Nọ Yí jw.org Zan to Lizọnyizọn lọ mẹ—“Lẹzun Họntọn Jehovah Tọn”

To jw.org/fr ji, video voovo lẹ tin na ovi lẹ. Hosọ daho video lọ tọn wẹ “Lẹzun Họntọn Jehovah Tọn.” Be hiẹ ko yí video ehelẹ zan to lizọnyizọn lọ mẹ ya? Eyin a to Biblu plọn hẹ mẹjitọ he tindo ovi pẹvi lẹ, naegbọn hiẹ ma na do video lọ lẹ hia ẹ? Ehe sọgan whàn ẹn nado pọ́n adà devo lẹ to jw.org ji.

To whenue mẹmẹsunnu de to Linlin Ahọluduta tọn sọha 38tọ má, e dukosọ hẹ nawe de bo ze alọnuwe pẹvi lọ donukọnna ẹn, podọ nawe lọ jẹ alọnuwe pẹvi lọ hia ji to afọdopolọji. Nawe lọ tindo ovi susu he jlo na yọ́n nuhe to alọnuwe lọ mẹ. Mẹmẹsunnu lọ dọhodo nuhe alọnuwe lọ bẹhẹn lẹ ji hẹ yé to kleun mẹ bo do jw.org hia yé to godo alọnuwe lọ tọn. Na nawe lọ do ojlo hia wutu, mẹmẹsunnu lọ yí dotẹnmẹ hundote enẹ zan bo hò dopo to video Kalẹb tọn lẹ mẹ na nawe lọ po ovi etọn lẹ po sọn alokan apòmẹ tọn etọn ji.

Mẹmẹyọnnu de dọhona azọ́nwatọgbẹ́ de he tindo ovi pẹvi lẹ gando nọtẹn Intẹnẹt tọn mítọn go gọna nudọnamẹ he e bẹhẹn na whẹndo lẹ. Nawe lọ po ovi etọn lẹ po yì jw.org ji. To nukọn mẹ, nawe lọ dọna mẹmẹyọnnu lọ dọ to whégbè ovi emitọn lẹ nọ to ohàn lọ “Nọ Dọyẹwheho Ohó lọ Tọn” ji pé, yèdọ dopo to ohàn he tin adà lọ “Lẹzun Họntọn Jehovah Tọn” glọ lẹ mẹ.

Jẹakọ hẹ adà jw.org tọn ehe bo yí dopo to video lẹ, ohàn lẹ, kavi onú devo he e bẹhẹn lẹ mẹ do alokan apòmẹ tọn towe ji. Gbọnmọ dali, hiẹ na tin to gbesisọ mẹ nado yí adà jw.org tọn ehe zan to lizọnyizọn lọ mẹ. Lehe azọ́nwanu ehe yọ́n-na-yizan do sọ nado gọalọna mí nado to azọ́nwa na Oklunọ di afanumẹ!—Owalọ lẹ 20:19.