Azọ́nwanu de He Na Gọalọna Jọja lẹ Nado Flin Mẹdatọ Yetọn

“FLIN mẹdatọ towe to azán ovu whenu towe tọn,” wẹ dawe nuyọnẹntọ lọ Sọlomọni wlan to nudi owhe 3000 die wayi. (Yẹwh. 12:1) Jọja Klistiani lẹ ko tindo azọ́nwanu devo todin he na gọalọna yé nado wà enẹ. Owe Kanbiọ He Jọja lẹ Nọ Kanse—Gblọndo He Wazọ́n Lẹ, Bladopọ 2 yin didetọn to Plidopọ Agbegbe “Dike Gbigbọ Jiwheyẹwhe Tọn Ni Deanana We” tọn ji, he Kunnudetọ Jehovah tọn lẹ basi lẹdo aihọn pé sọn mai 2008 jẹ janvier 2009. Nugbo wẹ dọ owe lọ ma ko tin-to-aimẹ to Gungbe mẹ, ṣigba hosọ etọn delẹ ko yin lilẹdo Gungbe mẹ to hosọ ehe glọ.

Eyin a hùn wepa tintan lọ tlolo, a na mọ wekanhlanmẹ de sọn Hagbẹ Anademẹtọ lọ dè hlan jọja lẹ. Apadewhe wekanhlanmẹ lọ tọn dọmọ: “Odẹ̀ ahundopo tọn mítọn wẹ yindọ nudọnamẹ he tin to owe ehe mẹ lẹ na gọalọna we nado duto kọgbidinamẹ po whlepọn he jọja lẹ nọ pehẹ to egbehe lẹ po ji, bosọ do lehe a na basi nudide he tin to kọndopọ mẹ hẹ ojlo Jiwheyẹwhe tọn lẹ do hia we.”

Nuhe sọgbe wẹ e yin dọ mẹjitọ lẹ ni pọ́n ovi yetọn lẹ go whẹ́n “to mẹplọnlọ po anademẹ Jehovah tọn po mẹ.” (Efe. 6:4) Ṣigba tlolo he jọja lẹ jẹ aflanmẹ biọ ji, susu yetọn ma nọ dejido yede go bo nọ to anademẹ dín vẹkuvẹku. Eyin mẹjitọ de wẹ hiẹ yin, nawẹ a sọgan gọalọna jọja aflanmẹ towe nado mọ ale susu yí sọn owe ehe mẹ gbọn? Ayinamẹ delẹ die.

▪ Yí vọkan towe titi bo jẹakọ hẹ ẹ ganji. Ehe ma yin nado nọ hia ẹ poun gba. Sọ tẹnpọn nado mọnukunnujẹ aliho he mẹ linlẹn lẹ yin didetọn te mẹ. Kakati owe lọ ni dọ nuhe sọgbe po nuhe ma sọgbe po na jọja lẹ poun, e gọalọna yé nado plọn “huhlọn wuntuntun tọn” yetọn lẹ. (Heb. 5:14) E sọ na yé ayinamẹ yọ́n-na-yizan lẹ do lehe yé na yiavunlọna nuhe sọgbe do ji. Di apajlẹ, Weta 15tọ (“Nawẹ Yẹn Sọgan Nọavunte Sọta Kọgbidinamẹ Hagbẹ Tọn Gbọn?”) bẹ nususu hẹn na jọja lẹ hugan nado dọ lala poun na nuzedonukọnnamẹ hagbẹ yetọn lẹ tọn. E basi zẹẹmẹ lehe yé na yí nunọwhinnusẹ́n Biblu tọn lẹ do didẹ nuhahun lẹ po lehe yé na nọ yinuwa to ninọmẹ he yé nọ pehẹ lẹ mẹ do po tọn nado sọgan yọ́n lehe yé na nọ “gblọnhona ode awetọ” do.—Kọl. 4:6.

