuhe yin alọkẹyi gbayipe, numimọ—titengbe dehe nọ wá sọn wazẹjlẹgo mẹdetiti tọn mẹ—mayin mẹplọntọ dagbe hugan lọ gba.—Psalm 19:7.
7. Mẹnu lẹ wẹ Jehovah nọ basi oylọna biọ gòhọ yẹhiadonu tọn etọn mẹ?
7 Whẹwhinwhẹ́n huhlọnnọ devo he wutu mí dona wleawuna obu Jiwheyẹwhe tọn wẹ ojlo nado basi hihọ́na haṣinṣan mítọn hẹ Jiwheyẹwhe. Mí nọ dibu nado hẹn homẹgblena Jehovah na họntọnjiji hẹ ẹ yin nuhọakuẹ na mí wutu. Mẹnu lẹ wẹ Jiwheyẹwhe nọ pọnhlan nado yin họntọn etọn, mẹhe e na basi oylọna biọ gòhọ yẹhiadonu tọn etọn mẹ lẹ? Mẹhe “zinzọnlin jlọjlọ, bo to azọ́n dodo tọn wà” lẹ kẹdẹ wẹ. (Psalm 15:1, 2) Eyin mí yọ́n nuhọakuẹ haṣinṣan lẹblanulọkẹyi tọn he mí tindo hẹ Mẹdatọ mítọn tọn, mí na payi nado zinzọnlin jlọjlọ to nukun etọn lẹ mẹ.
8. Nawẹ Islaelivi delẹ to azán Malaki tọn gbè yí họntọnjiji hẹ Jiwheyẹwhe do gbẹ̀n-asajikàn gbọn?
8 E blawu dọ, Islaelivi delẹ to azán Malaki tọn gbè yí họntọnjiji hẹ Jiwheyẹwhe do gbẹ̀n-asájikàn. Kakati nado dibusi bo gbògbéna Jehovah, yé yí kanlin awutunọ po sẹkunọ lẹ po do sanvọ́ to agbà etọn ji. Obu Jiwheyẹwhe tọn matindo yetọn sọ sọawuhia to walọyizan yetọn mẹ hlan alọwle. Nado sọgan wlealọhẹ yọnnu awhli lẹ, yé nọ gbẹ́ asi ovuwhenu tọn yetọn lẹ dai na whẹwhinwhẹ́n he mayin nujọnu lẹ wutu. Malaki dọ na yé dọ Jehovah gbẹwanna “gbẹdai” podọ gbigbọ nugbonọ-mayin yetọn ko hẹn yé jẹ olá na Jiwheyẹwhe yetọn. Nawẹ Jiwheyẹwhe sọgan yí nukundagbe do pọ́n avọ́sinsan yetọn lẹ do to whenuena e yindọ agbà lọ ko gọ́ po dasin po to yẹhiadonu-liho—yèdọ dasin vivẹ́ heyin kùnkùn gbọn asi he yé gbẹdai lẹ dali? Sisi matindo ylankan mọnkọtọn na nujinọtedo etọn lẹ whàn Jehovah nado kanse dọmọ: ‘Fie wẹ budisi ṣie te?’—Malaki 1:6-8; 2:13-16.
9, 10. Nawẹ mí sọgan dohia dọ mí yọ́n pinpẹn họntọnjiji Jehovah tọn gbọn?
9 To egbehe, to aliho dopolọ mẹ Jehovah nọ mọ awubla alọwlemẹ homẹvọnọ po ovi susu lẹ po tọn he ko yin hinhẹn biọ bẹwlu mẹ gbọn asu po otọ́ po kavi asi po onọ̀ ṣejannabinọ lẹ po dali. Na jide tọn e nọ hẹn ẹn blawu tlala. Họntọn Jiwheyẹwhe tọn dona nọ pọ́n whẹho lẹ hlan to aliho he mẹ Jiwheyẹwhe nọ pọ́n yé hlan te bo na wazọ́n sinsinyẹn nado hẹn alọwle etọn lodo, bo gbẹ́ linlẹn aihọn tọn dai he nọ yí nukunpẹvi do pọ́n nujọnu-yinyin kanṣiṣa alọwle tọn, bo “họ̀n na galilọ.”—1 Kọlintinu lẹ 6:18.
