Hulda Jẹ Yanwle Etọn Kọ̀n

EYIN a ko dla lopo pẹvi Sangir Besar tọn pọ́n to Indonésie to owhe delẹ die wayi, a gán ko dukosọna mẹmẹyọnnu mítọn atọ̀n delẹ to huto. Mẹlẹ yọ́n yé ganji to lopo lọ ji na lizọnyizọn yetọn, na yé nọ gọalọna gbẹtọ lẹ nado mọnukunnujẹ Biblu mẹ wutu. Amọ́ to ojlẹ enẹ mẹ, azọ́n he gbọnvo pete de wà wẹ yé te.

Jẹnukọn whẹ́, yé nọ biọ otọ̀ lọ mẹ, bo nọ bẹ zannu lẹ wá agé ji. Delẹ to zannu lọ lẹ mẹ nọ klo sọ bọlu afọ tọn. Enẹgodo, mẹmẹyọnnu lọ lẹ nọ sinai do apotin pẹvipẹvi delẹ ji, bo nọ yí ṣówhènú do gbà zannu lọ lẹ do flinflin, bọ yé nọ wá whè di koklozìn nkọ. Enẹgodo, yé nọ bẹ zannu he yé gbà lọ lẹ do sindànu lọbanọ lẹ mẹ bo nọ gbọn pekán de ji wá fie yé nọ nọ̀. Todin, yé nọ do zannu lọ lẹ do saki dahodaho lẹ mẹ bo nọ bẹ yé do kọ́-hún gaa lẹ mẹ na yé nido yin yiyizan nado basi ali lẹ.

Dopo to mẹmẹyọnnu ehelẹ mẹ nọ yin Hulda. Ninọmẹ etọn na ẹn dotẹnmẹ nado yí whenu zan dogọ to azọ́n ehe mẹ hugan mẹmẹyọnnu awe he pò lẹ. E nọ saba yí akuẹ he e mọ lẹpo zan nado penukundo nuhudo egbesọegbesọ tọn whẹndo etọn tọn lẹ go. Amọ́ todin, e sọ to azọ́n ehe wà po yanwle devo po to ayiha mẹ. E jlo na họ̀ tablẹti de nado penugo bo nọ yì JW Library^® ji. Hulda yọnẹn dọ video po nudevo he to azọ́nwanu ehe mẹ lẹ po na gọalọna emi nado hẹn lizọnyizọn emitọn pọnte bosọ mọnukunnujẹ Biblu mẹ dogọ.

Hulda nọ wazọ́n na gànhiho awe to afọnnu lẹpo na osun dopo daa, e nọ gbà zannu susu he gán gọ́ kọ́-hún pẹvi dopo. To godo mẹ, e mọ akuẹ he pé nado họ̀ tablẹti lọ.

Hulda dọ dọ, “dile etlẹ yindọ agbọ́ nọ pé mi bọ zannu gbigbà sọ nọ zọ́n bọ lànmẹ nọ vẹ́ mi, n’yawu wọn awufiẹsa ṣie lẹpo whenue n’penugo bo yí tablẹti yọyọ ehe zan nado tindo kọdetọn dagbe dogọ to lizọnyizọn lọ mẹ, podọ nado wleawuna opli lẹ po awubibọ po dogọ.” E sọ dọ dọ tablẹti lọ gọalọna emi to bẹjẹeji azọ̀n bẹplamẹ covid 19 tọn, na okàn ji wẹ nuwiwa agun lọ tọn lẹpo nọ yin bibasi gbọn wutu. Mí jaya hẹ Hulda dọ e pà ẹ bọ e jẹ yanwle etọn kọ̀n.