Nọ Yí Linlinnamẹwe Mítọn lẹ Zan Ganji
1 Atọ̀họ̀-Nuhihọ́ lọ Tọn po Réveillez-vous! po wẹ linlinnamẹwe họakuẹ he nọ hẹn ale wá hugan he gbẹtọ lẹ sọgan hia to egbehe. Etẹwutu? Na nugbo gbigbọmẹ tọn he yé nọ bẹhẹn lẹ sọgan yinuwado gbẹzan gbẹtọ lẹ tọn ji kakadoi to aliho dagbe mẹ. Nawẹ mí sọgan nọ yí linlinnamẹwe mítọn lẹ zan ganji gbọn?
2 Nọ Dapana Nuhẹngu: Be linlinnamẹwe he mí nọ yí to osun dopodopo mẹ lẹ nọ pli do owhé mítọn lẹ gbè wẹ ya? Ehe sọgan jọ eyin nuzinzọn mítọn hugan nuhudo mítọn lẹ. Eyin mí jo linlinnamẹwe hoho lẹ do bọ yé pli do finẹ bo ma nọ yí yé zan gbede, ehe na dohia dọ mí ma yọ́n pinpẹn azọ́nwanu họakuẹ ehelẹ tọn to gigọ́ mẹ. Linlinnamẹwe dopodopo nọ bẹ nugbo he nọ fọnjlodotenamẹ bosọ nọ hẹn pekọ wá namẹ to gbigbọ-liho lẹ hẹn. Etẹwẹ mí sọgan wà ma nado hẹn yé gú?—Joh. 6:10-13.
3 Nọ Yí Zinjẹgbonu Hoho lẹ Zan Ganji: Flindọ Atọ̀họ̀-Nuhihọ́ lọ Tọn po Réveillez-vous! po nọ sinai do Biblu ji. Nudọnamẹ he yé bẹhẹn lẹ ma nọ dohó dile ojlẹ to yìyì. (Isa. 40:8) Mí ma dona nọ whleawu nado ze linlinnamẹwe hoho lẹ donukọnnamẹ eyin yé gbẹ́ pò to ganji. Etẹwẹ dopodopo mítọn sọgan wà eyin linlinnamẹwe lẹ pli do mí si? Dọho hẹ nugopọntọ sinsẹ̀nzọn tọn podọ ewọ na mọ gbehosọnalitọ po wẹnlatọ devo lẹ po na yé nido do yé gbonu. Wẹnlatọ he jei aigba he ma ko yin didenamẹ de ji lẹ sọgan yí linlinnamẹwe hoho lẹ zan.
4 Nọ Gbadopọnna Nuhudo Whẹndo Towe Tọn: Linlinnamẹwe lẹ nọ saba pli do mí si to whenuena nuzinzọn mítọn ma sọgbe hẹ lẹnpọn dagbe. Nawẹ mì sọgan yọ́n nuhudo mìtọn taun gbọn? Tatọ́ whẹndo tọn dopodopo dona basi todohukanji mẹhe sọgan hiawe to owhé etọn gbè lẹ tọn bo lẹn sọha linlinnamẹwe he mẹdopodopo na yizan tọn. Mẹdopodopo dona tindo Atọ̀họ̀-Nuhihọ́ lọ Tọn po Réveillez-vous! po nado sọgan yí yé zan to opli lẹ ji podọ na oplọn mẹdetiti tọn. Enẹgodo, omẹ dopodopo dona lẹn sọha linlinnamẹwe he e na tindo nuhudo etọn to lizọnyizọn kunnudegbe tọn mẹ lẹ tọn. Tatọ́ whẹndo tọn lọ dona tẹnpọn nado yọ́n linlinnamẹwe he mẹdopodopo dogbonu to ojlẹ tangan de mẹ. Eyin a wàmọ, hiẹ sọgan mọdọ nuhudo tin nado basi vọjlado na nuzinzọn mìtọn na e nido sọgbe hẹ nuhudo mìtọn.
5 Mí jlo dọ linlinnamẹwe mítọn lẹ ni jẹ yanwle he wutu yé do yin awuwlena lọ kọ̀n, yèdọ nado gọalọna ahunjijlọnọ lẹ na yé nido plọn nususu dogọ gando lẹndai jiawu Jehovah tọn lẹ go. Owẹ̀n ogbẹ̀-whlẹngán tọn he tin to owe mítọn lẹ mẹ ma sọgan jẹ ahun mẹhe yiwanna dodowiwa lẹ tọn mẹ gbede eyin yé gbọṣi wesẹdotẹn kavi saki mítọn lẹ mẹ. Enẹwutu, mí dona yin lẹnpọn-dagbenọ to whenue mí to owe he mí na dogbonu lẹ yí podọ mí dona nọ yí yé zan po nuyọnẹn po nado hẹn ale wá na mẹdevo lẹ.—Flp. 4:5.
[Kanbiọ Oplọn tọn lẹ]
1. Nawẹ Atọ̀họ̀-Nuhihọ́ lọ Tọn po Réveillez-vous! po nọ yinuwado ahun wehiatọ susu tọn ji gbọn?
2. Naegbọn mí dona dapana linlinnamẹwe lẹ hinhẹngú?
3. Etẹwẹ mí sọgan wà eyin linlinnamẹwe mítọn hoho lẹ pli do owhé mítọn lẹ gbè?
4. Etẹwẹ tatọ́ whẹndo tọn dopodopo dona wà nado gọalọna mẹhe tin to owhé etọn gbè lẹpo na yé nido yí linlinnamẹwe mítọn lẹ zan ganji?
5. Nawẹ mí sọgan do pinpẹn-nutọn-yinyọnẹn hia na linlinnamẹwe mítọn lẹ gbọn?