Nọ Hodo Apajlẹ Angẹli Nugbonọ lẹ Tọn

1, 2. (a) Nawẹ mí gbọnvona angẹli lẹ gbọn? (b) Etẹlẹ wẹ mí tindo to kọndopọ mẹ hẹ angẹli lẹ?

WHENUE Jehovah dọ̀n we wá nugbo lọ mẹ, e basi oylọna we wá whẹndo owanyinọ sinsẹ̀n-basitọ etọn lẹ tọn he bẹ omẹ voovo lẹ hẹn de mẹ, gọna angẹli nugbonọ livi susu lẹ. (Dan. 7:9, 10) Dile mí to nulẹnpọn do angẹli lẹ ji, mí gán mọ lehe yé gbọnvona mí do. Di apajlẹ, angẹli lẹ ko tin hoho whẹpo mí do yin didá. (Jobu 38:4, 7) Yé dohuhlọn hú mí taun. Podọ, yé yin wiwe bosọ yin dodonọ jẹ obá he yiaga mẹ hú gbẹtọvi mapenọ lẹ.—Luku 9:26.

² Amọ́, mahopọnna vogbingbọn ehelẹ, míwlẹ po angẹli lẹ po tindo nususu to kọndopọ mẹ. Di apajlẹ taidi angẹli lẹ, mí gán do jẹhẹnu dagbedagbe Jehovah tọn lẹ hia. Mí do mẹdekannujẹ nudide bibasi tọn taidi angẹli lẹ. Dile e yindo na angẹli lẹ, mí tindo oyín mẹdetiti tọn, gbẹtọ-yinyin voovo po azọngban he gbọnvo lẹ po. Podọ taidi angẹli lẹ, mí do hudo nado basi sinsẹ̀n hlan Mẹdatọ mítọn.—1 Pita 1:12.

3. Etẹwẹ mí gán plọn sọn angẹli nugbonọ lẹ dè?

³ Na mí tindo nususu to kọndopọ mẹ hẹ angẹli lẹ wutu, apajlẹ dagbe yetọn gán na mí tuli bosọ plọnnu mí. Na nugbo tọn, mí gán plọn nudagbe susu lẹ sọn yé dè. To hosọ ehe mẹ, mí na mọ lehe mí gán hodo apajlẹ whiwhẹ tọn angẹli nugbonọ lẹ tọn, owanyi yetọn na gbẹtọ lẹ, akọndonanu yetọn po vivẹnudido yetọn nado hẹn agun lọ do wiwe ji po tọn do.

ANGẸLI LẸ YIN WHIWHẸNỌ

4. (a) Nawẹ angẹli lẹ nọ do whiwhẹ hia gbọn? (b) Naegbọn angẹli lẹ do yin whiwhẹnọ? (Salmu lẹ 89:7)

⁴ Angẹli nugbonọ lẹ yin whiwhẹnọ. Mahopọnna dọ yé tindo numimọ, dohuhlọn bosọ tindo nuyọnẹn, yé nọ setonuna anademẹ Jehovah tọn lẹ. (Salm. 103:20) Dile yé to nukunpedo azọ́ndenamẹ yetọn lẹ go, yé ma nọ yí nùgo gbede gando nuhe yé wà lẹ go kavi jla huhlọn he yé tindo hugan gbẹtọvi lẹ. Yé nọ yí ayajẹ do wà ojlo Jiwheyẹwhe tọn eyin yinkọ yetọn lẹ ma tlẹ yin yinyọnẹn.a (Jen. 32:24, 29; 2 Ahọ. 19:35) Yé nọ gbẹ́ nado kẹalọyi gigo he Jehovah kẹdẹ jẹna. Naegbọn angẹli lẹ do nọ whiwhẹ yede sọmọ? Na yé yiwanna Jehovah bosọ nọ na ẹn sisi sisosiso wutu wẹ.—Hia Salmu lẹ 89:7.