10 To alọwle mẹ podọ to adà gbẹzan tọn mítọn devo mẹ, wangbẹna nuhe yin oylan to nukun Jehovah tọn mẹ lẹpo, gọna pinpẹn-nutọn-yinyọnẹn he siso na họntọn-yinyin mítọn hẹ ẹ, na hẹn nukundagbe po alọkẹyi etọn po wá. Apọsteli Pita dọ hezeheze dọmọ: “Nugbo, yẹn pọ́n dọ Jiwheyẹwhe ma yin mẹnukuntahopọntọ gba: ṣigba to akọta lẹpo mẹ, mẹhe dibusi i, bo wazọ́n dodo, wẹ yè kẹalọyi to e dè.” (Owalọ lẹ 10:34, 35) Mí tindo apajlẹ Owe-wiwe tọn susu he do lehe obu Jiwheyẹwhe tọn whàn mẹdelẹ nado wà nuhe sọgbe to ninọmẹ whlepọn tọn voovo lẹ mẹ do.
Omẹ Atọ̀n He Dibusi Jiwheyẹwhe Lẹ
11. Ninọmẹ tẹlẹ glọ wẹ Ablaham yin lilá nado yin ‘budisi Jiwheyẹwhe tọ’ te?
11 Dawe dopo tin to Biblu mẹ mẹhe Jehovah lọsu ylọ dọ họntọn emitọn—dawe lọ wẹ tọgbo Ablaham. (Isaia 41:8) Budisi Jiwheyẹwhe he Ablaham tindo yin whiwhlepọn to whenuena Jiwheyẹwhe biọ to e si nado yí visunnu dopo akàn etọn Isaki do sanvọ́, mẹhe gblamẹ Jiwheyẹwhe na hẹn opagbe etọn he dọ ovivi Ablaham tọn lẹ na lẹzun akọta daho de di te. (Gẹnẹsisi 12:2, 3; 17:19) Be ‘họntọn Jehovah tọn’ na duto mẹtẹnpọn awufiẹsa tọn ehe ji ya? (Jakobu 2:23) To ojlẹ he mẹ Ablaham ze ohí etọn yiaga nado hù Isaki, angẹli Jehovah tọn dọmọ: “A ze alọ towe do ovi lọ ji blo, mọ a sọ wà nude do e blo: na dinvie wẹ yẹn yọnẹn dọ hiẹ dibusi Jiwheyẹwhe, na hiẹ ma whlẹn visunnu towe, visunnu towe dopo akàn lọ do mi wutu.”—Gẹnẹsisi 22:10-12.
12. Etẹwẹ whàn Ablaham nado dibusi Jiwheyẹwhe, podọ nawẹ mí sọgan do gbigbọ mọnkọtọn hia gbọn?
12 Dile etlẹ yindọ Ablaham ko dohia to ojlẹ he wayi lẹ mẹ nado yin budisi Jehovah tọ, to nujijọ enẹ mẹ e do budisi Jiwheyẹwhe etọn hia to aliho ayidego tọn de mẹ. Ojlo etọn nado yí Isaki do sanvọ́ yin onú titengbe hugan sisi tonusise tọn de didohia poun. Ablaham yin whinwhàn gbọn jidide mlẹnmlẹn etọn dali dọ Otọ́ olọn mẹ tọn emitọn na hẹn opagbe Etọn di gbọn Isaki finfọnsọnku dali eyin e biọ do mọ. Dile Paulu wlan do, Ablaham ‘tindo nujikudo dọ onú he Jiwheyẹwhe dopagbe etọn, e tin sọgan nado yibasi ga.’ (Lomunu lẹ 4:16-21) Be mí wleawu nado wà ojlo Jiwheyẹwhe tọn etlẹ yindọ e biọ avọ́sinsan nujọnu tọn lẹ ya? Be mí tindo jidide mlẹnmlẹn dọ tonusise mọnkọtọn na hẹn alemọyi dẹn-to-aimẹ lẹ wá, to yinyọnẹn mẹ dọ Jehovah wẹ “ahọsutọ yé he whesọ do dín in lẹ tọn” ya? (Heblu lẹ 11:6) Enẹ yin obu he sọgbe tintindo na Jiwheyẹwhe.—Psalm 115:11.
