Kanbiọ Wehiatọ Mítọn lẹ Tọn . . .

Be Mẹlẹpo Tindo Dotẹnmẹ Hundote Dopolọ Nado Yọ́n Jiwheyẹwhe Ya?

▪ To whenuena yè kanse Jesu dọ gbedide tẹwẹ klohugan, e dọmọ: “Hiẹ dona yí ahun towe lẹpo, alindọn towe lẹpo, podọ ayiha towe lẹpo do yiwanna Jehovah Jiwheyẹwhe towe.” (Matiu 22:37) Ṣigba, whẹpo gbẹtọ lẹ nado yiwanna Jiwheyẹwhe, yé dona tindo oyọnẹn he pegan gando ewọ go. (Johanu 17:3) Be mẹlẹpo na tindo dotẹnmẹ hundote dopolọ nado mọ oyọnẹn ehe yí ya?

Biblu wẹ yin asisa tintan oyọnẹn Jiwheyẹwhe tọn. (2 Timoti 3:16) Mẹsusu nọ nọgbẹ̀ to lẹdo he mẹ Biblu tin-to-aimẹ te lẹ. Whlasusu wẹ omẹ ehelẹ sọgan mọ dotẹnmẹ hundote nado tindo oyọnẹn he pegan gando Jiwheyẹwhe go gbọn Biblu pinplọn dali. (Matiu 28:19) Mẹdelẹ tindo dotẹnmẹ hundote nado yin pinplọn egbesọegbesọ gando Jiwheyẹwhe go gbọn mẹjitọ Klistiani owanyinọ yetọn lẹ dali.—Deutelonomi 6:6, 7; Efesunu lẹ 6:4.

Ṣigba, mẹdevo lẹ to gbẹnọ to ninọmẹ he ma bọawuna yé nado plọnnu lẹ mẹ. Mẹdelẹ wá sọn whẹndo zingidinọ he mẹ mẹjitọ lẹ ma nọ do owanyi jọwamọ tọn depope hia ovi yetọn lẹ te mẹ. (2 Timoti 3:1-5) E sọgan vẹawuna mẹhe whẹ́n to ninọmẹ mọnkọtọn lẹ mẹ nado pọ́n Jiwheyẹwhe hlan di Otọ́ olọn mẹ tọn owanyinọ de. Mẹsusu ma mọ nuplọnmẹ wehọmẹ tọn yí dile e jẹ do podọ ehe nọ glọnalina nugopipe Biblu hihia tọn yetọn. Etomọṣo, mẹdevo lẹ mọ nuplọnmẹ sinsẹ̀n lalo tọn lẹ yí, kavi yé to whẹndo, lẹdo, kavi otò he mẹ nugbo Biblu tọn pinplọnmẹ ma yin alọkẹyi te lẹ mẹ. (2 Kọlintinu lẹ 4:4) Be ninọmẹ omẹ mọnkọtọn lẹ tọn glọnalina yé ma nado plọnnu gando Jiwheyẹwhe go bo yiwanna ẹn wẹ ya?

Jesu yigbe dọ avùnnukundiọsọmẹnu he mẹdelẹ na pehẹ na hẹn ẹn vẹawuna yé nado yiwanna Jiwheyẹwhe bo setonuna ẹn. (Matiu 19:23, 24) Ṣigba, Jesu flinnu devi etọn lẹ dọ eyin onú delẹ tlẹ taidi nuhe glo gbẹtọ, “onú lẹpo wẹ yọnbasi na Jiwheyẹwhe.”—Matiu 19:25, 26.

Lẹnnupọndo whẹho he bọdego ehelẹ ji: Jehovah Jiwheyẹwhe ko hẹn ẹn diun dọ Ohó etọn, Biblu ni yin owe he gbayipe hugan to ojlẹ lẹpo mẹ. Biblu dọ dọdai dọ wẹndagbe gando Jiwheyẹwhe po lẹndai etọn na aigba po go na yin lilá to “aigba fininọ lẹpo ji.” (Matiu 24:14) To egbehe, Kunnudetọ Jehovah tọn lẹ nọ dọyẹwheho to aigba he hugan 230 lẹ ji bo nọ zín owe sinai do Biblu ji lẹ jẹgbonu to nudi ogbè 500 mẹ. Mẹhe ma tlẹ sọgan hia Biblu lẹ lọsu sọgan plọn nususu gando Jiwheyẹwhe nugbo lọ go gbọn ayidonugo sọwhiwhe tọn nina nudida etọn lẹ dali.—Lomunu lẹ 1:20.

Humọ, Ohó Jiwheyẹwhe tọn dọmọ: “OKLUNỌ to ayiha lẹpo mẹ dinpọn, bosọ tunwun aṣàvà linlẹn tọn lẹ; eyin hiẹ din in, yè na mọ ẹn sọn dè we.” (1 Otannugbo lẹ 28:9) Enẹwutu, dile etlẹ yindọ Jehovah ma dopagbe dọ mẹdopodopo na mọ dotẹnmẹ hundote dopolọ yí, e hẹn ẹn diun dọ dotẹnmẹ hundote de yin nina ahunjijlọnọ lẹpo. E na tlẹ sọ hẹn ẹn diun dọ mẹhe ma mọ dotẹnmẹ hundote pọ́n nado plọnnu gando ewọ go lẹ na mọ dotẹnmẹ hundote de yí gbọn fọnsọnku gblamẹ biọ aihọn yọyọ dodo tọn de mẹ.—Owalọ lẹ 24:15.