5. Nawẹ angẹli de do whiwhẹ hia whenue e to nugbẹna apọsteli Johanu gbọn? (Sọ pọ́n yẹdide lọ.)

⁵ Pọ́n nujijọ de he do whiwhẹ angẹli lẹ tọn hia. To nudi owhe 96 W.M. tọn, angẹli de he mí ma yọ́n yinkọ etọn do numimọ jiawu de hia apọsteli Johanu. (Osọ. 1:1) Nawẹ Johanu yinuwa gbọn whenue e mọ numimọ lọ? E tẹnpọn nado basi sinsẹ̀n hlan angẹli lọ. Amọ́, nudida gbigbọnọ nugbonọ enẹ yawu doalọtena ẹn bo dọmọ: “Ṣọ́ dewe! A wàmọ blo! Afanumẹ de poun wẹ yẹn kẹdẹdi hiẹ po mẹmẹsunnu towe lẹ po . . . Sẹ̀n Jiwheyẹwhe!” (Osọ. 19:10) Nuyiwa he do whiwhẹ hia nankọ die! Angẹli lọ ma do ojlo to gigo kavi gbégbò mẹ. E yawu lẹ́ ayidonugo Johanu tọn hlan Jehovah Jiwheyẹwhe ji. To ojlẹ dopolọ mẹ, angẹli lọ ma yí nukunpẹvi do pọ́n Johanu. Dile etlẹ yindọ angẹli lọ ko sẹ̀n Jehovah na whenu dindẹn yijlẹdo Johanu go, bosọ tindo huhlọn hú i tlala, e gbọn whiwhẹ dali ylọ apọsteli lọ dọ afanumẹ hatọ emitọn. Podọ, dile etlẹ yindọ angẹli lọ dona gbẹnuna Johanu, e ma wọhẹ ẹ kavi yinuwa hẹ apọsteli mẹhomẹ lọ to aliho sinsinyẹn mẹ. Kakatimọ, angẹli lọ dọho po homẹdagbe po. Vlavo na e mọdọ awuji Johanu wutu wẹ.

6. Nawẹ mí gán nọ hodo apajlẹ whiwhẹ tọn angẹli lẹ tọn gbọn?

⁶ Nawẹ mí gán hodo apajlẹ whiwhẹ tọn angẹli lẹ tọn gbọn? Mílọsu lẹ ma dona nọ yí nùgo whenue mí to nukunpedo azọ́ndenamẹ mítọn lẹ go kavi kẹalọyi gigo na nuwadotana mítọn lẹ. (1 Kọl. 4:7) Humọ, mí ma dona nọ mọdọ mí yiaga hú mẹdevo lẹ eyin mí ko to Jehovah sẹ̀n na ojlẹ dindẹn jẹnukọnna yé kavi eyin mí tindo lẹblanulọkẹyi delẹ. Na nugbo tọn, lehe mí tindo lẹblanulọkẹyi sọ, mọ wẹ mí dona nọ mọdọ mí yìdo na mẹdevo lẹ dogọ do niyẹn. (Luku 9:48) Taidi angẹli lẹ, mí nọ jlo na yilizọn na mẹdevo lẹ. Mí ma nọ jlo na ze míde daga.

7. Nawẹ mí gán nọ do whiwhẹ hia whenue e biọ dọ mí ni jla pọndohlan mẹde tọn do kavi na ẹn ayinamẹ gbọn?

⁷ Mí gán sọ nọ do whiwhẹ hia eyin e biọ dọ mí ni jla pọndohlan yisenọ hatọ de kavi ovi mítọn tọn do, kavi na yé ayinamẹ. Whenue mí to ayinamẹ na, e gán biọ dọ mí ni yin nujikudonọ. Amọ́ taidi angẹli he yí homẹdagbe do jla pọndohlan Johanu tọn do lọ, mí gán yin nujikudonọ fẹẹ ṣogan bo ma na na ayinamẹ mẹlọ to aliho he na hẹn ẹn gbọjọ mẹ. Eyin mí ma nọ mọ míde di mẹhe yiaga, mí na nọ na ayinamẹ sinai do Biblu ji lẹ to aliho he do sisi po awuvẹmẹ po hia mẹ.—Kol. 4:6.

ANGẸLI LẸ YIWANNA GBẸTỌVI LẸ

8. (a) Sọgbe hẹ Luku 15:10, nawẹ angẹli lẹ nọ do owanyi yetọn na gbẹtọvi lẹ hia gbọn? (b) Adà tẹwẹ angẹli lẹ nọ yiwà to azọ́n yẹwhehodidọ tọn lọ mẹ? (Sọ pọ́n yẹdide lọ.)