13. Naegbọn Josẹfu sọgan basi zẹẹmẹ ede tọn to gbesisọmẹ taidi dawe de he ‘dibusi Jiwheyẹwhe nugbo lọ’?
13 Mì gbọ mí ni gbadopọnna apajlẹ budisi Jiwheyẹwhe tọn devo—yèdọ dehe yin Josẹfu tọn. Taidi afanumẹ de to whédo Pọtifali tọn mẹ, Josẹfu pannukọn avùnnukundiọsọmẹ lọ egbesọegbesọ nado deayọ. E họnwun dọ e ma sọgan dapana kosọdudu hẹ asi ogán etọn tọn to aliho depope mẹ gba, mẹhe nọ biọ dọ e ni zanhẹ emi gbọzangbọzan. To godo mẹ, to whenuena ‘e tẹdo e go’, Josẹfu ‘họ̀n jẹgbonu.’ Etẹwẹ whàn ẹn nado họ̀n sọn oylan mẹ to afọdopolọji? Matin ayihaawe, whẹwhinwhẹ́n tangan lọ wẹ obu Jiwheyẹwhe tọn, yèdọ ojlo nado dapana ‘oylan daho wiwà bosọ waylan do Jiwheyẹwhe.’ (Gẹnẹsisi 39:7-12) Josẹfu sọgan basi zẹẹmẹ ede tọn to gbesisọmẹ taidi dawe de he ‘dibusi Jiwheyẹwhe nugbo lọ.’—Gẹnẹsisi 42:18.
14. Nawẹ lẹblanu Josẹfu tọn do obu nugbo tintindo na Jiwheyẹwhe hia gbọn?
14 Owhe delẹ to godo mẹ Josẹfu pannukọn nọvisunnu etọn he gbọn kanyinylan dali sà ẹ do kanlinmọgbenu lẹ nukun-sọ-nukun. E sọgan ko yí nuhudo sinsinyẹn núdùdù tọn he yé tindo zan po awubibọ po taidi dotẹnmẹ hundote de nado yiahọsu oylan he yé ko wà do e tọn. Ṣigba nuyiwa hẹ gbẹtọ lẹ to aliho kanyinylan tọn mẹ ma do obu Jiwheyẹwhe tọn hia gba. (Levitiku 25:43) Gbọnmọ dali, to whenuena Josẹfu mọ kunnudenu susu he dohia dọ nọvisunnu etọn lẹ ko diọ, e gbọn lẹblanu dali jona yé. Taidi Josẹfu, obu Jiwheyẹwhe tọn tintindo na whàn mí nado yí dagbe do duto oylan ji, bo nasọ glọnalina mí ma nado jai jẹ whlepọn mẹ.—Gẹnẹsisi 45:1-11; Psalm 130:3, 4; Lomunu lẹ 12:17-21.
15. Naegbọn walọyizan Job tọn hẹn homẹhun Jehovah?
15 Job yin apajlẹ nukundeji mẹhe dibusi Jiwheyẹwhe tọn devo. Jehovah dọ hlan Lẹgba dọmọ: “Hiẹ ko glo Job devi ṣie pọ́n? Dọ mẹde ma tin di i to aigba ji, omẹ pipé de podọ jlọjlọ de, ode he dibusi Jiwheyẹwhe, bosọ họ̀nsi oylan.” (Job 1:8) Na owhe susu, walọyizan madoblọ Job tọn ko hẹn homẹ Otọ́ olọn mẹ tọn etọn hùn. Job dibusi Jiwheyẹwhe na e yọnẹn dọ onú he sọgbe wẹ eyin nado wàmọ bosọ yin aliho gbẹzan tọn dagbe. ‘Pọ́n! Budisi Jehovah tọn—wẹ nuyọnẹn,’ wẹ Job lá dọ, ‘podọ nado lẹkọ sọn oylan mẹ wẹ wuntuntun.’ (Job 28:28) Taidi asisunọ de, Job ma nọ na ayidonugo agọ̀ yọnnu jọja lẹ gba, mọjanwẹ e ma nọ hẹn linlẹn fẹnnuwiwa tọn do ahun ede tọn mẹ do niyẹn. Dile etlẹ yin adọkunnọ, e gbẹ́ nado ze jidide etọn do adọkunnu etọn lẹ ji, podọ e sọ gbẹ́ wunmẹ boṣiọ-sinsẹ̀n tọn lẹpo dai.—Job 31:1, 9-11, 24-28.
16. (a) Aliho tẹlẹ mẹ wẹ Job do dagbewanyi hia te? (b) Nawẹ Job dohia dọ emi ma dọ̀n-yonu-dogodo sọn jonamẹ mẹ gbọn?