▪ Yí adà owe lọ tọn he na hẹn wehiatọ nado dọ linlẹn etọn tọ́n lẹ zan. Dile etlẹ yindọ jọja lẹ wẹ adà ehelẹ yin awuwlena, be e ma na yọ́n dọ hiẹ ni kanwe gọ́ fie jẹ lẹ to vọkan towe titi mẹ ya?a Di apajlẹ, eyin hiẹ to dogbapọnna kanbiọ awe he gando dopedido go he na hẹn wehiatọ nado dọ linlẹn etọn tọ́n lẹ to weda 16tọ ji, tẹnpọn nado flin nuhe yin numọtolanmẹ towe to whenue a tindo owhe ovi towe tọn nkọ. Vlavo hiẹ sọgan kàn gblọndo he a na ko na to whenẹnu lẹ do otẹn he yin awuwlena do owe lọ mẹ lẹ mẹ. Enẹgodo, hiẹ sọgan kanse dewe dọ: ‘Nawẹ numọtolanmẹ ṣie do whẹho ehe ji wá diọ gbọn dile owhe lẹ to yìyì? Nukunnumọjẹnumẹ tẹwẹ n’ko tindo sọn aflanmẹ ṣie gbọ́n, podọ nawẹ n’sọgan yí i do gọalọna ovi ṣie ganji gbọn?’

▪ Ma dín tlintlindo nado yọ́n nuhe ovi towe kàn do owe etọn mẹ lẹpo blo. Adà owe lọ tọn he na hẹn wehiatọ nado dọ linlẹn etọn tọ́n lẹ yin awuwlena na hiẹ nido yọ́n nuhe tin to ahun ovi towe tọn mẹ, bo hẹn ẹn nado lẹnnupọndo nuhe hia e te ji kavi nado kàn nuhe tin to ahun etọn mẹ do adà he yin awuwlena lọ mẹ. Yanwle towe wẹ nado yọ́n nuhe tin to ahun etọn mẹ, e ma yin nuhe tin to owe etọn mẹ gba. Owe lọ na ayinamẹ mẹjitọ lẹ to hosọ lọ “Ayinamẹ Na Mẹjitọ Lẹ” glọ to weda 3tọ ji dọmọ: “Eyin hiẹ na gọalọna jọja aflanmẹ towe lẹ nado kanwe gọ́ owe yetọn mẹ po nugbonọ-yinyin po, ma nọ dindona nuhe yé nọ kàn lẹpo blo. To godo mẹ, yé sọgan voawu nado dọhodo whẹho he ji yé kannu do lẹ hẹ we.”

Azọ́nwanu de He Na Gọalọ to Oplọn Whẹndo Tọn Whenu

Kanbiọ He Jọja lẹ Nọ Kanse, Bladopọ 2, yin azọ́nwanu dagbe de he na yọ́n-na-yizan to Sinsẹ̀n-Bibasi Whẹndo tọn whenu. To whenuena e yindọ owe lọ ma bẹ kanbiọ hukan lẹ tọn hẹn debọdo-dego, nawẹ a sọgan yí i zan gbọn? Be e ma jẹ dọ hiẹ ni jẹakọ hẹ owe lọ ganji bo yí aliho mẹpinplọn tọn he sọgbe hẹ ovi lẹ dopodopo zan nado plọnnu hẹ yé ya?

Di apajlẹ, whẹndo delẹ sọgan duvivi zepọn lẹ bibasi tọn to whenue yé to dogbapọnna hosọ lọ, “Nawẹ Yẹn Sọgan Nọavunte Sọta Kọgbidinamẹ Hagbẹ Tọn Gbọn?” he tin to weda 132 po 133 po ji. Kanbiọ tintan he tin to finẹ na gọalọna visunnu kavi viyọnnu towe nado yọ́n kọgbidinamẹnu he e mọdọ e nọ vẹawuna emi hugan nado pehẹ. Kanbiọ awetọ do ninọmẹ he mẹ kọgbidinamẹ lọ sọgan fọ́n te hia. To whenuena owe lọ ko dọhodo kọdetọn he awujijona kọgbidinamẹ hagbẹ tọn kavi nado nọavunte sọta ẹ nọ hẹnwa lẹ ji, owe lọ biọ to ovi towe si nado wleawuna gblọndo delẹ he na dohia vlavo eyin ewọ na joawuna kọgbidinamẹ lọ, kavi nọavunte sọta ẹ. Gọalọna visunnu kavi viyọnnu towe nado lẹnnupọn bo wleawuna gblọndo he e mọdọ emi na voawu nado yí adọgbigbo po nujikudo po do na.—Ps. 119:46.