⁸ Angẹli lẹ ma nọ mọdọ emi pọnte hú gbẹtọvi lẹ. Yé yiwanna gbẹtọvi lẹ. Yé nọ jaya whenue ylandonọ de lẹnvọjọ, enẹ wẹ yindọ whenue lẹngbọ he danbú de lẹkọwa Jehovah dè kavi whenue mẹde diọ aliho nuyiwa tọn etọn lẹ bo wá nugbo lọ mẹ. (Hia Luku 15:10.) Angẹli lẹ sọ nọ yí zohunhun do dó mahẹ to azọ́n yẹwheho Ahọluduta lọ tọn didọ mẹ. (Osọ. 14:6) Mahopọnna dọ yé ma nọ dọyẹwheho na mẹlẹ tlọlọ, yé gán deanana wẹnlatọ de yì mẹhe jlo na plọnnu gando Jehovah go de dè. Na nugbo tọn, mí ma gán dọ po nujikudo po dọ angẹli lẹ wẹ deanana mí yì omẹ tangan de dè. To popolẹpo mẹ, Jehovah gán yí aliho devo lẹ zan taidi gbigbọ wiwe etọn nado gọalọna gbẹtọ lẹ kavi nado deanana devizọnwatọ etọn lẹ. (Owalọ 16:6, 7) Amọ́, e nọ yí angẹli etọn lẹ zan to aliho he gbloada mẹ. Enẹwutu, whenue mí to wẹndagbe lọ lá, mí gán kudeji dọ angẹli lẹ na to finẹ nado nọgodona mí.—Pọ́n apotin lọ, “Odẹ̀ Yetọn lẹ Mọ Gblọndo.”b

9. Nawẹ mí gán hodo apajlẹ owanyi he angẹli lẹ tindo na gbẹtọvi lẹ tọn gbọn?

⁹ Nawẹ mí gán hodo apajlẹ lehe angẹli lẹ nọ do owanyi hia gbẹtọvi lẹ do tọn gbọn? Whenue mí sè nulila de dọ mẹde ko yin gigọyí, mí gán nọ jaya dile angẹli lẹ nọ wà do. Mí gán ze afọdide tintan nado dokuavọna mẹmẹsunnu lọ bo hẹn ẹn kudeji dọ mí yiwanna ẹn. (Luku 15:4-7; 2 Kọl. 2:6-8) Mí gán sọ hodo apajlẹ angẹli lẹ tọn eyin mí nọ wà nuhe go mí pé lẹpo to azọ́n yẹwhehodidọ tọn lọ mẹ. (Yẹwh. 11:6) Podọ, kẹdẹdile angẹli lẹ nọ nọgodona mí dile mí to wẹndagbe lọ lá do, mí gán nọ dín aliho voovo lẹ nado nọgodona mẹmẹsunnu po mẹmẹyọnnu mítọn lẹ po to lizọnyizọn yetọn mẹ. Di apajlẹ, be mí gán basi tito nado wazọ́n dopọ hẹ wẹnlatọ he ma ko do numimọ sọmọ de ya? Be mí gán nọgodona mẹmẹsunnu po mẹmẹyọnnu po he yin mẹhomẹ kavi madogánnọ lẹ na yé nido sọgan penugo bo doalọ to lizọnyizọn lọ mẹ ya?

10. Etẹwẹ mí gán plọn sọn numimọ Sara tọn mẹ?

¹⁰ Bọ etẹwẹ lo eyin ninọmẹ mítọn zọ́n bọ nuhe mí gán wà lẹ do dogbó? Mí gán gbẹ́ dín aliho lẹ nado wazọ́n dopọ hẹ angẹli lẹ to lizọnyizọn lọ mẹ. Lẹnnupọndo numimọ Sarac tọn ji, yèdọ mẹmẹyọnnu de to Inde. To whenue Sara ko basi gbehosọnalitọ na nudi owhe 20 godo, e bẹ awutu bo ma gán nọ fọ́n sọn adọzan ji. Enẹwutu, e jẹflumẹ sinsinyẹn. Amọ́, Biblu hihia gbesisọ tọn Sara tọn gọna godonọnamẹ whẹndo gbigbọmẹ tọn etọn tọn zọ́n bọ vudevude e vọ́ wleawuna pọndohlan dagbe. Na nugbo tọn, e dona diọadana lizọnyizọn etọn sọgbe hẹ ninọmẹ yọyọ etọn. Na e ma tlẹ gán sinai nado kàn wekanhlanmẹ lẹ wutu, mahẹ tintindo etọn to lizọnyizọn lọ mẹ nọte do kunnudide alokan ji tọn ji. Enẹwutu, e tẹkan hlan gọyìpọn etọn lẹ bọ yé sọ jlẹ mẹdevo he gán tindo ojlo lẹ na ẹn. Etẹwẹ yin kọdetọn lọ? To osun kleun delẹ godo, Sara tindo plọnmẹ Biblu 70, ehe sù tlala hú dehe e gán deanana! Enẹwutu, e ze delẹ jo na mẹdevo lẹ to agun lọ mẹ. Todin, susu to plọnmẹ Biblu lọ lẹ mẹ nọ wá opli mítọn lẹ. Lehe homẹ angẹli lẹ tọn dona ko hùn do sọ nado wazọ́n dopọ hẹ mẹmẹsunnu po mẹmẹyọnnu lẹ po he nọ wà nuhe go yé pé lẹpo to azọ́n yẹwhehodidọ tọn lọ mẹ taidi Sara!