16 Ṣigba, obu Jiwheyẹwhe tọn zẹẹmẹdo dagbe wiwà podọ kọlilẹ sọn oylan kọ̀n. Gbọnmọ dali, Job tindo awuvẹmẹ hlan nukuntọ́nnọ, sẹkunọ, po wamọnọ lẹ po. (Levitiku 19:14; Job 29:15, 16) Job mọnukunnujẹemẹ dọ ‘mẹdepope he dọ̀n alọ dagbewiwa tọn dogodo sọn hatọ etọn lẹ dè, nasọ gbẹ́ budisi Ganhunupo dai.’ (Job 6:14) Agọjijo-yi-godo ma nado do homẹdagbe hia sọgan bẹ yonu-dọ̀n-yìgodo nado jonamẹ kavi mẹhẹndohomẹ hẹn. To anademẹ Jiwheyẹwhe tọn mẹ, Job hodẹ̀ do ota họntọn etọn atọ̀n, he ko hẹn awubla susu wá na ẹn lẹ tọn mẹ. (Job 42:7-10) Be mí sọgan do gbigbọ jonamẹ tọn dopolọ hia yisenọ hatọ he ko gbleawuna mí to aliho delẹ mẹ ya? Odẹ̀ ahundopo tọn do ota mẹhe ko hẹn homẹgble mí tọn mẹ sọgan wà nususu nado gọalọna mí nado duto mẹhẹndohomẹ ji. Dona he Job duvivi etọn na obu Jiwheyẹwhe tọn tintindo wutu lẹ gọalọna mí nado mọ ‘dagbenu susugege he Jehovah ko ze do sẹdotẹnmẹ na mẹhe to budisi i lẹ’ hlan nukọn.—Psalm 31:19; Jakobu 5:11.
Obu Jiwheyẹwhe Tọn po Obu Gbẹtọ Tọn Po
17. Etẹwẹ obu gbẹtọ tọn sọgan wà na mí, ṣigba naegbọn obu mọnkọtọn do yin ojlẹ gli tọn?
17 To whenuena e yindọ obu Jiwheyẹwhe tọn sọgan whàn mí nado wà nuhe sọgbe, obu gbẹtọ tọn sọgan hẹn yise mítọn gbọjọ. Na whẹwhinwhẹ́n ehe wutu, to whenuena e to tudohomẹna apọsteli lẹ nado yin wẹndagbe-jlatọ zohunhunnọ lẹ, Jesu dọna yé dọmọ: “Mì dibusi yé he nọ hù agbasa, ṣigba bọ yé ma sọgan hù gbigbọ blo: ṣigba mì kúkú dibusi ewọ he sọgan hù agbasa po gbigbọ po súdo to [Gẹhẹnna] mẹ.” (Matiu 10:28) Obu gbẹtọ tọn yin ojlẹ gli tọn, wẹ Jesu dọ, na gbẹtọ ma sọgan hù nukundido sọgodo tọn mítọn sudo. Humọ, mí nọ dibusi Jiwheyẹwhe na mí yọ́n huhlọn dobu etọn, mẹhe huhlọn akọta lẹpo tọn ma yin nude to nukọn etọn. (Isaia 40:15) Taidi Ablaham mí tindo jidide mlẹnmlẹn to huhlọn Jehovah tọn mẹ nado fọ́n devizọnwatọ nugbonọ etọn lẹ. (Osọhia 2:10) Gbọnmọ dali, mí dọ po adọgbigbo po dọmọ: “Eyin Jiwheyẹwhe tin na mí, mẹnu wẹ tin agọ̀ do mí go?”—Lomunu lẹ 8:31.
18. Aliho tẹmẹ wẹ Jehovah nọ suahọ mẹhe dibusi lẹ te?
18 Vlavo nukundiọsọmẹtọ mítọn yin hagbẹ whẹndo tọn de kavi hagbẹ wehọmẹ tọn de, mí na mọ dọ “[obu] OKLUNỌ tọn mẹ wẹ tudido he [lodo] te.” (Howhinwhẹn lẹ 14:26) Mí sọgan hodẹ̀ hlan Jiwheyẹwhe nado biọ huhlọn, to yinyọnẹn mẹ dọ e na se mítọn. (Psalm 145:19) Jehovah ma nọ wọnji mẹhe dibusi i lẹ go gbede gba. E hẹn mí tindo nujikudo gbọn yẹwhegán etọn Malaki dali dọmọ: “Whenẹnu wẹ yé he dibusi OKLUNỌ lẹ to hodọ ode po awetọ po: OKLUNỌ sọ tuntoai, bo se, podọ yè sọ wlan owe oflin tọn de to ewọ nukọn, na yé he dibusi OKLUNỌ lẹ, podọ he to oyín etọn tọn lẹnpọn lẹ.”—Malaki 3:16.
