Hẹn Lizọnyizọn Towe Pọnte Dogọ—Kandai Jlodotọ lẹ Tọn Bibasi — WESẸDOTẸN INTẸNẸT JI TỌN Watchtower Tọn

Hẹn Lizọnyizọn Towe Pọnte Dogọ—Kandai Jlodotọ lẹ Tọn Bibasi

“Nọ payi dewe po mẹpinplọn towe po go to whepoponu.” (1 Tim. 4:16) Ayinamẹ gbọdo he apọsteli Paulu na Timoti ehe dohia dọ vlavo mí yin wẹnlatọ yọyọ kavi numimọnọ, mí dona nọ dovivẹnu nado to nukọnyiyi basi. Nado jẹ yanwle enẹ kọ̀n, adà yọyọ de he hosọ etọn yin “Hẹn Lizọnyizọn Towe Pọnte Dogọ” na jẹ awusọhia ji to Lizọnyizọn Ahọluduta Tọn Mítọn mẹ. Hosọ dopodopo na nọ dọhodo aṣa dagbe de he na gọalọna mí nado hẹn lizọnyizọn mítọn pọnte dogọ ji bo nasọ nọ bẹ ayinamẹ delẹ hẹn gando lehe mí na wleawuna aṣa enẹ do go. Mẹlẹpo wẹ yin tulina nado nọ na ayidonugo vonọtaun aṣa dagbe enẹ yiyizan to osun lọ mẹ. To vivọnu osun lọ tọn, adà Opli Sinsẹ̀nzọn tọn de na nọ hùn dotẹnmẹ dote na mí nado dọ lehe aṣa dagbe he mí yizan to osun lọ mẹ lọ hẹn ale wá na mí do. To osun ehe mẹ, mí yin tulina nado wazọ́n do kandai jlodotọ lẹ tọn bibasi ji.

Nuhewutu E Do Yin Nujọnu: Azọ́ndenamẹ mítọn hinhẹndi bẹ nususu hẹn hugan yẹwhehodidọ poun. Mí dona nọ lẹkọyi mẹhe do ojlo hia lẹ dè bo plọnnu hẹ yé nado sọgan húsinna okún nugbo lọ tọn he mí do. (Mat. 28:19, 20; 1 Kọl. 3:6-9) Ehe nọ biọ dọ mí ni vọ́ jlodotọ lọ mọ, dọhodo ahunmẹdunamẹnu etọn lẹ ji, bosọ dọho yinukọn dogọ hẹ ẹ do nuhe ji mí ko dọhodo wayi. Enẹwutu, eyin mẹde do ojlo hia, nujọnu wẹ e yin nado nọ basi kandai etọn.

Lehe Mí Sọgan Wàmọ Do:

• Nọ hẹn ẹn diun dọ a hẹn nuhe a na yí do basi kandai lẹ do saki towe mẹ. Kandai towe lẹ dona nọ mẹ́n bo nọ tin to titoji. Nọ basi kandai to dlapọn lọ lẹ godo tlolo.

• Nọ basi kandai nudọnamẹ he gando whétọ lọ go lẹ tọn. Yinkọ etọn, adlẹsi etọn, sọha alokan tọn kavi adlẹsi Intẹnẹt tọn etọn. Etẹ go wẹ a doayi gando ewọ kavi whẹndo etọn go he sọgan gọalọna we?

• Nọ basi kandai nuhe ji mì dọhodo lẹ tọn. Wefọ tẹlẹ wẹ mì hia? Etẹwẹ e dọ gando nuyise etọn lẹ go? Owe tẹwẹ a jodona ẹn? Nọ basi kandai gànmẹ po azán dlapọn lọ tọn po tọn.

• Nọ kàn nuhe ji a jlo na dọhodo to dlapọn he na bọdego whenu lẹ dai. Etẹwẹ a dọna ẹn dọ mì na gbadopọnna? Whetẹnu wẹ a dọna ẹn dọ emi na lẹkọwa?

• Nọ basi kandai yọyọ lẹ to whedepopenu he a lẹkọyi. Nude ma ylan to e mẹ eyin nudọnamẹ he a kàn dai lẹ tlẹ sù.

Tẹ́n Ehe Pọ́n to Osun lọ Mẹ:

• To whenue a to kandai de basi, nọ dọ nuhe kàn a te lẹ na mẹhe po hiẹ po to azọ́nwa.