ANGẸLI LẸ NỌ DOAKỌNNANU

11. Nawẹ angẹli nugbonọ lẹ nọ do akọndonanu ayidego tọn hia gbọn?

¹¹ Apajlẹ ayidego tọn de wẹ angẹli nugbonọ lẹ yin na nuhe dù akọndonanu. Yé ko doakọnna mawadodo po kanyinylan po na owhe fọtọ́n susu lẹ. Yé mọ bọ Satani po nudida gbigbọnọ susu devo lẹ po, yèdọ mẹhe ko sẹ̀n dopọ hẹ yé wayi lẹ ṣiatẹ sọta Jehovah. (Jen. 3:1; 6:1, 2; Juda 6) Biblu dọho gando angẹli nugbonọ de go he pehẹ nukundiọsọmẹ tlọlọ sọn aovi huhlọnnọ de dè. (Dan. 10:13) Humọ to whenuho gbẹtọvi tọn gblamẹ, omẹ vude poun wẹ angẹli lẹ mọ bọ yé doafọna sinsẹ̀n-bibasi nugbo. Mahopọnna enẹ lẹpo, angẹli nugbonọ ehelẹ yí ayajẹ do zindonukọn nado to Jehovah sẹ̀n po zohunhun po. Yé yọnẹn dọ eyin ojlẹ lọ sọ, Jiwheyẹwhe na de mawadodo lẹpo sẹ̀.

12. Etẹwẹ gán gọalọna mí nado doakọnnanu?

¹² Nawẹ mí gán hodo apajlẹ akọndonanu tọn angẹli lẹ tọn gbọn? Taidi angẹli lẹ, mí gán pehẹ mawadodo kavi nukundiọsọmẹ. Amọ́ dile yé wà do, mílọsu gán kudeji dọ to ojlẹ sisọ mẹ, Jiwheyẹwhe na de kanyinylan lẹpo sẹ̀. Enẹwutu, taidi angẹli nugbonọ lẹ, mí ma nọ “gbọjọ to nuhe yin dagbe wiwà mẹ.” (Gal. 6:9) Podọ, Jiwheyẹwhe dopà nado gọalọna mí nado doakọnnanu. (1 Kọl. 10:13) Mí gán hodẹ̀ na Jehovah bo biọ gbigbọ etọn, he na gọalọna mí nado wleawuna homẹfa po ayajẹ po. (Gal. 5:22; Kol. 1:11) Bọ eyin a pehẹ nukundiọsọmẹ lo? Deji mlẹnmlẹn do Jehovah go, podọ ahun towe ni ma gbàdo blo. Jehovah na nọgodona we bosọ na we huhlọn to whepoponu.—Heb. 13:6.