Azọ́nwanu de He Nọ Hùn Dotẹnmẹ Hodọdopọ Tọn Dote

Kanbiọ He Jọja lẹ Nọ Kanse, Bladopọ 2, dotuhomẹna jọja lẹ nado nọ dọhodopọ hẹ mẹjitọ yetọn lẹ. Di apajlẹ, apotin lẹ taidi “Nawẹ Yẹn Sọgan Dọhona Papa Kavi Mama Do Whẹho Zanhẹmẹ Tọn ji Gbọn?” (weda 63-64) po “Nọ Dọho hẹ Mẹjitọ Towe Lẹ!” (weda 189) po bẹ ayinamẹ yọ́n-na-yizan lẹ hẹn do lehe yè sọgan bẹ hodọdopọ jẹeji gando whẹho he vẹawu nado dọhodeji lẹ do go ji. Viyọnnu owhe 13 mẹvi de wlan dọmọ: “Owe ehe na mi adọgbigbo nado nọ dọhona mẹjitọ ṣie lẹ gando nuhe to ahun ji na mi lẹ go—etlẹ yin nuhe n’ko wà dai lẹ.”

Owe ehe sọ hùn dotẹnmẹ hodọdopọ tọn devo lẹ dote ga. Apotin de tin to vivọnu weta dopodopo tọn he hosọ etọn yin, “Etẹwẹ Hiẹ Lẹn?” Gbọnvona dọ eyin apotin dogbapọn tọn, e sọ sọgan yin yiyizan taidi dodonu de na hodọdopọ whẹndo tọn. Sẹpọ vivọnu weta dopodopo tọn, apotin devo sọ tin he hosọ etọn yin, “Afọdide He Yẹn Dona Ze!” Apotin ehe hùn dotẹnmẹ dotena jọja lẹ nado kàn aliho tangan he mẹ yé sọgan yí nuhe yé plọn to weta lọ mẹ lẹ zan te dai. Adà he gbọngodo to apotin lọ “Afọdide He Yẹn Dona Ze!” mẹ dọmọ: “Nuhe n’jlo na kanse mẹjitọ ṣie (lẹ) gando hosọ ehe go wẹ . . .” Ehe sọgan gọalọna jọja lẹ nado dín ayinamẹ họakuẹ lẹ sọn mẹjitọ yetọn lẹ dè.

Jẹ Ahun Ovi Towe Tọn Mẹ!

Taidi mẹjitọ de, yanwle towe wẹ nado jẹ ahun ovi towe tọn mẹ. Kanbiọ He Jọja lẹ Nọ Kanse, Bladopọ 2, sọgan gọalọna we nado wàmọ. Gbọ mí ni pọ́n lehe otọ́ de yí owe ehe zan nado hẹn hodọdopọ ahundopo tọn pọnte dogọ to ewọ po viyọnnu etọn po ṣẹnṣẹn do.

“Yẹn po Rebekah po tindo ofi dagbe delẹ he mí nọ zinzọnlin, kùn kẹkẹ, kavi kùn mọto yì. N’mọdọ nọtẹn ehelẹ nọ hẹn ẹn voawu nado dọ homẹ na mi.

“Adà tintan he mí gbadopọnna to owe ehe mẹ wẹ, wekanhlanmẹ de sọn Hagbẹ Anademẹtọ lọ dè po ‘Ayinamẹ Na Mẹjitọ Lẹ’ po. N’hẹn viyọnnu ṣie nado yọnẹn dọ e sọgan voawu nado kannu do owe etọn mẹ dile e yin didohia to weda 3tọ ji do. Podọ n’ma na dín tlintlindo gando nuhe e kandai lẹ go.

