Kanbiọ lẹ sọn Wehiatọ lẹ Dè

Mẹnu wẹ yin “angẹli dide lẹ” he yin nùdego to 1 Timoti 5:21 mẹ?

Apọsteli Paulu kanwehlan mẹho hatọ etọn Timoti dọ: “Yẹn degbena we vivẹvivẹ to Jiwheyẹwhe po Klisti Jesu po, gọna angẹli dide lẹ nukọn nado nọ hodo anademẹ ehelẹ matin nuvẹun kavi mẹnukuntahihopọn.”—1 Tim. 5:21.

Tintan whẹ́, mí na dọhodo angẹli he ma gán tin to pipli angẹli tọn ehe mẹ lẹ ji. E họnwun dọ yé ma yin apadewhe gbẹtọ 144000 lẹ tọn. Whenue Paulu kanwehlan Timoti, fọnsọnku olọn mẹ tọn Klistiani yiamisisadode lẹ tọn ma ko bẹjẹeji. Apọsteli lẹ po mẹyiamisisadode devo lẹ po ma ko lẹzun nudida gbigbọnọ lẹ, enẹwutu “angẹli dide lẹ” ma gán ko to alọdlẹndo yé.—1 Kọl. 15:50-54; 1 Tẹs. 4:13-17; 1 Joh. 3:2.

Humọ, “angẹli dide lẹ” ma gán ko to alọdlẹndo angẹli he vẹtoli to Singigọ lọ whenu lẹ. Angẹli ehelẹ nọ adà Satani tọn mẹ bo lẹzun aovi lẹ, yèdọ mẹhe Jesu diọnukunsọ lẹ. (Jen. 6:2; Luku 8:30, 31; 2 Pita 2:4) To sọgodo, yé na yin ginglọn do odò mapote mẹ na owhe 1000, podọ to enẹgodo yé na yin vivasudo to pọmẹ hẹ Lẹgba.—Juda 6; Osọ. 20:1-3, 10.

“Angẹli dide lẹ” he go Paulu donù dona ko yin angẹli olọn mẹ tọn he nọgodona “Jiwheyẹwhe po Klisti Jesu po” lẹ, yèdọ mẹhe yin nùdego to wefọ dopolọ mẹ lẹ.

Angẹli nugbonọ fọtọ́n susu lẹ wẹ tin. (Heb. 12:22, 23) Mí ma dona lẹndọ yemẹpo wẹ tindo azọ́ndenamẹ dopolọ to ojlẹ dopolọ mẹ. (Osọ. 14:17, 18) Flindọ angẹli dopo poun wẹ yin azọ́ndena nado và awhànfuntọ Asilia tọn 185 000 sudo. (2 Ahọ. 19:35) Susu angẹli lẹ tọn wẹ gán ko yin azọ́ndena nado “bẹ nuhe nọ hẹnmẹ dahli lẹ po mẹhe nọ to sẹ́nhẹngba lẹpo po sẹ̀ sọn Ahọluduta [Jesu tọn] mẹ.” (Mat. 13:39-41) Devo lẹ gán yin azọ́ndena nado “bẹ mẹdide etọn lẹ pli” do olọn mẹ. (Mat. 24:31) Podọ, devo lẹ yin azọ́ndena nado ‘basi hihọ́na mí to aliho mítọn lẹpo ji.’—Salm. 91:11; Mat. 18:10; yijlẹdo Matiu 4:11; Luku 22:43 go.

Angẹli de to anadena asu po asi po de yì owhé de gbè to lizọnyizọn lọ mẹ. Dawe de to owhé lọ gbè bo to dẹ̀ho.

“Angẹli dide lẹ” he yin nùdego to 1 Timoti 5:21 mẹ lẹ gán ko yin angẹli he mọ azọ́ndenamẹ vonọtaun yí lẹ gando omẹ Jiwheyẹwhe tọn lẹ go. To lẹdo hodidọ lọ tọn mẹ, Paulu na ayinamẹ nuyọnẹn tọn gando mẹho lẹ go, mẹhe jẹna sisi agun lọ tọn lẹ. Mẹho lẹ lọsu dona yí adà yetọn wà bo hẹn azọ́ndenamẹ yetọn lẹ di “matin nuvẹun kavi mẹnukuntahihopọn,” podọ yé ma dona nọ nọ̀ plaplaji do basi nudide de kavi do dawhẹ. (1 Tim. 5:21) Whẹwhinwhẹ́n titengbe he wutu yé dona hodo ayinamẹ gbọdo Paulu tọn wẹ yindọ yé to sinsẹ̀nzọn wà “to Jiwheyẹwhe po Klisti Jesu po, gọna angẹli dide lẹ nukọn.” Enẹwutu, e họnwun dọ angẹli delẹ mọ azọ́ndenamẹ delẹ yí gando agun lọ go, enẹ wẹ nado basi hihọ́na devizọnwatọ Jiwheyẹwhe tọn lẹ, deanana azọ́n yẹwhehodidọ tọn bosọ dogbè to Jehovah nukọn.—Mat. 18:10; Osọ. 14:6.