ANGẸLI LẸ NỌ GỌALỌ NADO HẸN AGUN LỌ DO WIWEJI

13. Azọ́ndenamẹ titengbe tẹwẹ angẹli lẹ tindo to azán godo tọn lẹ mẹ? (Matiu 13:47-49)

¹³ To azán godo tọn lẹ mẹ, Jehovah ko deazọ́n titengbe de na angẹli lẹ. (Hia Matiu 13:47-49.) Azọ́n yẹwhehodidọ tọn lọ nọ dọ̀n gbẹtọ voovo livi susu lẹ. Delẹ to omẹ ehelẹ mẹ nọ ze afọdide lọ nado lẹzun Klistiani nugbo lẹ, amọ́ mẹdevo lẹ ma nọ wàmọ. Angẹli lẹ ko yin azọ́ndena nado “klan mẹylankan lẹ dovo na dodonọ lẹ.” Ehe dohia dọ yé yin azọ́ndena nado basi hihọ́na wiwejininọ agun lọ tọn. Ehe ma zẹẹmẹdo dọ mẹdepope he doalọtena gbẹdido hẹ mí na whẹwhinwhẹ́n de kavi devo wutu ma gán sọ lẹkọwa gbede ba; mọ e ma zẹẹmẹdo dọ nuhahun lẹ ma na tin gbede to agun lẹ mẹ. Amọ́, mí gán kudeji dọ angẹli lẹ to azọ́n sinsinyẹn wà nado hẹn agun mítọn lẹ do wiweji.

14, 15. Nawẹ mí gán hodo apajlẹ lehe wiwejininọ agun lọ tọn to gbigbọ-liho podọ to walọyizan-liho nọ duahunmẹna angẹli lẹ do tọn gbọn? (Sọ pọ́n yẹdide lọ lẹ.)

¹⁴ Nawẹ mí gán hodo apajlẹ lehe wiwejininọ agun lọ tọn nọ duahunmẹna angẹli lẹ do tọn gbọn? Mí na wàmọ eyin mí yí adà mítọn wà nado hẹn agun lọ do wiweji to walọyizan-liho podọ to gbigbọ-liho. Na enẹ nido pà mí, mí nọ dovivẹnu nado basi hihọ́na ahun mítọn, bo nọ de gbẹdido dagbe lẹ bosọ nọ gbẹ́ nuyiwadomẹji depope he na hẹn mí flu dai. (Salm. 101:3) Mí gán sọ gọalọna sinsẹ̀n-basitọ hatọ mítọn lẹ nado to nugbonọ yin na Jehovah zọnmii. Di apajlẹ, etẹwẹ mí na wà eyin mí sè dọ yisenọ hatọ de ko jai jẹ ylando sinsinyẹn de mẹ? Owanyi he mí do na omẹ mọnkọ na whàn mí nado na ẹn tuli nado yì dọna mẹho agun tọn lẹ. Eyin mẹlọ ma wàmọ, mí na dọna mẹho agun tọn lẹ gando whẹho lọ go. Mí nọ jlo dọ yisenọ hatọ he yin madogánnọ to gbigbọ-liho de ni yawu mọ alọgọ!—Jak. 5:14, 15.

¹⁵ E blawu dọ mẹdelẹ he waylando sinsinyẹn ko yin didesẹ sọn agun mẹ. To ninọmẹ mọnkọ lẹ mẹ, mí ‘masọ nọ dogbẹ́’ hẹ yé ba.d (1 Kọl. 5:9-13) Tito ehe nọ gọalọ nado hẹn agun lọ do wiweji. Humọ, eyin mí de ma nado nọ dogbẹ́ hẹ mẹhe yin didesẹ sọn agun mẹ lẹ, na nugbo tọn homẹdagbe dohia yé wẹ mí te. Afọdide nujikudo tọn mítọn gán whàn yé nado gọ̀ biọ yede mẹ. Eyin yé wàmọ, míwlẹ, Jehovah po angẹli etọn lẹ po nọ jaya.—Luku 15:7.

16. Aliho tẹlẹ mẹ wẹ a na tẹnpọn nado hodo apajlẹ angẹli lẹ tọn te?

¹⁶ Lẹblanulọkẹyi nankọ die mí tindo nado yí nukun yise tọn mítọn lẹ do mọnú jẹ agblò gbigbọmẹ tọn lọ mẹ, podọ nado wazọ́n dopọ hẹ angẹli lẹ! Mì gbọ mí ni nọ wleawuna jẹhẹnu dagbedagbe yetọn lẹ, enẹ wẹ whiwhẹ, owanyi yetọn na gbẹtọ lẹ, akọndonanu yetọn po aliho he mẹ wiwejininọ agun lọ tọn to walọyizan-liho podọ to gbigbọ-liho nọ duahunmẹna yé te po tọn. Eyin mí nọ hodo apajlẹ angẹli nugbonọ lẹ tọn, mílọsu gán yin apadewhe whẹndo sinsẹ̀n-basitọ Jehovah tọn lẹ tọn kakadoi.