“N’na dotẹnmẹ Rebekah nado de weta he e jlo dọ mí ni dọhodeji lẹ debọdo-dego. Dopo to weta tintan he e de lẹ mẹ wẹ, ‘Be E Jẹ Dọ Ma Daihun Video ji Tọn lẹ Ya?’ N’ma lẹn gbede dọ e sọgan de weta enẹ! Ṣigba, owhẹ̀ etọn whẹ́n. Họntọn etọn susu wẹ nọ daihun video ji tọn he nọ hẹnmẹjọsi lẹ. N’ma yọ́n nudepope gando aihun danuwiwa video ji tọn po hogbe ylankan he e nọ bẹhẹn lẹ po go gba! Ṣigba ehe lẹpo wẹ e dọ tọ́n to whenue mí to hodọ do apotin lọ, “Afọdide He Yẹn Dona Ze!” ji to weda 251. Apotin enẹ sọ gọalọna Rebekah nado wleawuna gblọndo he e na na eyin e wá jọ bọ mẹde gbidikọna ẹn nado daihun video ji tọn mọnkọtọn.

“To ojlẹ ehe mẹ, Rebekah ma whleawu nado dọ nuhe e wlan do owe etọn mẹ lẹ na mi. Mí nọ voawu taun nado dọho to nupinplọn mítọn whenu. Mí nọ hia owe lọ sọn mẹde ji jẹ mẹde ji, podọ e nọ jlo nado dọho do nulẹpo ji, kakajẹ yẹdide lẹ po apotin lẹ po ji. Ehe hùn dotẹnmẹ dotena mi nado dọ numọtolanmẹ he n’nọ tindo to whenue n’tindo owhe etọn nkọ na ẹn podọ e nọ dọ lehe nulẹ te do to egbehe na mi. E nọ jlo na dọ nulẹpo na mi!”

Eyin mẹjitọ de wẹ a yin, ayihaawe ma tin dọ homẹ towe hùn to whenue owe ehe yin didetọn. Todin dotẹnmẹ hundote na we nado yí i zan ganji. Ojlo Hagbẹ Anademẹtọ lọ tọn wẹ yindọ owe lọ, Kanbiọ He Jọja lẹ Nọ Kanse—Gblọndo He Wazọ́n Lẹ, Bladopọ 2, na yin dona de na whẹndo towe. Odẹ̀ mítọn wẹ yindọ ni gọalọna mẹlẹpo—titengbe jọja vivẹ mítọn lẹ—nado ‘to zọnlinzin gbọn gbigbọ wiwe dali zọnmii.’—Gal. 5:16.

[Nudọnamẹ odò tọn]

[Yẹdide to weda 30]

Nuhe Jọja Delẹ to Didọ

“Owe he e jẹ dọ yè ni sinai po wekantin po to alọmẹ bo hia bosọ to ayihamẹlẹnpọn do e ji de wẹ e yin. Nugbo lọ dọ e yin awuwlena taidi owe he mẹ yè nọ basi kandai mẹdetiti tọn do zọ́n bọ e na gọalọna we nado lẹnnupọn po yanwle lọ po nado de lehe hiẹ na yinuwa do nado tindo kọdetọn dagbe to gbẹ̀mẹ.”—Nicola.

“N’nọ yin kọgbidina whlasusu nado do dope hẹ sunnu lẹ, etlẹ yin sọn mẹhe tindo linlẹn dagbe lẹ dè. Adà tintan owe ehe tọn hẹn mi kudeji dọ mahopọnna nudepope he mẹde sọgan dọ, n’ma ko wleawufo nado do dope hẹ sunnu.”—Katrina.

“Apotin lọ, ‘Be Hiẹ to Nulẹnpọndo Baptẹm Yíyí ji Ya?’ ko gọalọna mi nado yí nukun nujọnu tọn do pọ́n baptẹm yíyí dogọ. E whàn mi nado vọ́ nulẹnpọndo aliho he mẹ n’nọ plọnnu bo nọ hodẹ̀ te ji.”—Ashley.

“Dile etlẹ yindọ mẹjitọ ṣie he yin Klistiani lẹ ko plọn mi sọn ovu whenu gbọ́n, owe ehe gọalọna mi nado lẹnnupọndo afọdide he yẹnlọsu dona ze to gbẹ̀mẹ lẹ ji. Podọ e ko sọ gọalọna mi nado nọ dọ homẹ na mẹjitọ ṣie lẹ hugan dai tọn.”—Zamira.

[Yẹdide to weda 31]

Mẹjitọ lẹ emi, mì jẹakọ hẹ owe ehe ganji

[Yẹdide to weda 32]

Yí i do basi yanwle towe nado jẹ ahun ovi towe tọn mẹ