19. Obu wunmẹ tẹwẹ na wá opodo, ṣigba wunmẹ tẹwẹ na gbọṣi aimẹ kakadoi?
19 Ojlẹ lọ ko sẹpọ whenuena mẹhe to aigba ji lẹpo na sẹ̀n Jehovah bọ obu gbẹtọ tọn na busẹ. (Isaia 11:9) Obu huvẹ, awutu, sẹ́nhẹngba, po awhàn tọn po nasọ juwayi. Ṣigba obu Jiwheyẹwhe tọn na gbọṣi aimẹ kakadoi dile devizọnwatọ nugbonọ etọn lẹ to olọn mẹ podọ to aigba ji na zindonukọn nado to sisi, tonusise, po gbégbigbò he sọgbe po dohia. (Osọhia 15:4) To ojlẹ dopolọ mẹ, mì gbọ mímẹpo ni kẹalọyi ayinamẹ gbọdo Sọlọmọni tọn lọ dọmọ: “A dike ayiha towe hahomẹ do ylandonọ go blo: ṣigba na hiẹ ni tin to [obu] OKLUNỌ tọn mẹ, to azán lẹpo mẹ. Na opodo tin nugbo, todido towe ma na sán sẹ.”—Howhinwhẹn lẹ 23:17, 18.
[Nudọnamẹ Odò Tọn Lẹ]
a Mẹhe ko whẹ́n delẹ nọ hẹn obu he yé tindo na owùnú lẹ bu to whenuena azọ́n yetọn biọ dọ yé ni gbọṣi ninọmẹ owù tọn lẹ mẹ. To whenuena yè kanse nuhewutu suhugan whlẹpatọ lẹ tọn do nọ hẹn alọvi dopo bu, alọnuzọn wàtọ numimọnọ de gblọn poun dọmọ: “Yé hẹn obu yetọn na ayinyọ́n lẹtliki tọn he nọ lilẹ́ po awuyiya po bú.”
b Jehovah lọsu nọ gbẹwannanu to aliho ehe mẹ. Di apajlẹ, Efesunu lẹ 4:29 basi zẹẹmẹ hogbe ylankan tọn taidi “hogbe gbigble.” Hogbe Glẹki tọn heyin yiyizan na “gbigble” to paa mẹ dlẹnalọdo atin-sinsẹ́n, whèvi, kavi olàn yìnyọ̀n. Hogbe mọnkọtọn dohia hezeheze nukun he mí na yí do pọ́n hogbe gbigble kavi ehe kudiho lẹ. Mọdopolọ, boṣiọ lẹ nọ saba yin zẹẹmẹ basina to Owe-wiwe mẹ taidi ‘awuhiọnu.’ (Deutelonomi 29:17; Ezekiẹli 6:9) Olá ninọ na omí kavi afọdai to jọwamọ-liho nọ gọalọna mí nado mọnukunnujẹ lehe boṣiọ-sinsẹ̀n wunmẹ depope yin awuhiọnu na Jiwheyẹwhe do mẹ.
c Di apajlẹ, gbadopọnna kandai Owe-wiwe tọn heyin Kaini (Gẹnẹsisi 4:3-12); Davidi (2 Samuẹli 11:2–12:14); Gehazi (2 Ahọlu lẹ 5:20-27); po Uzia tọn po (2 Otannugbo lẹ 26:16-21).
Be Hiẹ Flin Ya?
• Nawẹ mí nọ plọn nado gbẹwanna oylan gbọn?
• Nawẹ Islaelivi delẹ to azán Malaki tọn gbè yí họntọnjiji hẹ Jehovah do gbẹ̀n-asajikàn gbọn?
• Etẹwẹ mí sọgan plọn sọn Ablaham, Josẹfu, po Job po dè gando obu Jiwheyẹwhe tọn go?
• Obu tẹwẹ na gbọṣi aimẹ kakadoi, podọ etẹwutu?
[Yẹdide to weda 19]
Mẹjitọ nuyọnẹntọ lẹ nọ zín obu he sọgbe do ahun ovi yetọn lẹ tọn mẹ
[Yẹdide to weda 20]
Kẹdẹdile obu nọ lẹkọna mí sọn owùnú kọ̀n do, budisi Jiwheyẹwhe nọ lẹkọna mí sọn oylan kọ̀n
[Yẹdide to weda 23]
Job hẹn obu Jiwheyẹwhe tọn etọn go etlẹ yin to whenuena e pannukọn họntọn oklọ tọn atọ̀n lẹ
[Asisa Yẹdide Tọn]
From the Bible translation Vulgata Latina, 1795